Njoftohet se deri në 8,500 vetë mund të kenë vdekur nga një tërmet i fuqishëm në jugperëndim të Kinës.
Tërmeti kishte fuqi 7.8 ballë sipas shkallës Richter në provincën Sichuan në jugperëndim të Kinës.

Mendohet se në rajonin e Bechuanit janë lënduar rreth 10 mijë vetë.

Tërmeti njoftohet se ishte më i fuqishmi që ka goditur provincën Sichuan gjatë 30 vjetëve të fundit.

Ushtarë dhe helikopterë janë dërguar në rajon për të ndihmuar me operacionet e shpëtimit.

Tërmet i fuqishëm

Ndërkohë më herët u njoftua se rreth 900 nxënës kanë mbetur nën rrënojat e një shkolle që u shemb gjatë tërmetit.

Presidenti Hu Jintao bëri thirrje për përpjekje "të gjithanshme" për të shpëtuar të mbijetuarit.

Ai goditi 92 km larg nga Chengdu, qendra e provincës Sichuan.

Kryeministri Wen Jiabao ka udhëtuar drejt zonës ku janë dërguar dhe trupa të ushtrisë për të ndihmuar të prekurit.

Operacione shpëtimi

Nuk janë të qarta hollësitë e incidentit ku janë të përfshirë 900 nxënësit.

Ata mbetën nën rrënojat e ndërtesës në shkollën e mesme Juyuan në qytetit Dujiangzan, rreth 100 km nga epiqendra e tërmetit në provincën Wenchuan, njofton agjensia zyrtare e lajmeve Xinhua.

Më herët u njoftua vdekja e katër fëmijëve dhe lëndimi i mbi 100 të tjerëve gjatë rrëzimit të ndërtesave shkollave fillore në në zonën Chongqing pranë Sichuanit, shton agjensia.

Një korrespondent i BBC-së thotë se ushtria kineze ka përvojë pozitive në mobilizimin e trupave të saj dhe në evakuimin e të rrezikuarve.