-Pirateria ka triumfuar sot në tregun muzikor shqiptar. Komenti juaj për këtë?
Pirateria në fakt nuk është se ekziston vetëm në Shqipëri, pasi ajo sot ndeshet në të gjithë botën, por për ta parandaluar piraterinë ka disa rregulla që janë: në radhë të parë ai që blen një prodhim diskografiku i famshëm që tek ne nuk e kanë idenë, diskografia nuk është vetëm një mjet për tu pasuruar. Diskografia në të gjithë botën është një mjet që investohet dhe pastaj fitohet. Në Shqipëri gabimi më i madh që bëjnë diskografët tanë që normalisht ZSHDA duhet që ti pezullojë dhe licencat, është që materiali muzikor blihet direkt nga këngëtari pa qenë autori, kurse në të gjithë botën tregtohet me autorin. Nuk ka të drejtë këngëtari, pasi nuk hyn në përqindjet e autorësisë, ai hyn vetëm në momentin që është kantautor dhe ka prodhimet e veta. Kështu që të gjithë këto prodhime që janë blerë sot nga diskografët shqiptarë me lekë në dorë dhe shumë herë pa kontrata janë të pavlefshme. Në momentin që ZSHDA do ti futet një kontrolli ato do të dalin të gjithë të pavlefshme. Pirateria, është e thjeshtë, mund të hapësh sajtet e internetit dhe dihen se kush i ka këto sajte, atëherë shko dhe bllokoji ato që i japin këto këngë sepse nuk kanë të drejtë ti japin. Në fakt ka dhe site jashtë që shkarkohet muzikë, por këto sajte interneti çdo vit paguajnë të drejtën e autorit dhe nuk janë sajte pirate, ato janë të legalizuara. Tek ne kjo gjë nuk është bërë, pasi si çdo gjë që ka filluar me vonesë dhe e drejta e autorit ka filluar me vonesë.

