-Keni qenë programues i stinës koncertore të orkestrës së RTSH në vitin 2008. Jeni në dijeni të anulimit të koncertit të datës 23 maj në festivalin “Peçi Festival ‘08”, ku organizatori është shprehur se është nënshkruar një kontratë?
Unë kam programuar stinën koncertore të orkestrës simfonike të RTSH për vitin 2008 dhe nga sa është parë deri tani mendoj se ka qenë një stinë tepër e suksesshme sepse koncertet e radios kanë qenë dinjitoze më vlera artistike të cilat janë përcjell me dashuri tek publiku. Unë u njoha me anulimin e koncertit të Aleksandër Peçit nga shtypi dhe më thënë të drejtën më erdhi keq sepse nuk është një ngjarje e mirë anulimi i koncertit të programuar. Historia e programit të muzikës në një nga netët e “Peçi Festival ‘08” është e tillë ku Aleksandër Peçi ka ardhur dhe ka kontaktuar me mua dhe më ka sugjeruar që ka një ide të ekspozimit të veprave të tij të reja. Unë pranova për dy arsye, e para sepse muzika shqiptare ka nevojë për një rikrijimtari të re dhe ishte një eveniment realizimi i koncertit të pianos dhe arsyeja e dytë ishte se koncerti do të drejtohej nga një dirigjent anglez, pra ishte sërish një ballafaqim ndërmjet vlerave të artistëve shqiptarë dhe atyre të huaj. Unë u njoha me anulimin e koncertit dhe që të jem i sinqertë dua që të dëgjoj të dyja palët dhe të jap opinionin tim, por anulimi i koncertit nuk më duket i mirë nëse është për arsye profesionale siç thotë Peçi, pasi nëse është ky arsyetim kjo e ul dinjitetin e orkestrës nga ana profesionale nëse ata janë tërhequr, por unë nuk mund të gjykoj dhe nuk mund të marr 100 përqind këtë arsyetim pa dëgjuar dhe fjalët e kolegëve të mi të orkestrës. Unë tentova të flas dhe me drejtoreshën e radios, por Zamira ndodhet në Beograd për zhvillimin e Eurosongut. Kontrata është nënshkruar nga drejtoresha pasi unë jam larguar nga RTSH. Duhet që të dëgjoj dhe opinionin e drejtoreshës që të jap një gjykim më të saktë, por për mendimin tim nuk më duket diçka normale dhe e mirë anulimi i koncertit.

-Kompozitorët janë shprehur se gjatë 20 viteve të fundit është bërë pak për muzikën simfonike shqiptare në RTSH. Duke qenë një nga ish-drejtuesit e orkestrës cili është gjykimi juaj për këtë?
Kjo është një çështje shumë e rëndësishme. Kjo çështje qëndron në vërejtjet që ka bërë Aleksandër Peçi. Ndër prioritet e mia kryesore unë kam pasur zhvillimin dhe afirmimin e muzikës simfonike shqiptare, pasi po të shikosh në ecurinë e saj ka një shkëputje goxha të gjatë rreth 16-vjeçare të muzikës simfonike. Unë mendoj se orkestra e RTSH duhet të ketë një ndër prioritet më të mëdha realizmin e veprave shqiptare, por gjithashtu dhe TKOB, por këto kërkojnë në radhë të parë një mbështetje nga drejtuesit e këtyre institucioneve. Unë jam përplasur shumë për këtë problem dhe kjo ka qenë një ndër arsyet më të forta që unë jam larguar nga institucioni, pasi nuk kam gjetur mbështetje në realizmin e këtij problemi. Unë nuk mund të mbaj mbi vete fatura që nuk janë të miat. Unë kam luftuar shumë për të rikthyer muzikën shqiptare. Realizova një cikël koncertor të muzikës shqiptare, i cili do të vazhdonte dhe këtë vit. Kërkova dhe fonde për të blerë muzikë simfonike shqiptare, pasi këto vepra duhet të blihen. Pra në atë që thotë Peçi është e njëjta logjikë që kam përdorur dhe unë, pra vërtetë kënga shqiptare duhet të stimulohet dhe të shpenzohen para dhe jam shumë dakord me fondet që nxjerr RTSH për këngën, por nuk mund të jenë 1 e dhjeta ose zero fonde për të blerë vepra të reja të muzikës simfonike shqiptare. Në kushtet në të cilat zhvillohet muzika simfonike në Shqipëri duhen sponsor dhe investime nga shteti. Në radhë të parë profesionistët e muzikës duhet të krenohen me veprat simfonike me vlerat e muzikës së vërtetë dhe profesionale. Edhe kënga ka vlerat e saj dhe nuk jam dakord me ato që Peçi i quan kënga unë nuk jam dakord me këto emërtime, por jam dakord me pjesën tjetër që mungon tërësisht që është shikimi ndaj muzikës simfonike shqiptare. Ajo që unë kam kuptuar në RTSH është që orkestra simfonike nga shumë drejtorë që e kanë drejtuar këtë institucion është parë si një barrë e rëndë në supet e këtij institucioni. Nuk janë kuptuar vlerat e saj. Kjo orkestër duhet të shikohet si një vlerë e madhe kombëtare dhe jo si një angari apo detyrim i këtij institucioni. Unë kam pasur shumë probleme dhe për të transmetuar koncertet e orkestrës simfonike në RTSH jam përplasur shumë, pra nuk ekziston një mentalitet qytetar me drejtuesit. Unë habitem se gjithmonë koncertet transmetoheshin pa njoftime dhe në orë të papërshtatshme. Po të shikoni RTSH transmeton në orën 6 të mëngjesit opera. Shqiptarët zgjohen të “frikësuar” duke parë opera tragjike, pra për mua është një nënvlerësim pasi koncertet e orkestrës jepen në një orë vetëm për të përmbushur programin. Unë mendoj se kjo është në dëm të muzikës shqiptare dhe natyrisht largon dhe teleshikuesit nga RTSH. Pra në këtë institucion ekziston një mentalitet që duhet ndryshuar rrënjësisht. Unë mendoje RTSH duhet ë të bëjë një reformë shumë të madhe në këtë drejtim sepse këtij institucioni i kanë ikur spektaklet. Unë tentova që të bëj koncertin e “Këngës Popullore”, Festivalin e Pranverës, Koncertet e Muzikës së re shqiptare dhe asnjë nga këto nuk u bë, por kush do ti bëjë këto në Shqipëri. Të gjitha kërkesat unë i kam bërë në Drejtorinë e Përgjithshme të RTSH dhe nga të gjithë përgjigjet që kam marrë është vetëm nuk kam fonde. Përgjigja ime kur ato më thoshin nuk kemi fonde ishte se kur nuk keni pse e mbani orkestrën. Por orkestra ka dhe shumë probleme të tjera, pasi nga ana financiar orkestra e RTSH nuk trajtohet financiarisht si orkestra e TKOB. Ata paguhen shumë më pak ndonëse bëjnë një punë të kualifikuar dhe duhen trajtuar financiarisht me të njëjtën pagë si orkestra e TKOB.

