Një skenë e madhe nuk ka vend për dy prezantues të zotë. Preferohet çifti klasik i showman-it dhe bukuroshes së fjetur përkrah tij. Ose edhe e kundërta

Elda Laze

I kemi parë veç e veç në skenat e mëdha të spektakleve apo në studiot televizive. I kemi parë duke i qëndruar besnikë skenarit apo duke improvizuar e duke marrë simpatinë e të gjithëve. I kemi parë të vetëm duke shijuar suksesin e tyre dhe kemi menduar: po sikur të ishin bashkë? Ai dhe ajo. Të dy në një skenë, duke shkëmbyer batuta, duke luajtur, duke flirtuar, duke qeshur shpengueshëm, duke përqeshur njëri-tjetrin dhe pastaj duke u përqafuar... I kemi parë kështu vërtet, vetëm se kanë qenë në kanalet e huaja televizive. Sepse kur vjen puna tek çiftet shqiptare, sado që ta vrasësh mendjen, prezantimin e mësipërm nuk e gjen dot. Kemi arritur të shohim një prezantues të mirë. Kur bëhen dy, është e kotë. Edhe nëse njëri prej tyre është pa diskutim prezantues që meriton dhjetë me yll, përsëri nuk është e thënë që një prezantim në çift ta kthejë në një partneritet.

Në një çift fitorja u buzëqesh “të famshmëve”, atyre që lapsuset e veta i kthejnë në batuta, që të folurit rrjedhshëm e bukur nuk e kanë problem etj., etj. Në fakt, kur përmenden emra si: Adi Krasta, Ardit Gjebrea apo Alketa Vejsiu, edhe më skeptikët nuk i vënë në dyshim aftësitë e tyre. Por kur atyre iu duhet që skenën ta ndajnë me një partner tjetër, nuk e fshehin epërsinë, bëjnë të pamundurën t’ia tregojnë gjithë botës se: Ata janë të vetmit ZOTËR të skenës.

Bukuroshet që kanë ndarë skenën, me Krastën për shembull, kanë pasur luksin vetëm të buzëqeshin bukur ndërsa ai flet. Ato me Gjebrenë janë përzgjedhur në të shumtën e rasteve të huaja, duke i dhënë Gjebresë edhe të folurën si përkthyes.

Edhe kur vjen puna tek femrat, ato veprojnë sipas të njëjtit skenar: dominojnë. Alketa Vejsiu, herën e fundit që iu desh të bëhej çift në skenë me Emilianon gjatë netëve të “Më shumë dashuri’, u kujdes që ta trajtonte gjithmonë si të ftuar, siç bën Gjebrea me partneret e huaja. Kurse Elsa Lila i la Pirro Çakos vetëm prezantimin e titujve të këngëve dhe emrat e këngëtarëve, siç bën Krasta kur i gjendet ndonjë “Miss në krahë”.

Më e njohura prej tyre, ka qenë Valbona Selimllari. Ajo qëndroi krah Adit gjatë disa spektakleve televizivë. Si prezantuese, Selimllari nuk ka nevojë të komentohet gjatë. Pavarësisht se si Miss i dhuroi Shqipërisë disa çmime ndërkombëtare, si prezantuese nuk mund të thuhet e njëjta gjë. E si rastësisht ose për hir të zakonit, partneret e Adit gjithmonë kanë qenë femra të bukura, që hijeshojnë skenën duke buzëqeshur e ndërruar fustanet, për t’ia lënë gjithë meritat e të prezantuarit Adi Krastës.

Edhe nëse ndonjëra ka qenë vërtet e aftë, nuk pati as kohën dhe as hapësirën e duhur për të zbuluar talentin. Siç është rasti i këngëtares Vesa Luma, e cila në Kosovë është e njohur edhe si gazetare dhe folëse shumë e mirë televizive. Por gjatë Festivalit të RTSH-së 2007, kur Vesa Luma u zgjodh si partnere e Adi Krastës, ajo pati një rol fare të vogël, ku më tepër shërbeu si shoqëruese e tij sesa  si partnere. Të njëjtin fat pati dhe kolegia tjetër, aktorja Ermela Teli. Edhe pse fjala duhej të ishte arma e tyre (jo më kot nuk u morën jashtë pasarelave), të dyja shoqërueseve nuk iu la më shumë vend sesa prezantimi i tipit: muzika X, teksti Y, orkestroi… Pak a shumë e njëjta formulë që ka zgjedhur edhe për mëngjesin e tij në “New Day”: një prezantuese si Xhoi, pa pikën e sensit të humorit, por që për Krastën duket se është perfekte për aq kohë sa do t’i shndrisin nga larg flokët e verdhë.

