-Keni vite që jeni prezantuar në skenën shqiptare. Si këngëtar si e shikoni tregun muzikor në Shqipëri?
Mund të them se pas 18 vjetëve që jemi në periudhë tranzicioni unë përfundimisht shikoj një dritë jeshile për sa i përket rregullimit të tregut muzikor shqiptar. Këtë e mbështes pasi kohët e fundit është hapur dhe një zyrë që quhet ZSHDA pranë MTKRS dhe me sa po shikoj gjërat po vendosen në vijë të drejtë. Ndoshta duhen dhe disa muaj, por të them të drejtën jam shumë optimist.

-Pirateria ka triumfuar në tregun muzikor shqiptar. Komenti juaj për këtë?
Për hir të së vërtetës pirateria është një fjalë në një kuptim shumë më të gjerë. Nëse do të flasim për piraterinë e këngëve të huazuara po e shikoj se sa po vjen po hiqet dorë nga kjo histori. Për sa i përket piraterisë në konceptin e të kopjuarit mund të them që tregu shqiptar është në krizë. Këtë e tregojnë dhe shtëpitë diskografike të cilat nëse deri tani nuk kanë falimentuar unë e shikoj se tani ato janë drejt një falimentimi. Mendoj se kjo vjen se nuk ka një rregull të qartë loje dhe prandaj e thashë dhe më parë që jam optimist sepse me këto ligje që po vendosen do të vendoset pika mbi “i” dhe mund të them me bindje të plotë se për disa muaj dhe tregu shqiptar do të vazhdojë që të ketë rrugën e tij të zhvillimit si çdo treg në Evropë.

-Ekziston ligji për të drejtën e autorit por rezultatet e tij gjatë këtyre viteve ujk është se kanë qenë të dukshme. Nëse ky ligj do të kishte funksionuar si do të ishte tregu shqiptar muzikor sot?
Ligji për të drejtën e autorit ka qenë në një mënyrë shumë të njëanshme nuk ka qenë i plotësuar. Në momentin që është hapur kjo zyrë, me pak fjalë çdo këngë që do të dalë në tregun muzikor shqiptar do të jetë e certifikuar që do të mbajë kompozitorin, autorin e tekstit dhe interpretin. Pra do të bëhet një dosje jo për çdo album, po për çdo material që del në tregun shqiptar. Më parë ZSHDA ka funksionuar pa ndihmesat e tjera rreth e qark. Ndërsa tani mund të them se është një ligj i tëri i kompletuar ku secili ka rolin e tij dhe nuk mund të shkëputet asnjë lloj hallke. Pra tani unë them se çdo gjë do të funksionojë dhe për këtë më qartë mund të flasin dhe punonjësit e kësaj zyre.

-Cili është roli që kanë kompozitorët në këtë treg muzikor?
Mund të them se ka ardhur momenti që kompozitorët e mirëfilltë profesionistë, interpretët profesionistë dhe autorët e teksteve ka ardhur momenti që realisht ata të lëvrijnë kompozimet e tyre. Kompozitorët nuk kanë faj me atë se çfarë ndodh sot në tregun muzikor shqiptar, pasi ka qenë një lloj kaosi ku nuk kuptohej se nga vinin këngët dhe nga shkonin, ndërsa tani do të ketë një lloj përgjegjësie për çdo material që del në tregun muzikor kështu që kompozitorët do të kenë rolin e tyre kryesor në të gjithë këtë histori.

-Cilat janë masat që duhen marrë sipas jush që fenomeni i piraterisë të mos jetë kaq i përhapur?
Nuk mendoj se është çështje masash dhe në momentin që ka dalë një ligj ai duhet të zbatohet. Ata që nuk e zbatojnë duhet që të penalizohen. Pra gjërat janë fare të qarta dhe muzika i nënshtrohet një ligji si çdo gjë tjetër për sa i përket tregut shqiptar. Unë mund të them se më shumë nga këngët e mia kanë fituar piratët se sa shtëpia diskografike që unë kam punuar, pra deri në këtë masë ka qenë pirateria.

-Sa albume muzikore keni nxjerrë deri tani dhe kur do të kemi një album tjetër të ri nga ju?
Për momentin unë kam nxjerrë katër albume në treg dhe kam në dorë një album të pestë, por po pres një lloj rregulli në tregun muzikor me ligjin që ka dalë. Më pas dhe unë do të shikoj vazhdimësinë time. Por me keqardhje mund të them se për momentin unë i kam tërhequr të katër albumet nga tregu muzikor. Këtë vendim e mora sepse këtu u shkaktua një kaos që nuk po kuptohej më se ç’po bëhej. Tani unë jam në pritje të rregullave që do të vendosen që unë të hyj sërish në tregun muzikor shqiptar.

-Si e shpjegoni faktin se janë shumë emra të njohur të skenës që janë tërhequr pak nga muzika?
Besoj që me daljen e ligjit të ri ne do të kemi kohë që të dalim të shfaqemi, të rishfaqemi dhe të marrim atë që na takon. Për momentin kur gjithçka shkelet dhe nuk është normale, të paktën sipas mendimit tim personal dhe unë nuk kam se pse të shfaqem kur cënohem.

