Igli Tare,nga fusha në skrivani

Cilat janë emocionet e para që ndjen një futbollist që le futbollin ?
Kur kthej kokën mbrapa dhe bëj një retrospektivë të jetës time, gjej në çdo moment të saj topin dhe fushën e gjelbert. Në keto orë ka pak trishtim, por të them të drejten është akoma shume shpejt per të kuptuar realisht çfarë ndjej. Futbolli ishte dhe do jetë jeta ime dhe të ndahesh nga pasioni yt, nga qellimi i jetes, është shumë e veshtirë, më duket sikur 28 vjet kam qenë në ëndërr dhe tani po zgjohem. Nuk do të harroj kurrë vitet e vuajtjes kur per tu bere Igli Tare me eshte dashur të sakrifikoj shumë gjëra qe po t’i them, më duket sikur do t’i humbin vlerat, por që pa to nuk do te isha kurrë këtu ku jam sot.
Ndeshja e parë me kombëtaren ka qenë momenti me kyç i karrieres time, ku fale Zotit tregova që une isha futbollist qe meritoja vemendje dhe me pas rruga qe ndoqa eshte e njohur. Kujtoj çdo gje me mall por ne te njejten kohe jam i lumtur qe ne fund te rruges mund te them “I did it” (Ia dola). E perdora anglisht per te permbledhur shkurt dhe sakte 28 vitet e karrieres time.

Eshtë tashmë publik lajmi që jeni bërë Drejtori Sportiv i Lazios. Çdo te thote kjo per ju?
Do t’ju bej një paralelizem që të kuptoni rendesine, eshte sikur te kisha firmosur nje kontrate si futbollist me Milanin. Eshte nje post shumë i rendësishëm ne strukturen e nje klubi futbolli ne Itali, dhe te arrish nje gje te tille eshte nje enderr. Eshte një post qe kerkon perveç njohjes së realitetit të brendshëm te skuadres, dhe nje njohje profesionale te te gjithe botes se futbollit ane e mbane botes, jo vetem në Itali. Ky post m’u besua fale raportit shume korrekt dhe te ngushte qe une kam pasur me Presidentin e Klubit Claudio Lotito gjate tre viteve që une kam qene futbollist dhe do te punoj me shume se kurre per mos të zhgenjyer besimin e tij. Eshtë një sfidë tepër e madhe për mua dhe kerkon një pergatitje komplekse duke filluar qe nga pergatitja per marrjen e licenses se drejtorit sportiv deri perfaqesimin e klubit ne cdo instance ku do te duhet prezenca e ketij posti.

A dëshmon promovimi i një futbollisti shqiptar në këtë pozicion, një faze të re në vleresimin për sportin shqiptar në botën sportive europiane?
Besoj që jo, në një aspekt të ngushtë, sepse siç e thashe dhe me lart, ky post ka të beje dhe me raportin e besimit që une kam me Presidentin e klubit. Eshte nje arritje individuale që nuk mund te thuash qe do hapë rrugen edhe për të tjerë, siç ndodhi ne futboll. Por patjeter, nga ana tjetër, kjo ndihmon në përmiresimin e imazhit te sportit shqiptar në Itali dhe jashtë saj, sepse tashmë nuk do te krenohemi vetem per arritjet brenda fushes, por dhe në skenën e futbollit si aktivitet dhe angazhim global. Mos harroni që Besnik Hasi eshte bere zv/trajner i Anderlecht, mua m’u besua ky post pra po ndyshojme , po se si do te jete e ardhmja veshtire ta them, nderkohe qe jam i bindur qe futbollist te talentuar do kete shume me teper sesa ishim. E rëndësishme eshte që të kete sa më shumë shqiptarë të suksesshem në një bote ku paragjykimi eshte më i shpejte se vleresimi.

Si do të jenë këtej e tutje lidhjet si ish-futbollist me futbollin shiptar?
Hera e pare qe po pergjigjem si “ish”! Lidhje shumë të ngushta do të jenë, sepse bëhet fjalë për vendin tim. Futbolli ne Shqiperi eshte i çuditshëm, sepse është një ambient ku i gjen te gjitha. Ka shumë anë te mira, por dhe shume shume probleme. Mendoj që strukturat, siç jane ndertuar klubet tona aktualisht, kane nevojë për një përmirësim rrënjësor. Duhet të egzistojnë projekte afatgjata dhe të mbështetura ne biznese serioze, të cilat duhet gjithashtu të mbeshteten nga shteti. Pra si të thuash, është një proces zinxhir, ku çdo hallkë është e rëndësishme, Thjesht, futbolli duhet të kthehet të jetë kënaqësi, ku njerezit ta shikojne çdo ndeshje si një festë. I kemi të freskëta imazhet e EURO 2008, ku futbolli u kthye ne feste. Per t’u arritur kjo duhet që të largohen njerezit e rastesishëm, që e konsiderojnë futbollin thjesht si një biznes, ashtu sic shikojne bizneset e tyre. Futbolli kerkon pasion, përkushtim dhe mbi te gjitha vizion, por besoj qe ka ardhur koha ku maturia te mbizoteroje dhe te behet nje reforme e thelle. Une edhe pse do te jem i angazhuar ne detyren time te re, do të jem gjithmonë i vëmendshëm rreth zhvillimeve të futbollit në Shqiperi dhe do te kontribuoj me çdo mundësi që do më jepet.