Obama: Plani im per Irakun

17.07.2008 21:44 Bota - Burimi: SHQIP Bota

Thirrja nga Kryeministrit Nuri Kamal al-Maliki për një
orar të tërheqjes së trupave amerikane nga Iraku
paraqet një mundësi të madhe. Ne duhet të shfrytëzojmë
këtë moment për fillimin e tërheqjes së trupave ushtarake
me faza, gjë që e kam përkrahur prej një kohe të gjatë
dhe që është e duhur, si për një sukses afatgjatë në Irak, ashtu
edhe për interesat e sigurisë së SHBA-së. Mospajtimet mbi
Irakun në këtë fushatë janë të thella. Ndryshe nga senatori
John McCain, unë kam kundërshtuar luftën në Irak para se
të fillonte, dhe do t‘i japë fund si President. Besoja se ishte
gabim i madh të lejonim veten të heqim vëmendjen nga lufta
kundër Al-Qaedas dhe Talibanit, duke pushtuar një shtet që
nuk shfaqte ndonjë rrezik të menjëhershëm dhe nuk kishte
asgjë të bënte me sulmet e 11 shtatorit.
Që nga fillimi kanë vdekur më shumë se 4 mijë amerikanë
dhe kemi shpenzuar afro 1 trilion dollarë. Ushtria jonë
është tejet e tendosur. Pothuajse çdo kërcënim me të cilin
përballemi, nga Afganistani e deri te Al-Qaeda në Iran, është
rritur. Në 18 muajt, që nga nisja e strategjisë kundër kryengritësve
nga Presidenti Bush, ushtarët tanë kanë punuar
heroikisht në uljen e nivelit të dhunës. Taktikat e reja kanë
mbrojtur popullatën e Irakut dhe fiset sunite kanë refuzuar
Al-Qaedan. Por, faktorët e njëjtë, të cilët më bënë të kundërshtoj
sulmin, ende mbesin të vërtetë. Barra mbi ushtrinë
tonë është rritur, situata në Afganistan është përkeqësuar
dhe kemi shpenzuar 200 miliardë dollarë më shumë në Irak
sesa kishim në buxhet.
Udhëheqësit e Irakut kanë dështuar të investojnë dhjetëra
miliardë dollarë nga të ardhurat e naftës për rindërtimin e
shtetit të tyre dhe nuk e kanë arritur ujdinë politike, që ishte
qëllimi i deklaruar i sulmit. Lajmet e mira janë se
udhëheqësit e Irakut duan të marrin përgjegjësi mbi shtetin
e tyre, duke biseduar për një orar të tërheqjes së trupave
amerikane. Ndërkohë, gjenerali James Dubik, zyrtari amerikan
me detyrë trajnimin e forcave irakiane të sigurisë, vlerëson
se ushtria dhe policia e Irakut do të jenë të gatshme të
marrin përgjegjësitë e sigurisë në vitin 2009. Vetëm me zhvendosjen
e ushtrisë sonë ne mund të shtymë irakianët të
arrijnë një marrëveshje politike të plotë dhe të arrijmë tranzicionin
e suksesshëm të dhënies së përgjegjësive të sigurisë
e stabilitetit në duart e vetë atyre. Në vend që të shfrytëzojnë
momentin dhe të inkurajojnë irakianët të veprojnë, administrata
e Bush dhe senatori McCain po refuzojnë të kapin këtë
tranzicion, pavarësisht nga premtimet e tyre të mëparshme
se do të respektojnë vullnetin e qeverisë sovrane të Irakut.
Ata e quajnë "dorëzim" çfarëdo orari për tërheqjen e trupave
amerikane, edhe pse Irakun do t‘ia jepnim një qeverie
sovrane irakiane. Por, kjo nuk është një strategji për sukses,
është strategji për të qëndruar dhe shkon kundër vullnetit
të popullit të Irakut, popullit amerikan dhe interesave të sigurisë
së SHBA-së. Ja pse, në ditën time të parë si President i
SHBA-së, do t‘i jepja ushtrisë një mision të ri: t‘i japë fund
kësaj lufte. Ashtu siç kam thënë shumë herë, duhet të jemi
aq të kujdesshëm duke dalë nga Iraku sa ishim të pakujdesshëm
kur hymë. Mund të zhvendosim brigadat tona
luftarake, me një ritëm që do t‘i zhvendoste ata brenda 16
muajve. Kjo do të ishte vera e vitit 2010. Pas kësaj zhvendosjeje,
një forcë e mbetur në Irak do të kryejë misione të
kufizuara: përndjekjen e të mbeturve të Al-Qaedas në Mesopotami,
mbrojtjen e antarëve amerikanë të. Kjo nuk do të
ishte një tërheqje e thiktë. Për të zbatuar këtë strategji, pashmangshëm
duhet të bëjmë përshtatje taktike. Ashtu siç
kam thënë shpesh, do të konsultohem me komandantët në
terren dhe me Qeverinë e Irakut për të siguruar se ushtarët
tanë tërhiqen pa rrezik dhe interesat tona janë të mbrojtura.
Ne do t‘i lëviznim së pari nga rajonet e sigurta, e pastaj nga
rajonet jo stabile. Do të ndjekim një ofensivë diplomatike së
bashku me secilin shtet në rajon, për hir të stabilitetit të Irakut
dhe do t‘i përkushtojmë 2 miliardë dollarë për përkrahjen
ndërkombëtare refugjatëve të Irakut.
Përfundimi i luftës është thelbësor për të arritur qëllimet
tona më të gjera strategjike, duke filluar në Afganistan dhe
Pakistan, ku Talibani po rigjallërohet dhe Al-Qaeda ka një
vend të sigurt. Iraku nuk është fronti qendror në luftën
kundër terrorizmit dhe kurrë nuk ka qenë. Si President, do
të ndjekja një strategji të re dhe do të filloja duke shtuar së
paku edhe dy brigada luftarake shtesë për të përkrahur përpjekjet
tona në Afganistan. Kemi nevojë për më shumë ushtarë,
helikopterë, mbledhje më të mirë të informatave dhe
më shumë ndihma jo ushtarake për të kryer misionin atje.
Nuk do ta mbaj peng ushtrinë tonë, burimet tona dhe politikën
tonë të jashtme, për shkak të një dëshire të gabuar që
të mbahen baza të përjetshme në Irak. Në këtë fushatë ka
dallime të sinqerta rreth Irakut dhe duhet t‘i bisedojmë me
ndërgjegje, ashtu siç e meritojnë. Ndryshe nga senatori
McCain, do ta bëja absolutisht të qartë se nuk duam një prani
në Irak, të ngjashme me bazat tona në Korenë Jugore, dhe
do t‘i zhvendosja ushtarët tanë nga Iraku dhe do ta veja
përqendrimin në sfidat më të gjera të sigurisë me të cilat
ballafaqohemi. Por, për një kohë të gjatë, ata të cilët janë të
përgjegjshëm për gabimin më të madh strategjik në historinë
e re të politikës së jashtme të Amerikës, kanë shpërfillur debate
me vlerë në favor të akuzave false rreth papuçeve dhe
dorëzimit. Nuk do të funksionojë këtë herë. Është koha t‘i
jepet fund kësaj lufte.

Artikullin origjinal mund ta lexoni ketu

lajme.parajsa.com