-Sapo ka përfunduar spektakli i humorit “Portokalli” e ndjeni mungesën e tij?
Jemi mësuar me këtë ritëm pune, kështu që nuk na bën më përshtypje sepse e dimë që tre muaj punojmë dhe tre muaj të tjerë përgatitemi për tu shfaqur sa më mirë në ekran. Kështu që sezoni i pushimeve nga njëra anë është shumë i nevojshëm, sepse rimerr energji te reja dhe te le kohe gjithashtu te mendosh për diçka tjetër, ndërkohë që kur je në punë rutina e përditshme, sidomos aty ku ka nj ritëm shumë të madh pune dhe java zë javën shumë shpejt, nuk arrin të mendosh për gjëra të tjera, që mbase janë shumë të rëndësishme.

-Çfarë ju lidh më shumë me spektaklin?
Mund të them që më lidh më shumë koha e gjate që kam kaluar në botën e artit qoftë si balerinë më parë qoftë tani si prezantuese, sepse unë daljet e para në skenë i kam kaluar që në klasën e pestë kur kam hyre në shkollën e baletit. Jam rritur në botën e artit dhe për mua skena në çfarë do lloj zhanri do të më mungojë nëse nuk do të jem pjesë e saj (gjë që është normale që do ndodhë një ditë).

-Cila ka qenë batuta që ju ka ngelur në mendje nga “Portokallia”?
Aaa...,këto nuk i përcaktoj dhe nuk i ndaj dot sepse ka shumë të tilla në atë spektakël, pasi secili prej personazheve ka karakteristikat dhe zhargonin e tij të të folurit ku ka padyshim edhe batuta interesante, e që të bëjnë për të qeshur.

-Momentet më të bukura të spektaklit?
Ka plot të tilla në këto vite eksperience, por unë përpos situatave të krijuara gjatë prezantimit do veçoja momentet kur kam kërcyer. Ndjehesh një figurë e realizuar kur ti si prezantuese e spektaklit vjen ndryshe. Plus pastaj që unë e kam nostalgjinë time të vjetër baletin, dhe sa herë që dal në skene duke kërcyer gjej një kënaqësi ndryshe nga prezantimi.

-E ndjetë mungesën e Ermalit në spektakël ?
Patjetër që e ndjeva, më kujtoheshin momentet kur pinim kafe,kur iknim bashkë në punë, kur nxitonim për në punë, ose uleshim gjatë bashkë gjatë provave. Por megjithatë edhe shkëputja e ka anën e mirë, të paktën ne kështu kemi dashur ta shohim. Duke qenë se ne edhe në “Portokalli” ishim gjithë kohës bashkë, dhe në biznes po bashkë i binte që ne te rrinim bashkë tërë kohës. Shkëputja e Ermalit nga “Portokallia” ne planin personal ka anën e saj të mirë sepse na merrte malli më shumë për njëri - tjetrin.

-Në këtë sezon veror me çfarë po merreni?
Tani po merrem totalisht me biznesin tone, me agjencinë “Ami Special Events”. Është sezon shume voluminoz dhe ipenjativ për ne ndaj dhe po mundohemi qe te kemi shërbimin dhe cilësinë maksimale për klientët tanë. Ne i përgjigjemi klientit me të gjitha shërbimet që ai kërkon dhe jo vetëm për dasma, por për të gjitha llojet e eventeve dhe aktiviteteve për individë dhe institucione. Të gjitha shërbimet, duke filluar nga restoranti, kameramani,fotografi, muzika, fustani, kostumi,fustane mbrëmjesh, balerinat,dekorimi i ambienteve ,katering,makina me qira,etj,janë shërbime për të cilat klienti ka komoditetin ti gjejë në agjencinë tonë, duke marrë një informacion të detajuar për to. Ne jemi koordinatorë të ditës më të bukur të klientëve tanë. Gjëja më e mirë është se këtu çdo njeri gjen veten sipas buxhetit që ka. Ka çmime të ndryshme, sipas buxhetit dhe preferencave që kane klientët.