Por nuk është çështje seksi, sepse kur dominon femra, ai që ka lexuar “muzika, teksti” etj. në skenar ka qenë prezantuesi mashkull. Shembulli më i mirë për këtë është çifti Elsa Lila dhe Pirro Çako. Të dy këngëtarët nuk patën provuar asnjëherë rolin e prezantuesit, të paktën jo në ndonjë eveniment kulturor të rëndësishëm, siç ishte Festivali Kombëtar në RTSH. Në këtë sfidë të re, të dy hynë me shanse të barabarta për të treguar secili potencialin e vet edhe si drejtues. Për meritë të aftësisë për të artikuluar të Elsa Lilës apo aftësisë për t’i lëshuar udhë Pirro Çakos,  rezultati është i njëjtë: skenën e dominoi vetëm njëri partner, Elsa Lila. Batuta, komentet jashtë skenarit, spontaniteti dhe lirshmëria e saj, lanë krejtësisht në hije Pirro Çakon. Në të tre netët e festivalit, kantautori ra në sy vetëm në një moment: gjatë duetit me Elsën. Si prezantues nuk shkoi më larg sesa për të ftuar në skenë sipas skenarit konkurrentët.

Të paktën Pirro Çako i pati këto pak rreshta në skenar. Sepse partneret e Ardit Gjebresë as kaq nuk kanë mundur të bëjnë dot, për një arsye të thjeshtë: nuk kanë ditur shqip. Disa herë, Ardit Gjebrea ka ftuar emra të njohur të showbiz-it italian për të prezantuar së bashku festivale dhe spektakle të rëndësishme. Natalia Estrada apo Brigitte Nielsen, gruaja e një ambasadori, apo ndonjë tjetër yll i viteve ‘80... Të gjitha kanë prezantuar bashkë me Arditin “Këngën Magjike” dhe, veç ndonjë batute, të qeshurave të shpenguar apo lirshmërisë në qëndrim, asgjë tjetër nuk mbahet mend prej tyre. Gjithçka përmbante skenari kanë qenë në gojën e prezantuesit, që herë pas here ka bërë dhe përkthyesin. Gjë që, kur bëhet nga Gjebrea, me dashamirësinë e tij rrëzëllitëse nga fillimi deri në fund, krijon njëfarë partneriteti. Sepse kur vjen puna tek prezantimi, së paku Gjebrea, sado që e ruan pozicionin e liderit, dyshen e formon. Dhe një nga dyshet më të mira ka qenë pa diskutim ajo me Denada Dajlanin, prezantuesen e radios NRG, e panjohur në skena të mëdha. Të gjithë e mbajnë mend si një çift të gjetur, por që nuk u pa më. Mesa duket, Gjebrea vazhdon të ndihet më mirë vetëm ose me të ftuarat e herëpashershme, që nuk mund të shndërrohen në partnere.

Në partner të Alketa Vejsiut nuk ka arritur të shndërrohet asnjëherë edhe Emiliano Lule, me të cilin ajo u gjend disa herë në skenën e “Më shumë dashuri”. Emilianoja hyri fillimisht si i ftuar, u pëlqye dhe pastaj u rikthye. Ideatorët e emisionit gjithmonë e më shumë zgjodhën ta shtonin praninë e tij në skenë. Një lloj bashkëprezantimi me kohë të pjesshme. Por që Alketa vijoi deri në fund ta trajtojë thjesht si një të ftuar. Një mori detajesh kanë treguar se Vejsiu nuk e ka pasur dhe aq për zemër ta ndajë rolin prej protagonisteje. Gabime të vogla të Emilianos nuk do të ishin kuptuar nga publiku, nëse Alketa nuk do t’ia kishte vënë në pah.

Ajo ishte e vetmja prezantuese, gjë që dëshmohej edhe në titra. Kurse Emiliano, një i ftuar i suksesshëm dhe aq. Alketa e “Gjeniut të vogël” apo “Këngëve të shekullit” dhe, më parë akoma, e “Kërkohet një yll”, nuk kishte pse të gjente një yll në prezantim pikërisht në projektin më të madh e më të rëndësishëm që i qe besuar në jetë. Dhe ka luajtur fort deri në fund për të mos i lëkundur pozitat e saj. Si të gjithë kolegët e tjerë në fund të fundit, që nuk duan ta ndajnë skenën me të tjerë. Qoftë studio televizive, qoftë Pallat Kongresesh, është gjithsesi e vogël për dy.