A do të ketë ndarje të Kosovës...

Pas shpalljes së Pavarësisë së Kosovës dhe shkëmbimit të artikulimit të ndërsjelltë të miqësisë vëllazërore u fol shumë dhe për përfshirjen e Shqipërisë në aksionet e Termocentralit “Kosova C”. Në fakt, ky pohim, u shtua së fundi me vizitën e parë si kryeministër të Kosovës në Tiranë të Z. Hashim Thaçi. Ky i fundit e theksoi më shumë atë. Ai deklaroi në foltoren e përbashkët me kryeministrin shqiptar për përfshirjen e Shqipërisë në “Kosova C” dhe për predispozitën e qeverisë së tij. Por...

Shqipëria jashtë
termocentralit
Jo vetëm kaq, por ato ditë- njerëzit teknikë filluan që edhe të merreshin dhe me kalkulimet e mëtejshme të përfitimit. “Kemi rënë dakord të bashkëpunojmë ngushtë në fushën e energjisë në mënyrë që të japim përgjigjen më të mirë. Në këtë fushë ka vështirësi por kemi rezerva kolosale”, përcaktoi kryeministri Thaçi. Ndërsa, kryeministri Berisha, ia ktheu me patos nga ana tjetër, duke thënë se :”Për shkak të përmasave së tij, kompleksitivitetit të procedurave të një vepre kaq të madhe, ne po shqyrtojmë mundësinë që të jemi aksionet të “Kosova C”. Për ironi të fatit, tashmë këto deklarata duken si krejt jashtë realitetit. Pasi ka qenë Ministria e Energjetikës së Kosovës, që është shprehur qartë se kanë përfunduar procedurat e tenderimit dhe se pjesa shqiptare nuk ekziston. “MEM (Ministria e Energjetikës dhe e Minierave) bëri të ditur sesa i përket projektit ‘Kosova C’, kompanitë para-kualifikuese janë përcaktuar dhe përfshirja e ndonjë investitori tjetër nuk është e mundur”, është deklaruar në një komunikatë të fundit për shtyp. E vetmja shpresë që ka mbetur është në fjalën e zëvendës/ministrit, Ramë Manaj, që ka pohuar se do të realizohet ajo çfarë kanë deklaruar kryeministrat në takimin e tyre.
Çfarë është
ky termocentral
Ky projekt madhështor, për sa i përket interesave të tij, do të shërbejë për energji elektrike shtesë nga Kosova. Termocentrali Kosova C është një projekt që i përket viteve ’80, por që është inincuar nga qeveria e shkuar. Sipas projektit, termocentrali do të prodhojë 2100megaWat orë energji elektrike dhe do të kushtojë rreth 3 miliard Euro. Në fazën e parë, ai do të realizohet me 900-1000mgW. Ai mendohet se do të jetë funksional aty rreth vitit 2012-2014. Kurse në fazën e dytë, planifikohet që të instalohen 1000-1200mgW dhe pritet të mbarojë rreth 2020. Ajo do të financohet nga partnerë ndërkombëtarë ndërsa mendohet se Kosova do të bëhet dhe një eksportues kryesor i energjisë...Nga të dhënat mendohet se Shqipëria do të investonte në termocentralet e Kosovës përmes Fondit Shqiptar të Zhvillimit. ...

Serbët u ngrihen puplat: A mund të ndahet Kosova
Duke parë çrregullimet e autoriteteve në Kosovë, serbët e kanë pasur më lehtë që të bëjnë planet e tyre. Më e rënda, por e planifikuar mirë prej tyre- është pa asnjë dyshim ajo e organizimit të Parlamentit të tyre më 28 qershor. Ndaj ka qenë i kuptueshëm edhe reagimi i Bajram Rexhepit, kryebashkiakut të Mitrovicës- që ka bërë të njohur shqetësimin e tij për atë që po bëjnë serbët me rastin e formimit të Kuvendit të tyre më ditët e fundit të qershorit. Në të njëjtën kohë, serbët, e kanë planifikuar që me rastin e festimeve për përvjetorin e betejës së Fushë-Kosovës të merren edhe me themelimin e Kuvendit serb të Kosovës. Një përpjekje e sofistikuar për ndarjen e Kosovës...
Në këtë rast, kryeministri i Kosovës Hashim Thaçi dhe ai i Shqipërisë Sali Berisha, kanë deklaruar këtë fillimjavë në Bruksel se ndarja e Kosovës do të ishte një skenar i rrezikshëm. Kryeministri Berisha ka kritikuar autoritetet në Serbi për shkak të formimit të strukturave paralele në Kosovë duke thënë se situata në veri duhet të vendoset si test kryesor për qeverinë e re atje. “Kufijtë ndërkombëtarë të Kosovës duhet të respektohen”, ka thënë Berisha, të martën në Bruksel, i cituar nga “Express”. Thaçi dhe Berisha kanë marrë pjesë në një samit për Ballkanin të organizuar nga “Miqtë e Evropës”, i cili përbëhet nga fondacione dhe shoqata të ndryshme. Në fjalën e tij Kryeministri kosovar ka pohuar se pas krijimit të qeverisë pro-evropiane në Serbi pret që ky zhvillim të ketë ndikim pozitiv edhe në Kosovë. “Sa më afër të jetë Beogradi me Brukselin aq më afër do të jenë serbët e Kosovës me Prishtinën”, ka thënë Thaçi. Duke u ndërlidhur me Mitrovicën, Kryeministri Berisha ka thënë se Kosova është një rast unik por jo faktit që Mitrovica duhet që të ndahet.
Në këtë debat kanë marrë pjesë personalitete të ndryshme nga rajoni i Ballkanit Perëndimor dhe zyrtarë të Institucioneve të BE-së. Komisionari i BE-së për Zgjerim Oli Rehn ka thënë se pavarësisht se në Irlandë është refuzuar, Traktati i Lisbonës me të cilin synohet reformimi i BE-së, nuk do të ketë ndikim për perspektivën evropiane të Ballkanit. Edhe folës të tjerë, përfshirë edhe ish –shefin e UNMIK-ut Joachim Rucker kanë kundërshtuar idetë për ndarjen e Kosovës ndërkohë që ka folur për rikonfigurimin e pranisë ndërkombëtare në vend. Në Bruksel- për Kosovën ka folur edhe Jean-Pierre Jouyet, sekretar francez i shtetit për çështje evropiane, i cili ka deklaruar se vendosja e EULEX-it dhe ndihma për forcat pro-evropiane në Serbi, në kontekstin e pavarësisë së Kosovës do të jetë një nga sfidat e BE-së, gjatë presidencës së Francës, që do të nisë nga 1 korriku. Ai po ashtu ka theksuar se Ballkani Perëndimor ka perspektivë evropiane. Po ashtu, është mbështetur edhe plani i Ki Moon, ku Kryeministri Britanik Gordon Brown është shprehur i kënaqur me mbështetjen që i është dhënë planit të OKB-së për rikonfigurimin e UNMIK-ut.
“BE do të marrë një rol më të madh në të ardhmen dhe besoj se me gjithë diferencat që janë shprehur për Kosovën ka pasur pajtim të përgjithshëm për propozimin”, ka thënë Broën duke iu referuar debatit për Kosovën në Këshillin e Sigurimit, pak kohë më parë. Duke iu drejtuar Parlamentit Evropian, Brown ka thënë se për këtë plan ka përkrahje edhe nga Ministrat e Jashtëm të BE-së.