-Sa e vështirë ka qenë për ju të merreni me biznes. Dhe cili ka qenë roli i spektaklit në biznesin tuja?
Spektakli dhe televizioni na kanë dhënë imazhin, gjë që ndihmon shumë në nxitjen e biznesit dhe në përhapjen e një emri të mirë, por të jesh i dashur për publikun. Nuk e mohoj që ka edhe raste kur klientët vijnë këtu të shtyrë nga imazhi jonë dhe mjaftohen duke lënë vetëm datën e aktivitetit të tyre për të qenë ne më pas ata që do të merren me të gjitha detajet e festës së tyre..Pas disa viteve eksperience që Ermali me të vëllain kanë pasur në fushën e muzikës si D.J erdhi momenti që ne të institucionalizoheshin dhe të merrnim një licensë për organizmin e eventeve, gjë që ne e kemi me shumë qejf sepse është gjithmonë një punë në lëvizje është një punë krijuese, e cila nuk le vend asnjëherë monotoni.

-Si ndikon imazhi juaj në biznesin që keni ngritur?
Patjetër që imazhi ka rolin e tij në biznes. Po të shohim të gjitha firmat prestigjioze që nuk do të kishin fare nevojë për reklamë, vënë në qendër të tyre imazhe të kërkuara nga publiku. Ky është një parim botëror që nuk e shmangim dot dhe ne duke qenë se jemi të dy persona publike, pse jo mos ta shfrytëzonim imazhin tonë në një biznes që është e ardhmja jonë. Mendoj se nëse do të bënim ndryshe do të ishim treguar shumë naivë Mbi të gjitha theksoj se imazhi tërheq, por ajo që mban në jetëgjatësi biznesin është fjala e mirë që përhapin klientët dhe se sa të kënaqur mbeten ata pas realizimit të eventit të tyre.

-Hasni vështirësi në biznesin tuaj?
Vështirësitë që hasim është vetëm nëse ne nuk jemi prezent këtu, pasi ne duhet që të jemi gjithmonë sepse është biznesi ynë dhe çdo gjë duhet ta kurosh vetë ashtu siç e ke ideuar ashtu siç e mendon, pra vështirësia më e madhe qëndron kur ne nuk jemi këtu. Tani që jemi pa angazhime të dy në punë të tjera, jemi më të qetë dhe gjërat shkojnë mirë kur je vetë i pranishëm në krijesën tënde që e sheh të rritet çdo ditë.

-Çmendoni për profesionin tuaj si psikologe?
Ajo që unë kam marrë është një pasaportë e sigurt për të ardhmen, ndërsa për momentin unë nuk jam e angazhuar në këtë fushë. Ne kemi ngritur një biznes që do të jetë e ardhmja jonë, ndërsa profesionin si psikologe e shosh si një pasaportë të së ardhmes dhe i jam mirënjohëse fakulteti për bagazhin që më ka dhënë.. Për momentin jam e fokusuar në biznesin tonë dhe punën sezonale te Top.

-E ndiqni kampionatin Evropian të futbollit dhe për kë skuadër jeni tifoze?
Unë jam me Brazilin në kampionatin botëror të futbollit, por në kampionatin Evropian jam me skuadrën e Holandës, Është përfaqësuar shumë mirë, ka goxha klas në futbollin që bën dhe uroj që ta fitojë. Ndeshjet i shikoj me shoqërinë dhe mblidhemi çdo darkë për të parë ndeshjet në lokal me të gjithë miqtë tanë. Në çdo ndeshje ne organizojmë diçka me miqtë tanë ose mund të vëmë ndonjë bast të vogël, por vetëm mes nesh ama....

