Ato janë të reja dhe të bukura, por nuk fillojnë e mbarojnë aty. Sepse në jetë dinë të bëjnë më shumë. Por kjo gjë pak personave do t’u interesonte e nuk do t’i bënte kurrsesi të njohura. Është lidhja me një mashkull publik që i shndërroi ato në personazhe. Nora, Ajola dhe Valbona të kujtohen lehtësisht po të përmenden emrat e partnerëve: Blendi Klosi, Erion Veliaj dhe Igli Toska. Ndërsa ata janë bërë edhe më të famshëm

Arta Çano

Femra si ato, vështirë të mos bien në sy. Simpatike, elegante, të ëmbla! Kjo do të sillte kthim kokësh, komente ndoshta dhe ziliqare në bisedat e ish-shoqeve, një farë krenarie të çdo mashkulli që do ulej me to në tavolinë, qoftë dhe për një çështje pune. Kaq! Pamja dhe profesioni që kanë, qoftë edhe mbiemri i dëgjuar, nuk do t’i bënte kurrë kaq të njohura sa janë sot. Askush nuk do kujtohej t’u trokiste në derë për të mësuar sekrete të jetës së tyre familjare, askujt nuk do t’i binte ndërmend t’u kërkonte foto nga dasma apo bashkëjetesa për t’i publikuar ato në faqet e ndonjë gazete, askush nuk do të interesohej për t’i blerë botimet me intervista të tyre.

Të gjitha këto kanë ndodhur pa shtuar as një grimë. Arsyeja? Shumë e thjeshtë: partnerët e tyre merren me politikë. Të paktën në kohën kur lidhjet respektive janë bërë publike, kandidatët për dhëndër ishin kokë e këmbë të angazhuar me politikë apo aktivitete të afërta, që të mbajnë në qendër të vëmendjes dhe jo vetëm kaq, por gëzonin dhe status goxha të lakmuar. Janë apo nuk janë më mbajtës postesh të rëndësishme, nuk mund të zbresin nga pozicioni i njerëzve të njohur, ku të mjafton të jesh ulur një herë për ta pasur përgjithmonë dhe për ku ftesa bëhet në çift.

Sepse, duke pasur në krah një mashkull aq të njohur, dhe ato partneret e tyre do bëheshin po aq fytyra mediatike. Lidhja e një politikani me një vajzë të bukur sigurisht që do ishte e zhurmshme. Një zhurmë që askush nuk është përpjekur ta shuajë. Meshkujt bëhen edhe më karizmatikë me bukuroshet e zgjedhura, ndërsa ato bëhen të njohura, pa bërë diçka për ta arritur këtë. Rrugë më pak të mundimshme se kaq drejt njohjes nuk do ketë ekzistuar!

Kur thuhet Nora e Blendit

Të gjithë kanë bërë sytë e ëmbël kur kamera fokusonte portretin e organizatores në prapaskenën e emisionit “Zonë e lirë”. Ajo vajza e veshur e tëra sport ishte shfaqur më parë dhe në një reklamë. Por këto llogari u bënë në një letër të pastër, kur vajza simpatike, me një buzëqeshje çarmatosëse, po shihej në krah të ministrit të Kulturës së asaj kohe, Blendi Klosit. Ai, dhjetë vjet më i madh se ajo, por gjithsesi ende një djalë i ri e i paraqitshëm, edhe një vajzë shtatlartë, si Nora, ish-basketbollisti e bënte të dukej (me siguri dhe të ndihej) super e mbrojtur tek ia mbështillte supet edhe kur ishin në rrugë. Kishin nisur të mbështeteshin te njëri-tjetri dhe jo përkohësisht. Ata të dy, vitin e shkuar, u martuan për t’u kthyer sërish në qendër të vëmendjes. Nora ka mbetur po ajo vajzë e ëmbël, e veshur sportive, që vazhdon të merret me po ato aktivitete, të cilat nuk mund të shndërrojnë kurrë në protagoniste, por që njerëzit e dinë mirë kush është: Nora e Blendit. 

Politika e Erionit kalon nga Ajola

Ai nuk kishte pranuar të bënte publike asnjë lidhje të mëparshme derisa gjeti Ajolën, vajzën simpatike, elegante, të diplomuar në Paris, me mbiemër të njohur. Një partnere si ajo nuk u fsheh asnjëherë, përkundrazi nuk ishte e vështirë të pranonin të jepnin intervista ku flisnin për njëri-tjetrin. Fakti që ajo kishte kënduar dhe prezantuar dikur, iu kujtua shumë personave, pikërisht sepse e ripanë në krah të Erionit. Përndryshe, duke qenë se ajo ka vendosur të mos shfaqet më si showgirl, ai do ishte një kapitull i mbyllur, ku kujtesës publike zor se do t’i binte rruga. Nga Franca ka ardhur me një kokë të mbushur plot me ide serioze, që e kanë afruar me UNICEF-in dhe politikën, por as këto nuk do mjaftonin që ajo të bëhej e njohur në sytë e njerëzve (të paktën jo ende, sepse një 23-vjeçare karrierën e ka përpara). Ama, kur këta të fundit e shohin dorë për dore me Erion Veliajn (mirë në rrugë po e po, por dhe në një program televiziv) apo nëpër gazeta pranë njëri-tjetrit, ku flasin për lidhjen e tyre, atëherë përgjigja se kush është ajo vajza vjen në kokë para pyetjes që nuk as nuk bëhet: e fejuara e Erion Veliajt.

Valbona, gruaja që mban ish-famën

Një histori si e saja do frymëzonte çdo skenarist filmash romancë. Një vajzë elegante, simpatike, plot finesë, e diplomuar dhe e kualifikuar jashtë, kthehet në vendin e saj, ndërkohë që është vetëm 24 vjeç dhe fillon punë në administratë (saktësisht në Ministrinë  e Ekonomisë). Sigurisht, që skenari të plotësohet, duhet një histori dashurie. Dhe kështu ndodhi vërtet. Valbona Zeneli, rreth gjashtë vjet më parë, ishte pikë për pikë një personazh i tillë, e cila, ndër shumë meshkujve, i ra në sy dhe Igli Toskës, politikanit të ri, por të suksesshëm socialist. Fillimisht, zëvendësministër i Rendit e më pas kreu i kësaj Ministrie, Igli, kur u pa i shoqëruar me vajzën e bukur të diplomatit Bashkim Zeneli, u bë me siguri më karizmatik se më parë. Shumë do ta kenë cilësuar me fat që arriti të bëjë për vete atë vajzë aq të bukur (sot bashkëshortja dhe nëna e djalit të tyre, Dario), ndërsa Valbona, ndoshta pa e llogaritur aspak, u bë një fytyrë e njohur; u bë nusja që nuk mbeti njeri pa e komentuar për finesën e saj, ndërkohë që kronikat televizive transmetonin pamje nga ceremonia dhe festa madhështore. Duke qenë në krah të një njeriu të njohur – dhe pse tashmë është larg epiqendrës së zhvillimeve politike – ajo njihet nga të gjithë, megjithëse askush nuk e di me se merret. Kjo nuk ka rëndësi, për sa kohë që Valbona është nusja e bukur e ish-ministrit.