Parti (party) megjithë krizën. Klubi nobel moskovit  „The Most“ i ofron shtresës së lartë edhe në kohë të këqija dëfrim për ta zhvendosur vëmendjen nga tregjet e aksioneve.  Në fakt super të pasurit e Rusisë supozohet të kenë humbur rreth 230 miliardë dollarë nga kriza botërore financiare. Nga kreshi i bursës edhe oligarkët si njeriu dikur më i pasur i Rusisë, Oleg Deripaska, kanë humbur shumë. Por kjo nuk ndikon aspak në atmosferën e klubit, i cili është si gjithmonë plot. Në pistën e vallëzimit rinia e praruar (Jeunesse dorée) feston e gëzuar deri herët në mëngjez. Vetëm shandani i kristaltë mbi kokat e tyre ka kushtuar 1,2 milionë dollarë. 

„The Most“ madje para kohësh bëri ftesë për një parti kundër krizës, në kujtim të bankës së rrënuar amerikane Lehman Brothers. "Tek ne kanë ardhur shumë bankierë, që megjithë humbjet e mëdha dhe insolvencat kanë ditur ta vlerësojnë humorin dhe ironinë tonë, me të cilat kemi tematizuar problemet e ekonomisë botërore." Festohet rrënimi, tregon drejtori i klubit, Sergej Paramonov. Deri në 5000 euro kushton reverzimi i një tavoline. Cokteji kushton 19 euro, kuptohet për gotën e vogël. Fundja jeta vazhdon, thotë Paramonov. Edhe Ana Barinova, kryeredaktore e gazetës ruse "Madame Figaro" nuk pret, që festimet të marrin fund.  „Jeta e natës në Moskë nuk do të jetë më kaq e gjerë, por sigurisht do të vazhdohet të festohet. Me ata që kanë akoma para dhe duan të argëtohen.“

Nuk ka shenja paniku - Shifrat e blerjes së makinave luksoze të pandryshueshme

Revista "Madame Figaro", numri i dhjetorit, i së cilës do të shkojë në mbrëmje në shtyp. Kryeredaktorja Ana Barinova diskuton për hollësitë e fundit. Edhe kësaj rradhe Madame Figaro vazhdon të prezantojë artikuj shumë të shtrenjë luksi. Sepse të pasurit e Rusisë vazhdojnë të blejnë, mendon Barinova, dhe jo vetëm në Moskë, por edhe në Paris dhe Milano. Shifrat e blerjes së makinave luksoze si Bentley janë të pandryshueshme, pra nuk ka shenja paniku tek super të pasurit e Rusisë. Përvojat e krizës së rublës të vitit 1998 u kanë treguar të gjithëve se edhe në kohë të vështira punët marrin rrugë të mbarë. Shumëkush i ka kuptuar turbullirat e momentit si stuhi, që pastron gjithçka, thotë Barinova: “Kur ka tensione ekonomike, atëherë preket më së shumti shtresa e mesme. Disa ngjiten më lart, disa bien në shtresat e ulëta. Por fare lart do të vazhdojnë të konsumohen artikuj luksi."

Vetëm se pretendimet do të shtohen edhe më. Kush shpenzon para në kohë krizash, ai kërkon edhe cilësi të lartë.  Atë do ta ofrojë stilistja me famë Helen Yarmak. Peliçet e saj prej shqarthi janë unikale. Në dyqanet e saj në Moskë, Nju Jork dhe Milano hyjnë dhe dalin të dhjetëmijë vetët e shtresës së lartë. Jannet Jackson ka blerë tek ajo, Melanie Griffith gjithashtu – dhe super të pasurit e Rusisë. Çmimet vendosen në bazë të kërkesës. Por megjithë krizën blerja shkon mirë. Stilistja është e bindur, se megjithë lajmet e këqija njerëzit kërkojnë një peliçe prej shqarthi të vertetë, vlera e së cilës nuk bie aq lehtë sa kurset e bursës. „Ky është një investim i rëndësishëm. Dhe ata që i kanë investuar deri tani të hollat më mirë në aksione se sa në një shqarth të rrallë, pendohen shumë dhe bëjnë tani atë, që nuk e kanë bërë me kohë.“

Në klubin „The Most“ parti vazhdon si më parë, pavarësisht, nëse bursat e Moskës rrëzohen, apo çmimi i naftës bie. Atij që ka rezerva të mjafta, nuk duhet t´i mungojë asgjë as në kohë të vështira.