Ministrat e jashtëm të vendeve kryesore të Bashkimit Evropian kanë kërkuar hapjen e një procesi hetimor ndërkombëtar për të zbuluar se cili vend ishte përgjegjës për fillimin e konfliktit të fundit mes Gjeorgjisë dhe Rusisë.

Ministrat e Jashtëm të Britanisë, Gjermanisë dhe Italisë ishin ndër vendet që kërkuan zhvillimin e hetimit, kur u mblodhën në qytetin francez Avinjon, për të shqyrtuar planet për dërgimin e një misioni me vëshgues evropianë në Gjeorgji. Shefi i Politikës së Jashtme të Bashkimit Evropian, Havier Solana, tha se misioni është thuajse gati. Ai tha se Presidenti francez Nikola Sarkozi, vendi i të cilit mban presidencën e radhës të Bashkimit Evropian, pritet ta diskutojë këtë çështje me udhëheqësit rusë, gjatë bisedimeve nesër në Moskë.

Më parë, Sekretarja amerikane e Shtetit Kondoliza Rajs paralajmëroi Rusinë, se po zhytet më tej në izolim, duke mos përmbushur kushtet e armëpushimit me Gjeorgjinë.

Shtetet e Bashkuara e kanë kritikuar disa herë Rusinë për mbajtjen e forcave të armatosura në zonën e sigurisë përreth rajoneve separatiste të Osetisë Jugore dhe Abkazisë. Moska thotë se trupat e saj po kryejnë misionet e nevojshme paqeruajtëse.//lk