Gjeorgjia është ende në gjendje lufte, me gjithë përpjekjet e shumta nga SHBA dhe nga fqinjët e saj për të ndryshuar situatën. Rusët bombarduan disa objektiva ushtarake në orët e para të së hënës. Ministria e Brendshme gjeorgjiane thotë se avionë rusë kanë kryer sulme të tjera me bomba pranë kryeqytetit Tbilisi. Ajo thotë se sulmet e fundit u kryen në orët e para të mëngjesit të së hënës dhe kishin si objektiv një bazë ushtarake dhe një radar. Nuk ka njoftime për viktima. Më herët, Gjeorgjia tha se Rusia kishte bombarduar aeroportin ndërkombëtar pranë Tblisit. Rusia e ka akuzuar Gjeorgjinë se është duke përhapur informacione të rreme. Ndërkohë dhjetëra mijëra njerëz janë larguar nga qyteti gjeorgjian Gori, pranë kufirit me Osetinë Jugore, për shkak të frikës nga trupat ruse që po drejtohet nga Gori. Gori u vu nën sulmet e artilerisë ruse të shtunën. Rusia thotë se luftimet vazhdojnë në Osetinë Jugore, me gjithë deklaratën e mëhershme të Gjeorgjisë për armëpushim.
Reagimi amerikan
Shtetet e Bashkuara kanë qenë mjaft kritike ndaj veprimeve ushtarake ruse kundër Gjeorgjisë. Gjatë një bisede telefonike me presidentin gjeorgjian, Mikhail Saakashvili, zv/presidenti amerikan Dick Cheney tha se agresioni rus "nuk duhet të kalonte pa përgjigje" dhe se vazhdimi i tij do të kishte pasoja serioze.
Telefonata e zotit Dick Cheney duket se ka qenë jo vetëm një përpjekje për të dërguar një mesazh solidariteti, por edhe gatishmërie për veprim. Zyrtarë të Shtëpisë së Bardhë kanë refuzuar të spekulojnë lidhur me atë se çfarë do të bënte Amerika nëse vazhdonte veprimi ushtarak rus. Ndërkaq presidenti Bush, gjatë një interviste për televizionin amerikan direkt nga Pekini, tha se kishte shprehur shqetësimin e tij të thellë për kundërpërgjigjen e tepruar të Rusisë. Moska këmbëngul në një tërheqje të plotë gjeorgjiane përpara se të hyjë në fuqi ndonjë lloj armëpushimi.
Në pritje
Shtetet e Bashkuara kanë thënë se do të hartojnë një rezolutë në Këshillin e Sigurimit të Kombeve të Bashkuara, përmes të së cilës do të dënohet sulmi ushtarak rus ndaj Gjeorgjisë. Këshilli i Sigurimit nuk arriti përsëri një qëndrim të përbashkët lidhur me krizën, me gjithë takimin e katërt brenda disa ditësh. Ministri i Jashtëm francez, Bernard Kouchner, i cili po vepron në emër të Bashkimit Evropian, ka shkuar në Tbilisi në një mision për t'iu dhënë fund luftimeve. Kouchner tha se kishte një plan francez për situatën: "Armëpushim fillimisht, pastaj hapja e rrugës për të shkuar tek viktimat, e treta, tërheqje e trupave, tërheqje e kontrolluar e trupave, e katërta, kthimi në tryezë, negociata, bisedime për paqe, zgjidhje politike". "Kjo është e gjitha. Më vjen keq, është e lehtë të thuhet, por e vështirë për t'u bërë", tha Ministri i Jashtëm Francez.