-Sipas jush çfarë duhet që të ndryshojë në RTSH?
Mendoj se në RTSH duhet një reformë e madhe dhe e tërësishme sidomos në ndryshimin e konceptit. RSTH nuk është më lider në tregun televiziv dhe më vjen shumë keq për këtë pasi aty ka shumë forca. Ndërsa televizionet tjera nuk kanë as orkestër me katër pesë vetë, por ne kemi shumë profesionistë. Unë do të thosha që këto drejtues që kanë ardhur kanë bërë një punë më të mirë se ata paraardhës, por unë kërkoj që këta duhet që të ndryshojnë mentalitetin e tyre. Këta kanë futur një frymë të sinqeritetit, por mungon pjesa artistike dhe klasi në RTSH.

-Në RTSH është bërë një propozim për tu bërë një festival vetëm për Eurovizionin. Cili është mendimi juaj për këtë meqë keni qenë dhe drejtuesi e artistik i Radio Tiranës?
Jam njohur me një propozim të ri që është bërë në RSTH për zhvillimin e një festivali të ri që ti kushtohet vetëm Eurovizionit. Unë mendoj dhe nuk dua që ta paragjykoj si veprim të mirë apo të keq, por mendoj se kjo çështje nuk i takon Drejtorit të Përgjithshëm dhe as Këshillit Drejtues të RTSH ku nuk ka asnjë muzikant, por kjo duhet parë dhe duhet të diskutohet me grupet e interesit, pra me kompozitorët, poetët me ato që bëjnë vetë muzikën. Pra duhet bërë një diskutim i gjerë dhe të shikohen anët negative dhe pozitive. Unë mendoj se do të ketë shumë reagime po ti hiqet e drejta festivalit të dhjetorit për në Eurovizion, megjithatë insistimi im kur kam qenë në atë institucion ka qenë gjithmonë diskutimi dhe ballafaqimi me të gjithë pjesëmarrësit e festivalit.

-Pas gjithë atij konflikti me festivalin, çfarë i uroni përfaqësueses së Shqipërisë në Eurovizion Olta Boka?
Për mua Festivali Evropian i Këngës do të thotë shumë. Unë pavarësisht nga ajo që ka ndodhur për këngën, unë nuk kam dhënë asnjë opinion, por gjithmonë kam dënuar procedurën e përzgjedhjes, e cila ishte shumë korruptive në përzgjedhjen e këngës fituese. Megjithatë unë nuk mund të përjashtoj veten si shqiptar që kënga të dali sa më mirë, por me sa kam informacione konfidenciale dhe nga RTSH ata shpresat më të mëdha i kanë tek pozita politike e kohës.