Rusët sërish në skenë. Evropa jo ndarjes
Në qytetin e Rusisë Hanti-Mansijsk, në të njëjtën kohë, me mbledhjen e Brukselit- filloi samiti dy ditor Rusia-BE,në të cilin në qendër të vëmendjes ishte fillimi zyrtar i negociatave për marrëveshjen e re për partneritet dhe bashkëpunim të Rusisë me BE. Sipas paralajmërimeve nga Moska, njëra nga temat e bisedës të kryetarit rus Dimitrij Medvedev dhe zyrtarëve evropian ka qenë edhe Kosova. Zëvendësi i ministrit të punëve të jashtme i Rusisë Aleksandar Grushko,duke paralajmëruar bisedat për Kosovën në samit,deklaroi se Moska “kupton se BE është e gatshme për të marr në vete pjesën e përgjegjësisë në rajon, por konsideron se përforcimi i ndikimit të saj duhet të harmonizohet me Beogradin dhe Prishtinën dhe këtë të lejoj OKB-ja”, referuar BETA-s.

Kosova
“Kosova, shteti më i ri në botë, vazhdon të njihet nga shtete të reja, përsërisin për çdo ditë politikanët. Mirëpo, nuk është saktësisht e njëjta Kosovë ajo që po njihet nga vendet e ndryshme. Jemi gjithnjë e më të rrudhur territorialisht e më të gjymtuar institucionalisht”, shprehet publicisti Albin Kurti.
Në fakt, në rrugën e saj Kosova, ka pasur kufizime duke filluar që pas 17 shkurtit, ajo pas 11 majit, kjo pas 15 qershorit apo ajo që do të bëhet në vjeshtë?, sipas të njëjtit autor. Në një farë mënyre, Kosova, është akoma në axhendat ndërkombëtare dhe në përpjekje të pareshtur për t’i gjetur modelin më të përshtatshëm për mbijetesën e saj të vështirë. Dhe kjo Pavarësi nuk ka më lidhje me artikulimet e politikanëve kosovarë, por me luftën që po bëhet sesa këta politikanë do arrijnë tu shërbejnë interesave të banorëve kosovarë. Me sa duket në këto hulli ku është Kosova të duhet që të presësh gjatë dhe të tentosh që të besosh më të mirën.
Sa i përket qeverisë së Kosovës në përballjet e saj ka sfida pa fund, kurse për Serbinë duket se Evropa ndjehet sikur e ka tepruar pak në kurriz të saj.
“Në deklaratën e pavarësisë së Kosovës tetë herë përmendet Ahtisaari dhe vetëm tri herë pavarësia, përfshirë këtu edhe titullin e deklaratës. Dokumenti i Ahtisaarit në përpikmërinë e tij realisht ka rënë sepse procesi nuk po mbyllet: institucionet e Kosovës jo vetëm që e kanë filluar procesin e pazarit me Kosovën, por ato asnjëherë nuk kanë treguar vendosmëri për ta mbyllur këtë proces. Në rastin më të mirë - e që sërish është i keq - do të na përsëritet situata e fundit të viteve të ’80-ta: institucionet e Kosovës do të insistojë në Planin e Ahtisaarit ashtu siç insistohej dikur në autonominë e ’74-shit. Fare mirë e dimë të gjithë se çfarë pat ndodhur atëherë...”, thotë Albin Kurti, duke treguar se stanjacioni kosovar tashmë është në një stad tjetër dhe kjo lidhet me ecjen e Kosovës si shtet, pa frikën e ndarjeve...