-Si e shikoni funksionimin e ZSHDA në vendin tonë. Cili është kontributi i saj sot?
Kjo është një zyrë me të vërtetë me inspektor dhe një zyrë kontrolli për të mbrojtur të drejtat autorit. Ka filluar që të punojë, por si çdo gjë tek neve do të duhet shumë kohë që të vihen rregullat. Tani në këto kohë ato po merren me Tiranën dhe nuk po ia arrijnë dot sepse këtu është vjedhur dhe kopjuar vetëm muzikë dhe asnjë nuk është dënuar. Nuk shkohet vetëm për të mbyllur dyqanin sepse ai në fund të fundit është hallka e fundit e zinxhirit, pasi ai shet ato që i japin. Unë mendoj se kjo gjë duhet kapur që nga produktori që prodhon muzikë, që nga ai që ka vjedhur këngën e huaj pa asnjë të drejtë autori. Pra në momentin që ti ka marrë një këngë të vjedhur ti duhet që të dënohesh sepse këngëtari nuk faj. Është faji i tij që publikon këtë lloj materiali. Provoje bëje këtë gjë jashtë p.sh kemi rastin e këngëtarit Albano Carrisi me Miachel Jackson të cilët për gjashtë masa që u ngjanin bënë dhjetë vjet gjyq, mendo sikur të ishte nxjerrë e tëra në shitje kënga çfarë do të ishte bërë. Këtu tek ne po ti futesh prodhimeve të CD ato janë skandale, pra në çdo CD ka këngë të vjedhura. Ti duhet që të shkosh në Bullgari ose Greqi ku e ke vjedhur këngën, duhet ti paguash të drejtën e autorit të këngës dhe me atë letër në dorë ti ke të drejtë që t’ia çosh prodhuesit sepse ai nuk ka asnjë të drejtë që të botojë një këngë të vjedhur. Kjo vlen dhe për filmin dhe për shumë gjëra të tjera. Atëherë në momentin që kjo gjë do të vihet me baza të forta të gjithë do të kenë frikë, sepse frika e ruan vreshtin dhe në muzikë është kështu. Unë i kam pasur në emisionin tim punonjësit e të drejtës së autorit dhe unë i kam quajtur polici muzikore dhe për mendimin tim ato duhet të jenë kështu, pasi deri tani akoma nuk janë. Sapo të dalësh në rrugë ke plot CD që shiten nga 1 mijë lekë të vjetra dhe janë të kopjuar nëpër shtëpi. Aty i ke çdo ditë këto shitës, por pyetja është se a ka shkuar njeri që ti heqë? Duhet që të vijë policia tatimore dhe të bëhen gjërat me rregull. Por në fakt po ecet shumë ngadalë, mos ta flasim për rrethet që është llahtar fare. Unë njoh njerëz që kanë dyqanet dhe i thonë ato të rretheve mi sill mua se i shes unë. Pra unë mendoj se kjo gjë nuk bëhet vetëm me dy inspektorë, por duhet një masë e gjerë njerëzish dhe këtu duhet që të ndërhyjë shteti, pasi kjo nuk është një punë që e bën një shoqëri private. Shteti duhet që të investojë për të bllokuar piraterinë edhe pse nuk bllokohet dot unë mendoj se një përqindje e tyre duhet që të bllokohet. Futu në një dyqan dhe gati e gjithë muzika e huaj është pa pullë. Pra që në atë moment shteti duhet që ti heqë licencën atij dyqani. Shumë vetë merren me këngëtarët duke thënë p.sh kanë vjedhur këngën, por kjo gjë është e gabuar, pasi në fakt nuk e kanë vjedhur ata. Kështu që këngëtarëve nuk i duhet vënë faj tek kjo gjë. Faji është kryesisht i prodhuesit, ai që ka blerë këngën greke, bullgare, turke etj, që i ka nxjerrë në shitje si këngë shqiptare. Pra duhen marrë masa. Unë besoj se të gjithë prodhuesit, shtëpitë diskografike sepse këtu tek ne çdo ditë hapet nga një e tillë megjithëse asnjë prej tyre nuk është shtëpi diskografike, mendoj se në fund fare do të ngelen vetëm ato që janë të tilla, ato që vërtetë do të promovojnë një muzikë të vërtetë, ato që vërtetë do të paguajnë të gjitha të drejtat e autorit dhe këtu nuk është vetëm shtëpia diskografike, pasi janë dhe të gjithë televizionet dhe radiot. Fakti tjetër janë dhe koncertet. Të gjithë këngëtarët dhe këngëtaret tanë nëpër koncerte marrin lekë në të zezë. Po marrin sot se janë nga 20 vjeç po kur të bëhen 40 vjeç çfarë pensioni do të kenë? Patjetër duhet që të ekzistojë ajo e famshmja librezë e punës për artistin siç është në të gjithë botën deri në Kazakistan është kështu, por vetëm në Shqipëri nuk është. Nuk ka të drejtë asnjë artist jashtë që të shkojë të këndojë dhe në lokalin më të qelbur pa pasur librezën e punës të muzikantit. Unë po marr një emër p.sh Poni që të gjithë këngët ia ka bërë Adrian Hila dhe ajo fiton milion lekë për koncerte dhe ka blerë makina dhe shtëpi. Por kur vjen puna Adrian Hila i ka marrë vetëm një herë lekët e këngës kur kjo i ka bërë. Adrian Hila me të drejtën më të madhe të botës sot mund ti kërkojë lekët Ponit dhe shtëpisë diskografike që sa herr ajo ka kënduar këngën, ama kuptohet e dokumentuar, ai mund ti marri treçerekun e lekëve që ka sepse kështu funksion dhe duhet që të funksionojë. Interpretuesi është interpretues dhe autori është autor. E drejta e autorit mos harrojmë vazhdon 70-vjet. Tek ne unë shpresoj që ta bëjnë pas nja 70 brezash sepse kështu si e kanë nisur po ecet shumë ngadalë. Them kështu sepse është futur vetëm një frikë e përgjithshme, por vazhdohet po njësoj të vidhet. Janë mbushur rrugët me gabelët që shesin CD me këngë të vjedhura. Pra ata aty janë, ti ndaloji, pra mos u anko që këtu është e vështirë dhe po bëjmë ligjin, pasi ai është. Konventat internacionale i kanë bërë, por se çfarë presin?! Si vendos gjoba për makinat kështu duhet që të jetë dhe për muzikën. Ka rregulla dhe ligje, por këtu tek ne janë të gjitha rrumpallë. Në momentin që këto gjëra do të bëhen atëherë do të ketë shpresë dhe për muzikën sepse ajo do të jetë shumë më e kontrolluar. E drejta e autorit nuk vlen thjesht për ti dhënë lekë autorit, ajo vlen dhe për kontrollin e muzikës sepse dashje pa dashje do të iki dhe gjithë kjo tallavaja e muzikave bullgare etj. Do të mbyllen shumë studio por ajo do të iki patjetër sepse treçereku i atyre që punojnë në studio janë injorantë nuk kanë bërë një ditë muzikë.

-Shumë pak po dëgjohet sot ajo që me të vërtetë mund të quajmë muzikë shqiptare. Si e shpjegoni këtë?
Në fakt këto 2-3 vitet e fundit janë risjellë këngët shqiptare tek “Këngët e Shekullit” dhe sot ai është disku më i shitur në treg. Unë shikoj nostalgji për këto këngë dhe tek brezi i ri. Fakti është ky, që sot nuk shkruhet këngë e mirë, pasi pas viteve ’90 nuk shkruhet këngë.

-Sipas jush nëse do të ishin marrë masat disa vite më parë a do të ishte kjo gjendje e tregut muziko shqiptar sot?
Në demokracinë shqiptare u ngatërrua hapja e kufijve, pasi nuk pati hapje mendore. Këtu filluan që të bëjnë muzikë sharlatanët ato që nuk kishin bërë kurrë muzikë, filluan që të vjedhin sepse nuk ishin në gjendje që të shkruanin muzikë. Tek ne kanë ngelur shumë pak muzikantë të mirë dhe kjo është fatkeqësia dhe këto janë munduar që të futen në treg. E gjitha kjo vjen se nuk ka kontroll dhe licenca. Të gjitha këto studio janë pa licenca. Tek ne dalin vidioklipet pa licencë, këngët e bëra pa faturë, vjedhjet që i prodhon vetë prodhuesi diskografiku, pra më keq se ka nuk ka. Këtu duhen të merren masat nga shteti, duhet që të ndërhyjë policia.