Serbia, Kroacia e Sllovenia me hekurudhë të përbashkët

Vështirësive të qytetarëve, të cilët kanë udhëtuar në rrugën Prishtinë-Pejë, më saktësisht në pjesën Fushë-Kosovë-Sllatinë, sidomos për ata që e kanë frekuentuar këtë rrugë çdo ditë tash e një vit, si duket u ka ardhur fundi.
Kjo pasi gjatë vikendit ka filluar shtrimi i asfaltit në pjesën e parë të kësaj rruge, e cila kishte filluar zgjerimin tash e një vit. Kjo ka ndodhur vetëm disa ditë pas premtimit të ministrit të Transportit, Fatmir Limaj, se rruga do të përfundohet para vjeshtës. "Shtrati i rrugës besoj që për 10 ditë do t'i shohim fillim e asfaltimit të fazës së parë. Punimet e rrugës në përgjithësi do të përfundojnë tërësisht deri në vjeshtë", pati deklaruar ministri Limaj ditë më parë. Kompanitë që janë duke zgjeruar këtë magjistrale i kanë intensifikuar punimet, ndërsa në disa pjesë të saj është duke u punuar dhe gjatë natës.
Pjesa e parë e rrugës-lot 1, tanimë është më afër përfundimit, pasi është duke u rregulluar shtrati i rrugës, për t'u përgatitur për asfalt. Ndërsa tanimë një pjesë të rrugës, më shumë se një kilometër iu është shtruar asfalti. Madje edhe në ditët e vikendit është duke u punuar në të gjitha pjesët e rrugës.
Përveç, disa urave që tanimë janë më afër përfundimit, disa të tjera mund të vonohen derisa të jenë të gatshme tërësisht për qarkullim. Këtë e ka pranuar edhe ministri i Transportit, Fatmir Limaj. Idriz Gërguri, banor i fshatit Vragoli, thotë të jetë i gëzuar që ka filluar asfaltimi i rrugës, pasi ka një vit që përballet me probleme gjatë udhëtimit për shkak të punimeve që janë zhvilluar në këtë rrugë. "Që një vit duke udhëtuar në këtë rrugë ka qenë një torturë, pasi edhe automobili është dërrmuar dhe po pres pasi të përfundojë rruga t'ia bëjë një servisim", u shpreh ai. Gërguri shpreson që rruga të jetë e shtruar me standarde të lartë, pasi, sipas tij, kjo rrugë është më e frekuentuara dhe mund të shfaqen gropat shpejt. V. P.