-Jemi në sezonin veror ku keni ndërmend ti kaloni pushimet?
Ne kemi planifikuar diçka nga shtatori dhe i kemi thënë stop prenotimeve tona për ato data, por akoma jemi në dilemë për vendin ku do të shkojmë. Pushimet tona do të jenë në shtator sepse muajt e tjerë nuk bëhet fjalë që të largohemi. Gjatë kësaj periudhe të nxehtë mund të bëjmë vetëm lëvizje 2-3 ditore.

-Si shpenzon Ami kohën e lirë?
atë kohë të lirë që kam e kaloj në kinema darkave vone, Ermali i ka shumë qejf filmat , po ashtu dhe miqtë tanë me te cilët shoqërohemi me shpesh. Unë nuk është se jam shumë e dhënë pas filmave, sepse gjithmonë kam qenë e tërhequr pas spektakleve në televizion megjithatë, për te ndjekur filmat e rinj nuk them asnjëherë jo.

-Jeni cilësuar si një nga femrat më të bukura shqiptare. Si ndiheni nga ky vlerësim?
Ndjesh mirë kur të tjerët të vlerësojnë, edhe pse unë nuk jam shumë entuziaste, për sa i përket vlerësimeve te pamjes së jashtme. Mbase jam mësuar duke qene e tille dhe tashme me duket shume normale kjo gjë. Deri diku nga mosha 22 vjeçare të gëzon ky fakt, ndërkohë me kalimin e viteve ka shumë gjëra të tjera më të rëndësishme që duhet të të bëjnë të jesh në qendër të vëmendjes.

-Çfarë natyre jeni?
Jam natyrë shumë paqësore dhe dashur. Nuk jam tip konfliktual dhe i urrej konfliktet. Nuk krijoj afrimitet të menjëhershëm me njerëzit Më pëlqen që të shoh dëshirën e të tjerëve për tu afruar dhe për të kaluar pak kohë me mua, pastaj unë jap më të mirën time të mundshme me ta

-Falni kur ju bëjnë padrejtësi?
Fal dhe nganjëherë bëhem pishman që nuk jam më e vendosur në fjalën që them, pasi kur kalon koha inati me bie shpejt . Ndonjëherë më vjen inat që fal më tepër se sa duhet.

-Sa kohë i kushtoni lukut tuaj?
Zakonisht unë dal nga shtëpia në mëngjes dhe pjesën më të madhe të ditëve kthehem në darkë. Kur dal në mëngjes, normalisht si të gjitha femra bëhem gati, por jo me shpejtësi. Mëngjesin e kam pak të ngadaltë gjë që për mua është shumë e domosdoshme. Më pëlqen që ta filloj ditën me mëngjesin e qetë.

-Çfarë veshjesh preferoni gjatë aktiviteti tuaj të përditshëm?
Nuk jam tip ekstravagant, nuk jam tip i minifundeve. Më pëlqejnë gjërat femërore, por shumë të këndshme dhe serioze Nuk më pëlqejnë veshje seksi të ekzagjeruar për të nxjerrë në pah format e trupit që të tjerët të kthejnë kokën. Unë e kam bezdi, që edhe në mbrëmje dhe në festa të jem qendra e vëmendjes për veshjen.

- Shumë vajza të botës spektakleve mbajnë dietë. Ju e bëni këtë? Ç’farë hani gjatë ditës?
Jo, unë nuk mbaj dietë. Mëngjesin e filloj më corn flakes me qumësht, kos frutash ha pa mbarim, gurabije që këtë periudhë më kanë hyrë shumë në qejf. Këto i shoqëroj me kos frutash ose me qumësht. Të gjitha këto janë paradite. Nuk ha bukë, por radhë bukë të thekur. Në drekë ha pjatën e përditshme që është gatuar në shtëpi ose në restorant mund të ha spageti me domate të freskët...gjithashtu sallata me rukola dhe parmixhano me pëlqen shumë.

-Shkoni në palestër?
Për momentin nuk shkoj në ndonjë qendër fituesi, por duke qenë se kemi hapësirë të madhe në agjenci, kemi një verandë të madhe të cilën e shfrytëzojmë me disa vegla profesionale fitnesi dhe kemi vendosur orare palestre.hahaha....