-Interpretimi i shumë këngëve të kopjuara bëhet nga interpretues të rinj. Sipas mendimit tuaj ku e shikojnë ata fitimin e kësaj gjëje?
Unë hyj në ata këngëtarë që jam shumë pro të rinjve. Ne jemi një vend mesdhetar, me zëra të ngrohtë, me zëra që kanë shumë kolorit. Këngëtarët e rinj i ndjek me vëmendje, pasi dhe ne dikur kemi qenë në hapat e para, pra unë nuk e shikoj si diçka tragjike daljen e të rinjve. Madje unë personalisht gëzohem kur këta të rinj dalin, por problemi qëndron që këta të rinj duhet që të dalin dhe të funksionojnë në një rrugë të drejtë jo në një rrugë e cila zgjat shumë pak në kohë dhe pastaj humbasin.

-U shprehët se nëse vazhdojnë këtë rrugë ata mund të humbasin, por sipas mendimit tuaj pse e vazhdojnë këtë gjë?
Mendoj se kjo vjen sipas një strategjie të tregut shqiptar, një strategji që nuk të çon shumë larg me sa po shikojmë. Dhe vetë momenti që gjithçka është në krizë do të thotë që nuk ka qenë një rrugë e drejtë nga shtëpitë diskografike. Por me sa kam kontaktuar dhe me sa kam biseduar me miq shikoj që gjërat tani po lëvizin për mbarë dhe gjithçka do të jetë super e zgjidhur në tregun muzikor. Gjithçka do të jetë shumë me përgjegjësi sepse në radhë të parë kemi shtëpinë diskografike, e cila do të mbështes një talent të ri dhe jo të gjithë mund të hipin në skenë.

-Gjykimi juaj për shtëpitë diskografike?
Shtëpitë diskografike kanë luajtur një lojë për momentin për të fituar. Në vendin tonë ka qenë një rrëmujë totale një kaos, por që në momentin që vendosen ligjet shtëpia diskografike do të jetë shumë e kushtëzuar për atë që do të publikojë në treg. Pra do të jetë një investim, dhe kuptohet që ai do të jetë atje ku ja vlen. Investim nuk mund të bësh të thjesht për të nxjerrë këngëtarë në skenë. Pra shtëpitë diskografike do të jenë shumë të kushtëzuara në nxjerrjen e këngëtarëve sepse gjithçka do të ketë kosto. Në momentin që hyn kostoja dhe rregulli i lojës ku secili ka rolin e tij atëherë kjo të çon drejt një rruge të drejtë.

-Sa mund të gjejë zbatim ligji për mbrojtjen e të drejtave të autorit në Shqipëri?
Ky ligj do të zbatohet sepse është edhe një nga pikat që e kërkon dhe Komuniteti Evropian dhe fatkeqësisht ne jemi mësuar që kur të huajt na tërheqin veshin ne i zbatojmë rregullat e lojës. Prandaj unë jam optimist për këtë ligj.

-Vazhdon që rryma muzikore turbo-folk të jetë shumë aktuale në treg dhe pse është pranuara që ajo sjell vetëm një dëmtim të muzikës. Mendimi juaj për këtë?
Të them të drejtën unë nuk e kuptoj fare këtë rrymë. Është diçka që pëlqehet dhe i përket modës. Është diçka që ka nxjerrë rezultate në tregun muzikor dhe vazhdon akoma. Unë personalisht jam pro gjithçkaje të re, por ajo duhet që të jetë profesionale.

-Kur do t’ju shikojmë sërish në skenë?
Për momentin jam në heshtje. Por po punoj për albumin e pestë dhe motoja ime është: të shfaqem kur kam diçka për të thënë.

-Si e shpjegoni faktin se jeni i njohur në muzikën shqiptare por në skenat e festivaleve nuk ju kemi parë?
Mua nuk më pëlqejnë shumë gjërat ku ka shumë pjesëmarrës, ndërsa për sa i përket festivaleve shqiptare nuk është se nuk kam dashur që të jem në festivalet shqiptare. Por mbaj mend që në vitin 1999 kam paraqitur një këngë të gjinisë tango ku ajo u përjashtua për arsye se në festival nuk këndohej tango. Kjo ishte dhe arsyeja që unë vendosa ti them përfundimisht jo festivalit në çdo kohë. Për mua është një kapitull i mbyllur, festivali i përket zërave të rinj që duan të lançohen. Mua më duket se gjithmonë festivali i ka dhënë një emër të fryrë jo natyral. Gjëja që më ka pëlqyer më shumë ka qenë që unë të përballem me tregun, pra që unë të konsumohem nëpërmjet CD të mia. Për festivalin e RTSH do të thosha që ai është një kopje e Sanremos dhe për mendimin tim nëse ai festival do të synojë të marri vlerë reale duhet që të konkurrojnë shtëpitë diskografike të cilat linçojnë këngëtarë të rinj dhe të vjetër.