Putin reagon ndaj SHBA-së dhe BE-së

Kryeministri rus Vladimir Putin është kundërpërgjigjur pas akuzave dhe kërcënimeve të Bashkimit Evropian dhe Shteteve të Bashkuara të Amerikës. Gjatë mbledhjes së qeverisë, Putin u shpreh se SHBA dhe Perëndimi po gabojnë në politikat e tyre. Ai theksoi se transportimi i ushtarëve gjeorgjianë nga Iraku drejt vendit të tyre me avionë ushtarakë amerikanë, ishte një veprim i gabuar i Pentagonit. Ai shtoi se ka nga ata diplomatë amerikanë që situatën dhe zhvillimet i shikojnë ende me syrin e Luftës së Ftohtë. "Është e turpshme që disa nga partnerët tanë, në vend që të na ndihmojnë, po përpiqen të na pengojnë në misionin tonë paqësor. Këtu, e kam fjalën për transportin e ushtarëve gjeorgjianë nga Iraku me avionë amerikanë", tha Putin.

Reagimet

BE
“Bashkimi Evropian i ka bërë thirrje Rusisë të heq dorë nga çdo ndërhyrja ushtarake në territorin e Gjeorgjisë. Komisioni i BE-së, në një deklaratë të publikuar dje, thekson se "BE i bën thirrje Rusisë t'i jap fund çdo ndërhyrjeje ushtarake në territorin e Gjeorgjisë". Në deklaratë theksohet se "BE do të ngrejë tonin ndaj Rusisë, nëse kjo e fundit nuk tërhiqet nga sulmet e saj ushtarake."

Rusia
“Rusia nuk do të zgjerojë operacionet jashtë kufijve të Osetisë së Jugut. Këtë e deklaroi para gazetarëve zv.komandanti i Forcave të Armatosura të Rusisë, Anatoli Nogovitsin. Sipas tij, pretendimet e Tbilisit se Rusia kërkon të shtrijë pushtimin e saj në mbarë territorin gjeorgjian, nuk janë të vërteta. "Ne nuk kalojmë përtej kufirit të Osetisë së Jugut. Ky është principi ynë. Deri më tani nuk është dhënë asnjë urdhër që forcat paqeruajtëse ruse të ndërhyjnë në qytetet e tjera gjeorgjiane"

Stubb
“Gjeorgjia ka firmosur deklaratën e armëpushimit. Lajmin e konfirmoi për CNN vetë ministri i Jashtëm i Finlandës, Aleksander Stubb. Sipas diplomatit finlandez, presidenti i Gjeorgjisë, Mikail Sakashvili ka firmosur deklaratën e armëpushimit. Stubb tha se dokumenti po i dërgohet tashmë edhe Moskës zyrtare nga e cila pritet që të pranojë marrëveshjen. Sipas deklaratës në fjalë, nëse ai pranohet edhe nga pala ruse, atëherë i jepet fund luftës.”

NATO 
“Akuza të rënda ndaj Moskës zyrtare ka adresuar sekretari i Përgjithshëm i NATO-s, Jaap de Hoop Scheffer. Sipas tij, "Rusia po cenon integritetin territorial të Gjeorgjisë". Në deklaratën Sheferit, të cituar nga zëdhënësi Carmen Romero, thuhet se "NATO është e shqetësuar ndaj përdorimit të forcës nga Rusia, e cila po cenon integritetin territorial të Gjeorgjisë.” 

Kremlini
“Krerët më të lartë rus, Presidenti Dimitri Medvedev, kryeministri Vladimir Putin, ministri i Mbrojtjes, Anatoli Serdjukov dhe drejtues të ushtrisë janë mbledhur në një takim të jashtëzakonshëm në Kremlin. Sipas zyrës për shtypi në Kremlin, bëhet e ditur se në mbledhjen e drejtuar nga Medvedev do të analizohet situata e fundit në Osetinë Jugore, vend ky që ka shpallur pavarësinë e njëanshme nga Gjeorgjia.”

Londra
“Shefi i diplomacisë britanike, David Miliband ka kritikuar Moskën zyrtare për veprimet ushtarake që ka ndërmarrë kundër Gjeorgjisë, duke i cilësuar ato si sulme që kanë tejkaluar krahinën e Osetisë së Jugut. Duke theksuar se ka rritur bashkëbisedimet me homologët ndërkombëtarë, Miliband shprehu shqetësimin e Londrës zyrtare për përkeqësim të situatës në Gjeorgji.”