-Cila është mikja juaj më e mirë?
Mikja ime më e mirë, për mua është vetja ime, sepse nuk jam tip që i ndaj shumë gjërat me të tjetër siç përmenda dhe më lart, pasi jam pak tip i rezervuar dhe i bluaj me veten time shumë gjërat dhe më pas ia them njerëzve. Këto njerëz sigurisht janë familjarët e mi dhe personi im i zemrës!

-Keni menduar që ta finalizoni me martesë lidhjen tuaj?
Na kanë pyetur shpesh për këtë gjë, por nuk kemi asgjë konkrete, për ndonjë datë e kam fjalën. Lidhja jonë do të jetë vetëm bashkëjetesë për momentin. Për dy tre muaj shpresoj që do të futemi në shtëpinë tonë të re që po e mobilojmë.

-Sa e lidhur është Ami me motrën?
Ajo është më e madhe se unë. Është e martuar dhe ka dy fëmijë të mrekullueshëm, pra unë kam një nip dhe një mbesë. Motra për mua ka qenë gjithmonë motra e madhe që më jepte këshilla që vazhdon dhe sot e kësaj dite te konsultohem me te për gjëra të ndryshme, sepse i vlerësoj shumë mendimet e saj. Nuk takohemi shumë shpesh, pasi ajo ka angazhimet e saj ashtu sikurse dhe unë, por që flasim çdo ditë në telefon.

-Dhurata më e bukur që të ka bërë Ermali?
Dhurata në vlera monetare ka plot, por unë nuk do të përmendja këto. Shumë e bukur ka qenë një surprizë që më ka bërë për ditëlindje. Unë nuk dija gjë, ndërkohë që Ermali më kishte organizuar një party me të gjithë miqtë, kolegët,shoqërinë familjarët etj. Kur shkova në lokal pashë një superfestë dhe ishte hera e parë që më bëhej kjo gjë. Këto janë gjëra që përcjellin emocion dhe të ngelin gjatë në memorie. Pastaj dhurata e tjera janë të ndryshme, por dhe janë më intime.

-Cili do të ishte arsyeja që ju do të largoheshit nga bota e spektaklit?
Mendoj se do të ishte një arsye shumë e fortë, që do të të bënte të merrje një vendim për tu larguar nga një punë që kam vite dhe me ka dhënë goxha fryte. Por mund të them se impenjimi në punët personale, private do të mund të më largonin. Nëse unë do të kem arsye më të forta që janë të rëndësishme, për jetën time dhe do të më duhet që të bëj një zgjedhje, duke marrë parasysh jetëgjatësinë projektit atëherë do të heq dorë nga spektakli. Nëse vjen kjo ditë unë besoj se do ta bëj pa ndonjë pendesë të madhe. Është një zgjedhje që do ta bëj vetë dhe do të më japi sukses në të ardhmen, në drejtimin tjetër që unë do të zgjedh.

-Shpenzoni shumë për veshje?
Nuk jam nga ato femra që shpenzoj shumë për veshje, dhe që sigurisht që nuk jam tipi i femrave që sa lekë kam do ti bëj gardërobë.

-Stilisti i preferuar?
më pëlqejnë shumë materialet dhe ngjyrat e Cavalli

-Parfumi që përdorini?
Për momentin po përdor një “Ferre Rose” dhe parfumi tjetër është “Just cavalli pink”

-Ngjyrat që preferoni në këtë stinë?
Ngjyra që preferoj më shumë ne kete sezon janë e bardha, e kuqja, e verdha dhe pink. I preferoj këto ngjyra dhe gjenden shumë në veshjet e mia.

-Thashethemet ju bezdisni?
Ka pasur një periudhë kur bezdisesha, por tani jo më. Tani çdo gjë kalohet me të qeshur dhe harrohet. Paparacët deri diku na bezdisin.