Rusët marrin kryeqytetin e Osetisë Jugore

11.08.2008 15:05 Bota - Burimi: SHQIP Bota

Trupat ruse kanë marrë kontrollin e kryeqytetit të rajonit separatist të Gjeorgjisë, Osetisë Jugore, të dielën, pas një beteje treditore, ndërsa forcat gjeorgjiane u tërhoqën dhe qeveria e Tbilisit kërkoi armëpushim dhe bisedime. Shtetet e Bashkuara të Amerikës paralajmëruan Moskën se çdo aksion i mëtejshëm ushtarak në Gjeorgji do të kishte pasoja domethënëse dhe afatgjata në marrëdhëniet midis tyre. SHBA i kërkoi Rusisë dhe Gjeorgjisë që të ndalnin armët dhe të ktheheshin në pozicionet e tyre të para konfliktit. Ministria e Jashtme gjeorgjiane tha se i kishte thënë Rusisë se Gjeorgjia ishte e gatshme për të filluar negociatat për një armëpushim dhe për t‘i dhënë fund luftimeve. Por reagimi rus nuk ishte i menjëhershëm. Rusia ka vendosur trupat dhe tanket e saj në kufijtë jugorë të saj, në territorin gjeorgjian, dhe ka bombarduar shënjestra gjeorgjiane që pasi Tbilisi tentoi të enjten mbrëma të rimerrte kontrollin në Osetinë Jugore, provincën e vogël proruse që u nda nga Gjeorgjia në vitet ‘90. Kriza ka alarmuar Shtetet e Bashkuara të Amerikës, aleatin kryesor të Gjeorgjisë, dhe ka nervozuar investitorët në Rusi që filluan shitjen e aksioneve të tyre për shkak të shqetësimeve se konflikti mund të zgjaste. Perëndimi po përpiqet që të rivalizojë Rusinë në lidhje me trajektoret e gazit dhe naftës në rajon dhe Rusia është e pakënaqur me politikat properëndimore të Gjeorgjisë dhe ambicien e saj për anëtarësim në NATO. Gjeorgjia dhe Rusia kanë akuzuar njëra-tjetrën se po shkaktojnë viktima mes civilëve që nga fillimi i luftimeve. Televizioni shtetëror rus, në vazhdimësi flet për një katastrofë humanitare në Osetinë e Jugut, pas sulmeve gjeorgjiane, me më shumë se 2 mijë të vdekur dhe me mijëra të pastrehë. Një burim nga qeveria gjeorgjiane tha ndërkohë se 129 civilë dhe ushtarë gjeorgjianë ishin vrarë ndërsa 748 të tjerë ishin plagosur, pjesa më e madhe e të cilëve si pasojë e bombave ruse mbi Gjeorgji. Rusia mohon të ketë qëlluar objektiva civile. Duke lëvizur në jug, nga malet në Kaukaz, forcat ruse morën të dielën kontrollin e pjesës më të madhe të Tskhinvalit, kryeqytetit të Osetisë së Jugut, që dukshëm është shkatërruar nga luftimet intensive. Komandanti i ushtrisë ruse, në terren, gjenerali Anatoli Khruliov, është plagosur nga një predhë kur autokolona me të cilën udhëtonte u vu nën zjarrin gjeorgjian, raportuan agjencitë e lajmeve. "Nga sot, pjesa më e madhe e Tskhinvalit kontrollohet nga forca paqeruajtëse ruse", tha gjeneral-koloneli Anatoli Nogovitsin i Shtabit Qendror të ushtrisë ruse. Gjeorgjia, në anën tjetër, konfirmoi se forcat e saj po largoheshin nga qyteti. I parë nga qyteti i Gorit, brenda territorit të kontrolluar nga Gjeorgjia, Tskhinvali duket i qetë. Korrespondentët ndërkohë raportuan se kishin dëgjuar vetëm një shpërthim që ngjasonte me zjarr artilerie, ndërsa kishte edhe raportime për zjarr të izoluar snajperësh. Shtëpia e Bardhë kritikoi veprimet e Rusisë, që goditi me artileri edhe të paktën tri shënjestra gjeorgjiane jashtë Osetisë së Jugut. "Ne dënojmë aksionet e rrezikshme dhe të ekzagjeruara të forcave ruse dhe jemi veçanërisht të shqetësuar. Duam që këto sulme të ndalen, pasi forcat gjeorgjiane po tërhiqen", tha zëvendëskëshilltari për sigurinë kombëtare i Presidentit Bush, Xhejms Xhefri. Edhe Papa Benedikti ka bërë thirrje për ndaljen e menjëhershme të luftimeve, duke shprehur dëshpërim të thellë për viktimat e shumta civile. Televizionet ruse ndërkohë treguan pamje të godinave të djegura të Tskhinvalit, të civilëve të plagosur që merrnin ndihmë mjekësore, të nënave që qanin për shkak të mungesës së ushqimeve dhe ujit. Por e njëjta panoramë shihej edhe në qytetet e goditura gjeorgjiane. Kryeministri rus, Vladimir Putin, ndërpreu vizitën e tij në Kinë dhe mbërriti të shtunën në mbrëmje në një spital fushor në Osetinë Veriore, ku vizitoi trupat e plagosura dhe të evakuuarit. Ai denoncoi atë që e quajti, "krim të Gjeorgjisë kundër njerëzve të saj".

Artikullin origjinal mund ta lexoni ketu

lajme.parajsa.com