Lufta, trupat ruse hyjnë thellë në territorin e Gjeorgjisë

13.08.2008 00:07 Bota - Burimi: SHQIP Bota

Presidenti gjeorgjian, Mikhail Sakashvili, akuzoi dje Moskën se po përpiqet të rrëzojë qeverinë e tij, ndërsa trupat ruse u shtynë akoma më shumë në dy rajonet separatiste të Gjeorgjisë dhe refuzuan propozimin e saj për armëpushim. Presidenti francez, Nikolas Sarkozi, po përgatitet ndërkohë të fluturojë drejt Gjeorgjisë dhe Rusisë, ku do të "zbarkojë" sot në një mision paqeje, pas një raundi të parë diplomacie të lëvizshme të ministrit të tij të Jashtëm. Ndërsa luftimet vazhdojnë në zonën e krizës në Kaukaz, qeveritë perëndimore janë alarmuar, ndërsa tregjet botërore të naftës janë tronditur. Ndërkohë, Presidenti amerikan, Xhorxh Bush, ka akuzuar Rusinë për një reagim të ekzagjeruar, ndërsa Bashkimi Evropian i ka kërkuar Moskës të ndalë aktivitetin ushtarak në Gjeorgji. Kremlini refuzoi armëpushimin e propozuar nga Gjeorgjia, dy ditë më parë, duke thënë se informacionet në terren tregonin se Tbilisi po vazhdonte luftimet. "Gjeorgjia vazhdon të përdorë forcën ndaj ne nuk mund ta marrim në konsideratë këtë propozim", tha një zëdhënës i Kremlinit. Konflikti i ethshëm mes Rusisë dhe fqinjit të saj të vogël, shpërtheu të enjten e shkuar, kur Gjeorgjia dërgoi papritur forcat për të rimarrë kontrollin e Osetisë Jugore, një provincë pro-ruse, që u nda nga territori gjeorgjian në vitet ‘90. Moska u përgjigj me një kundërsulm të ushtrisë së saj të madhe e të fuqishme, që nxorën trupat gjeorgjiane jashtë kryeqytetit të shkatërruar të Osetisë së Jugut, Tskhinvali. Rusia thotë se më shumë se 2 mijë njerëz janë vrarë në luftime dhe mijëra të tjerë kanë mbetur pa strehë, por shifrat nuk mund të verifikohen nga burime të pavarura. Gratë dhe fëmijët mbushën rrugët e Tskhinvalit dje, duke parë shkatërrimin e bombave gjeorgjiane, ndërsa trupat ruse shpërndanë ujë dhe ushqime. Por, Rusia dhe Gjeorgjia u angazhuan edhe në një luftë të ashpër deklaratash dje, me pretendime e kundërpretendime, si edhe me një numër faktesh të paverifikueshme për momentin. Sakashvili u tha gazetarëve se Rusia donte të zëvendësonte qeverinë e Tbilisit dhe pretendoi se Moska po kërkonte të merrte kontrollin e trajektoreve të energjisë në rajon. Trupat ruse kanë hyrë në Gjeorgji nga rajoni separatist i Abkhazisë, ndërsa konflikti mes dy vendeve fqinje duket se po zgjerohet. Moska ka deklaruar se ka kryer ndërkohë një sulm mbi qytetin Senaki, për të ndaluar Gjeorgjinë të sulmojë forcat ruse në Osetinë Jugore. Zyrtarët gjeorgjianë thanë se trupat ruse kanë marrë qytetin e Gorit, në Gjeorgjinë qendrore. Ndërsa luftimet vazhdojnë, të dërguarit e huaj po përpiqen të arrijnë një armëpushim. Është hera e parë që Rusia pohon se ka avancuar përtej kufijve të Abkhazisë, duke thënë se ka kryer një operacion në qytetin Senaki. Një zyrtar i mbrojtjes i tha agjencisë së lajmeve Interfax, se lëvizja kishte si qëllim të ndalojë trupat gjeorgjiane të bombardojnë Osetinë Jugore dhe të pengojë po ashtu edhe rigrupimin e trupave. Zyrtarët gjeorgjianë gjithashtu akuzuan trupat ruse se po lëviznin edhe drejt qytetit Zugdidi. Rusët u dhanë ultimatum trupave