Konflikti në Kaukaz rrezikon të zgjerohet

11.08.2008 15:05 Bota - Burimi: SHQIP Bota

Duke filluar që nga ora 20:00 e së dielës, në një pjesë të territorit të krahinës tjetër separatiste të Abkhazisë, është shpallur gjendja e luftës për një periudhë prej dhjetë ditësh, njoftoi agjencia ruse e lajmeve "Interfax", duke cituar një dekret të Presidentit abkhaz, Sergei Bagapsh. Gjendja e jashtëzakonshme është vendosur në distriktin e Galit, të Tkhvartchelit, të Otchamtchiras dhe të Goulripch, si dhe në një pjesë të kryeqytetit abkhaz, Sukhumi. "Abkhazia, e cila ka dekretuar një mobilizim të pjesshëm të rezervistëve të saj, do të kryejë bombardime ajrore dhe goditje me artileri në pjesën e Kodorit, që është nën kontrollin gjeorgjian", bëri të ditur në përfaqësues i Presidentit Bagapsh, i cituar nga agjencia "Interfax". Disa njësi të ushtrisë abkahaze janë dislokuar deri në lumin Inguri në kufi me Gjeorgjinë, në distriktin e Galit, një krahinë abkhaze e populluar kryesisht nga gjeorgjianë. Edhe agjencia e lajmeve "Reuters" shkruan se si shenjë e zgjerimit të mëtejshëm të konfliktit, lideri i Abkhazisë, Sergei Bagapsh, ka urdhëruar dërgimin e 1 mijë trupave për të nxjerrë forcat gjeorgjiane jashtë grykës së Kodorit, një "xhep" strategjik në Abkhazi, si edhe ka thirrur nën armë rezervistët. Gjeorgjia ka denoncuar atë që konsiderohet "agresion i ri" i Moskës në Abkhazi, një rrip toke përgjatë bregut të Detit të Zi që gjithashtu ka dalë jashtë kontrollit gjeorgjian në vitet ‘90. "Ata kanë filluar operacionet në grykën e Kodorit", tha një zëdhënës i Ministrisë së Brendshme gjeorgjiane. Gjithsesi, një gjeneral rus ka mohuar se Moska po merr pjesë në një operacion në Abkhazi, përveçse po vazhdon të luajë rolin e saj paqeruajtës. Marina ruse gjithashtu është bërë pjesë e konfliktit dhe një flotë është vendosur pranë brigjeve gjeorgjiane në Detin e Zi. Marina ruse tha se anijet do të futeshin më vonë në një port rus në Detin e Zi, edhe pse disa raporte nga Gjeorgjia i akuzojnë ato se po përpiqen të bllokojnë vendin. Në këtë pikë ka reaguar edhe Ukraina, e cila ka thënë se ka të drejtë që të ndalojë përkohësisht luftanijet ruse të dërguara pranë brigjeve gjeorgjiane, të kthehen në bazën ukrainase në Sevastopol. "Ukraina ka të drejtën t‘i ndalojë luftanijet dhe skafet që marrin pjesë në konfliktin me Gjeorgjinë të kthehen në territorin ukrainas deri sa të zgjidhet konflikti", thuhej në një deklaratë të Ministrisë së Jashtme ukrainase. Flota ruse e Detit të Zi e ka në fakt bazën në portin ukrainas të Sevastopolit. "Ukraina paralajmëron palën ruse për mospjesëmarrje të flotës së saj të Detit të Zi në konfliktin për krahinën separatiste gjeorgjiane të Osetisë së Jugut", thuhej në deklaratën e publikuar në faqen e internetit të Ministrisë së Jashtme ukrainase.

Artikullin origjinal mund ta lexoni ketu

lajme.parajsa.com