Ruanda akuzon Francën për gjenocid

06.08.2008 18:13 Bota - Burimi: SHQIP Bota

Ruanda ka akuzuar Francën se po luan një rol aktiv në gjenocidin e 1994-ës, në të cilin rreth 800 mijë njerëz mbetën të vrarë. Një komision i pavarur ruandez tha se Franca ishte në dijeni të përgatitjeve të gjenocidit dhe kishte ndihmuar në trajnimin e milicive etnike hutu, që ishin ekzekutues mizorë. Raporti akuzon gjithashtu trupat franceze për përfshirje direkte në vrasje. Ai përmend 33 figura të larta të ushtrisë dhe figurave politike që, sipas tij, duhen nxjerrë para drejtësisë. Franca më herët ka mohuar përgjegjësi të tilla. Mes emrave të përmendur në raport është edhe ai i ish-kryeministrit francez, Domenik de Villepin, dhe presidentit të ndjerë, Fransua Miterran. Ministria e Jashtme franceze tha për BBC-në se ajo do t‘u përgjigjej akuzave pasi të lexonte më parë raportin që është botuar të martën pasdite. Në fillim të këtij viti, ministri i Jashtëm francez, Bernard Kushner, mohoi përgjegjësinë e Francës në këtë gjenocid, por tha se gabime politike ishin bërë. Rreth 800 mijë pjesëtarë të minoritetit tutsis dhe moderatorë hutu u masakruan nga milicitë hutu brenda 100 ditëve në 1994-ën. Korrespondentët në Ruanda thonë se komisioni i posaçëm ka kaluar rreth dy vite, duke hetuar për rolin e supozuar të Francës në këtë gjenocid. Ai ka dëgjuar dëshmi nga të mbijetuar të gjenocidit, kërkues, shkrimtarë dhe gazetarë. Dokumenti me 500 faqe i është prezantuar qeverisë së Ruandës nëntorin e shkuar, por nuk ishte bërë publik deri më tani. Ruanda në mënyrë të vazhdueshme ka akuzuar Francën se po armatos dhe trajnon milicitë hutu, që kanë kryer gjenocidin dhe nuk po bashkëpunon me hetimin që pasoi. Raporti thekson se operacioni humanitar dhe ushtarak, "Turquoise", i kryer nga Franca në Ruandë, mes qershorit dhe gushtit 1994, kishte ndihmuar vrasjet e kryera nga milicitë ekstremiste hutu.

Franca pretendon se forcat e saj kishin ndihmuar në mbrojtjen e civilëve gjatë një misioni të sanksionuar nga Kombet e Bashkuara, në Ruandë, në vitin ‘94. Dy vendet kanë pasur marrëdhënie të acarta që nga 2006-ta, kur një gjykatës francez implikoi Presidentin ruandez, Pol Kagame, në rrëzimin e avionit me të cilin udhëtonte Presidenti i atëhershëm i Ruandës, Juvenal Habayrimana, në 1994-ën, një ngjarje kjo që konsiderohet se nxiti vrasjet. Presidenti Kagame ka mohuar gjithnjë akuzat. Ai thotë se Habyarimana, një hutu, ishte vrarë nga vetë ekstremistët hutu, që fajësonin atëherë për aksidentin rebelët tutsi, duke krijuar kështu një pretekst për kryerjen e gjenocidit, ku humbën jetën më shumë se 800 vetë.

Artikullin origjinal mund ta lexoni ketu

lajme.parajsa.com