Ata që nuk skuqen

Nuk e kanë për gjë të pozojnë pa rroba. Sepse nuk kanë pse t’i fshehin trupat. Janë pastaj të sigurt që do pëlqehen. Sepse kush nuk do të donte t’i shihte të zhveshur meshkujt më seksi të globit! Keni dhe ju një biletë

Oni Pustina

Modeli shqiptar e ka gjetur në Itali mjedisin që, me fytyrën e hijshme e trupin e formuar, të bëjë karrierë. Ndërsa këtu, veç ndonjë reklame, është më tepër ai djali joshës që, kur vendos të kalojë ca pushime në vendin e vet, kthehet në një magnet vështrimesh të ngulura të vajzave që kthejnë kokën për ta parë live, por për fat të keq të veshur, këtë tipin që publikun italian e ka mbajtur më me hatër. 

Sean Connery

Çfarë janë një kraharor i lëmuar e lëndët vajore për ta bërë më të dukshëm relievin muskulor të trupit, Connery i ka provuar tek konkurronte “Mister Univers”-in e vitit 1950 ku fitoi vend të tretë. Por më pas karriera e skocezit është përqendruar në atë që do të ishte suksesi i vërtetë i tij: kinemaja, ku një trup natyral e një kraharor aspak i lëmuar, i preferuar për atë kohë, nuk i ulnin aspak pikë sharmit të James Bond-it të parë në historinë e filmit.

Raoul Bova

Nuk është përmendur si koleksionues historish që përfundojnë me zemërthyerjet e vajzave, normale për meshkujt e bekuar dhe me më pak hire se ai. Ka zgjedhur një jetë të thjeshtë familjare në vend të të qenit playboy. Por kjo s’do të thotë që ai do të hiqte dorë nga fotot seksi, nga kalendarët apo skenat e filmave ku fiziku nuk mbetet në hije. Mirë që s’e ka bërë! 

Kledi Kadiu

Kledi është një shembull i mirë për të na shpjeguar trajektoren publike që ndjek jeta e një VIP-i të fushës së artit në ditët tona. Kjo trajektore kapërcen gjininë e artit ku janë profesionistë dhe mund t’i drejtojë te një kalendar me foto seksi. Si ai i “Max”-it në vitin 2003. Kjo nuk është se na lë pa kënaqësi dhe ne, qoftë vetëm duke menduar se është zgjedhur pikërisht shqiptari për t’ua bërë të nxehtë të 12 muajt e vitit italianeve. 

Fabio Cannavaro

Që të arrish të bëhesh një futbollist kombëtareje, sigurisht që me topin e futbollit marrëdhëniet duhet t’i kesh nisur që në fëmijëri. Pastaj, kur çështja bëhet “profesioniste”, ky top futbolli shihet çdo ditë në stërvitje e pak më rrallë në ndeshjet zyrtare në stadiume të mbushura plot e përplot. Kuptohet që bëhet pjesë e jetës. Duhej ta kishte patjetër dhe në këtë foto topin e futbollit kapiteni i Italisë për të na e treguar këtë?!

David Beckham

Veç profesionit të tyre (quajmë të mirëqenë që Viktoria është këngëtare), industria e modës i ka përfshirë ethshëm ata të dy. Nuk e dimë në të vërtetë sa do ta pëlqenin meshkujt një femër kockë e lëkurë me gjoks silikoni si ajo, por partnerit të saj ama nuk i mungon asgjë çfarë femrat do dëshironin: portret tërheqës, stil e fizik natyral e të shëndetshëm prej sportisti që, kur ia do puna (e dytë), ai edhe e shfaq.

Tom Cruise

Të rejat e sotme, në kanë një brez klasikësh në llogaritë që bëjnë në kujtesën e tyre, sigurisht që u formohet nga emra si: Clooney, Pitt, Cruise. Është peshkuar pikërisht Tomi, në një foto të shkrepur në një periudhë ku për palestrën duhej ta kishte marrë malli. Por, për këtë arsye, asnjë nuk do të ngrihej nga kolltuku i fanseve. Tomi gjysmë i zhveshur? Është koha për t’u rehatuar.

Rafael Nadal

Numri dy i tenisit botëror nuk kishte pse të mos dërgonte një top dhe në fushën e reklamave apo të medias josportive. Do t’i shënohej pikë. Me fizikun e tij nuk kishte si të ndodhte ndryshe. Pastaj, kjo shërben për më shumë famë. Jo të gjithë tërhiqen nga një ndeshje tenisi, por pak do t’i bënin naze një fotoje të djaloshit gjysmë të zhveshur me fizik mashkullor e fytyrë të ëmbël.

Lorik Cana

Pretendimet për të gjetur “lëndë të parë” për industrinë e modës apo median rozë në kombëtaren tonë të futbollit janë të mekura si shpresa për kualifikime. Po ndonjë shkëndijë dhe ndizet. Një e tillë është Lorik Cana, futbollisti kosovar i lindur në ’80-ën, që luan në Francë për Olimpic-un e Marsejës. Ku, veç të tjerash, e kanë spikatur dhe si mashkull seksi. Dhe ai, si kolegët e vet evropianë, ka provuar të pozojë nudo: uniforma e skuadrës së futbollistëve seksi.

Channing Tatum

Duket mirë që ka qenë model, dhe pse koha e shkuar për një 28-vjeçar duket se është lapsus, aq më tepër po të shohësh formën perfekte trupore të tij. Por ai ka vlerësuar një fushë tjetër si parësore: kinemanë. Chan-i është aktori kryesor në filmin “She’s the man” (“Ajo është burri”) dhe në serialin me kërcime “Step up” (“Një hap para”), nga ka hyrë single dhe ka dalë i lidhur me partneren balerinë Jenna Dewan. Do të thoshim që është me fat, po të mos ishte për atë trupin perfekt dhe pamjen e justifikuar krenare!

Lorenzo Crespi

Serialin “Carabinieri” pakkush nuk e ka parë. Sigurisht që aty nuk do të ketë mbetur pa rënë në sy protagonisti i disa serive, aktori superseksi me tipare mesdhetare, Crespi. Ashtu si shikuesve, të tillë meshkuj nuk mbeten pa u rënë në sy as atyre që kanë zbuluar sa fitim e vëmendje sjellin kalendarët me foto ku aktorët e preferuar të femrave, shfaqin të tjera pika të forta, që të kujtojnë dhe një herë se talenti është i pari, por, po t’i shtosh bukurinë fizike...

Gabriel Garko

Ata ironizojnë gjithmonë kur ne, pyetjes se çfarë vëmë re te një mashkull kur e shohim  për herë të parë, i përgjigjemi: “Sytë!”. Çfarë ka për të mos u besuar këtu kur flitet për meshkuj urbanë? Ok, ka disa që mund të jenë të fiksuara pas dhëmbëve ose duarve të tyre. Por nuk kemi përpara një foto si kjo e aktorit italian me sy jeshilë, shkrepur katër vjet përpara për kalendarin e “Max”. Këtu po që nuk do përgjigjeshim për sytë. Fotoja është pa ngjyra!