gjeorgjiane të çarmatosen, ose përndryshe do të sulmoheshin dhe vazhduan të merrnin godinat qeveritare atje, thanë gjeorgjianët. Rusia tha se ajo i kishte shtuar trupat e saj në Abkhazi mbi nivelet normale, duke dislokuar më shumë se 9 mijë paratrupa dhe 350 tanke, në mënyrë që të evitohet përsëritja e një situate të njëjtë me atë të paqeruajtësve rusë në Tskhinvali. Për më tepër, Moska vendosi akoma më shumë trupa dhe mjete të blinduara përgjatë kufirit të saj jugor, në Osetinë veriore. Një reporter i agjencisë së lajmeve Reuters, tha se tanke T-72 dhe raketahedhës "Uragan" ishin vendosur përgjatë tërë rrugës mes Rusisë dhe Tskhinvalit, ndërsa autokolonat e ushtrisë i drejtoheshin jugut. Gjeorgjia bombardoi Tskhinvalin herët në mëngjes, pavarësisht se të dielën kishte shpallur armëpushimin dhe Tbilisi tha se avionët rusë kishin bombarduar gjatë natës shënjestra gjeorgjiane. Rusia pranoi ndërkohë se kishte humbur katër avionë ushtarakë dhe 18 ushtarë që nga fillimi i luftimeve. 14 të tjerë kishin humbur në aksion dhe 52 ishin plagosur. Por, gjeneral-koloneli rus, Anatoli Nogovitsin, hodhi poshtë pretendimet gjeorgjiane se rreth 50 avionë ushtarakë rusë kishin bombarduar Gjeorgjinë gjatë natës. E ndërsa Gjeorgjia akuzon Rusinë se ka marrë edhe qytetin e Gorit në Gjeorgjinë qendrore, zyrtarët gjeorgjianë të mbrojtjes thonë se trupat ushtarake po tërhiqen për të mbrojtur Tbilisin. Kryeministri Vladimir Putin, që ka luajtur një rol kyç në këtë krizë, sulmoi Shtetet e Bashkuara për ndihmën që i dhanë Gjeorgjisë, për kthimin në shtëpi të trupave nga Iraku dhe tha se Perëndimi po gabohej në gjykimin e tij e po ngatërronte agresorët me viktimat në këtë konflikt, një referim ky ndaj mbështetjes së fortë për Gjeorgjinë dhe kritikat ndaj Moskës. "Shkalla e cinizmit është e habitshme", tha Putin në një mbledhje të qeverisë. "Përpjekja për ta kthyer të bardhën në të zezë dhe të zezën në të bardhë, si edhe për të portretizuar si viktima të agresionit vetë agresorët, është me të vërtetë e pakuptueshme". Pavarësisht apeleve ndërkombëtare për paqe, të dyja palët vazhduan të luftonin dje. Ministri i Jashtëm francez, Bernard Kushner, vendi i të cilit mban Presidencën e radhës së BE-së, u takua me Sakashvilin në një mision për dhënien fund të luftimeve. Pas Tbilisit, ai iu drejtua Moskës. Pas takimit me Sakashvilin, Kushner tha se "një tërheqje e kontrolluar trupash" ishte prioriteti kryesor i tij. Një burim qeveritar gjeorgjian, tha ndërkohë se 130 civilë gjeorgjianë dhe personel ushtarak, ishin vrarë në luftime, ndërsa 1165 të tjerë ishin plagosur si pasojë e bombave ruse brenda Gjeorgjisë. Rusia, ka mohuar ndërkaq marrjen në shënjestër të objektivave civile.

Fuqia në shifra

Gjeorgjia

Personel ushtarak: 26900

Tanke beteje (T-72): 82

Automjete të blinduara: 139

Avionë luftarakë (Su-25): 7

Artileri e rëndë (përfshirë raketahedhësit Grad): 95

Rusia

Personel ushtarak: 641 000

Tanke beteje (të tipave të ndryshme): 6 717

Automjete të blinduara: 6 388

Avionë luftarakë (të tipave të ndryshëm): 1 206

Artileri e rëndë (të tipave të ndryshëm): 7 550

Artikullin origjinal mund ta lexoni ketu

lajme.parajsa.com