Lajla Përnaska

Për të njohur më thellë gruan e politikës. Manitë, gënjeshtrat, lumturitë, heronjtë dhe pengun e vetëm të jetës së saj. Cili është? Zbulojeni!

Cila është ideja jote për lumturinë e vërtetë?

Që nuk ekziston! Lumturia është relative dhe besoj se kushdo e percepton dhe e shijon  në mënyrën e tij, brenda mjedisit social ku jeton. Jeta e njeriut ecën nëpërmjet momentesh lumturie, gëzimi, trishtimi apo zhgënjimi.

Cila është frika më e madhe?

Nga fenomenet natyrore, ndaj të cilave qenia njerëzore është ende e pazonja për t’u mbrojtur: tërmete, përmbytje etj.

Kë person të gjallë admiron më shumë?

Tim atë! Jo thjesht si prind, por mbetet personi që ka realizuar që në vogëlinë time e në vazhdim figurën e një njeriu mjaft të zot, të palodhur, gjithmonë në shërbim të familjes dhe shoqërisë. Është vërtet i papërsëritshëm.

Cili është ai tipar i të tjerëve që të ngjall mëshirë? 

Karakteri i dobët. Kjo, për femrat, por veçanërisht për meshkujt.

Ekstravaganca jote më e madhe?

S’më pëlqejnë ekstravagancat, të paktën tek vetja. Mendoj se pakkujt mund t’i shkojnë. Të tjerët duken si karnavale kur i tentojnë.

Cili është udhëtimi yt i preferuar?

Vizita në vende që i adhuroj, p.sh., Paris, Nju Jork, Vjenë etj.

Në ç’rast mund të gënjesh?

E urrej gënjeshtrën kur e has nga të tjerët, prandaj dhe e luftoj te vetja. S’mund të them raste të veçanta për ta përdorur, por mund të ketë ndodhur për gjëra të parëndësishme. P.sh., në rast vonese, ndodh shpeshpërdorimi i shprehjes: “Kishte shumë trafik”. Ndonëse tashmë kjo çështje përbën shumë më shpesh një realitet sesa gënjeshtër.

Personi që përçmon më shumë?

Sigurisht që ka të tillë, por s’do të ishte etike të deklaroja emër. Në parim ma shpifin pseudo-intelektualët apo dordolecët publikë, që pretendojnë se mund të japin mend për të tjerët apo për më tepër “të na shpëtojnë të gjithëve nga të gjitha të këqijat!”.

Cilat fjalë ose shprehje përdor më shpesh?

“E kuptove?”, “ Kaq ishte çështja!”. Preferoj të komunikoj në rrethin tim shoqëror me termat: “E çuno!” apo “E goce!”, pavarësisht nga mosha. Më pëlqen që në jetën e përditshme të përdor fjalorin autokton “tirons”: “U kry!”, “Ah, bukur fort, re telef t’u punu!”, “Kujdes, se u kpute!”, “E ke qa fare zanotin!”, “Sa i ftillum që je!” etj.

Pengu yt më i madh?

Të kisha krijuar “Partinë e Femrave Shqiptare”.

Kur dhe ku ke qenë e lumtur?

Kur kam lindur tim bir. Dy vendet ku kam jetuar më gjatë janë Tirana (ku dhe kam lindur) dhe Parisi (ku kam kryer studimet pasuniversitare). Në të dy këto vende kam përjetuar momente lumturie.

Në ç’gjendje shpirtërore je tani?

Yll fare!

Nëse do të mundeshe të ndryshoje diçka te vetja, çfarë do ishte ajo?

Me veten jam ok, s’më pëlqen të ndryshoj gjë. M’i ka dhënë Perëndia çfarë më duhet më shumë.

Ç’gjë e konsideron arritjen tënde më të madhe?

Fitimi i bursës për studime në Francë (mars 1989). Ishte një sfidë e vërtetë të kapërceje kufijtë e një vendi që “jetonte e punonte si në rrethim”, ndonëse, kur unë e arrita këtë, themelet e sistemit të diktaturës kishin filluar rrëshqitjen e pakthyeshme.

Po të vdisje dhe të mund të rimishëroheshe në një tjetër njeri apo diçka tjetër, çfarë do doje të ishe?

Asgjë më shumë se kjo që jam.

Po sikur të mund shndërroheshe në diçka, ç’do të doje?

Shkop magjik që të ndryshoja botën!

Cili është sendi më i çmuar që zotëron?

Një varëse me diamant. Ma kanë dhuruar prindërit për 40-vjetorin e lindjes.

Kë quan pikën më të thellë të mjerimit?

Vegjetimin njerëzor.

Ku do të të pëlqente të jetoje?

Aty ku kam lindur, jam rritur dhe jam rikthyer përsëri edhe nga shumë vende të mrekullueshme të botës, që kam pasur rastin të njoh: në Tiranën time!

Ndër veprimtaritë që merresh, cila është e preferuara jote?

Politikëbërja, komunikimi me njerëzit dhe përfaqësimi në Komunitetin Ndërkombëtar.

Cila është karakteristika jote më e spikatur?

Vullneti i hekurt!

Veçoria që pëlqen më shumë te një mashkull?

Burrëria!

Veçoria që pëlqen më shumë te një femër?

Feminiteti intelektual!

Cilët janë shkrimtarët e tu të preferuar?

Dikens, Hygo, Xhek London, Balzak, Migjeni, Konica etj.

Cili është heroi yt në art?

S’kam një të tillë.

Kë ke heronj në jetën reale?

Krenohem me Heroin e Kombit, Skënderbeun, dhe me të madhërishmen Nënë Terezë.

Cilat gjëra nuk të pëlqejnë fare?

E urrej vrasjen e kohës. Nuk më pëlqen të harxhoj kohën kot nëpër kafe apo klube, duke bërë thashetheme. Nuk më pëlqen të shoh telenovela. Nuk më pëlqen të merrem me jetën private të të tjerëve. Nuk më pëlqen të shtirem. Nuk më pëlqen të luaj bilardo apo lojëra fati.

Si do të pëlqeje të vdisje?

Si një shuarje fiziologjike e jetës, pa vuajtje!

Cila është motoja jote?

Sa të kesh takatin, puno sa më shumë, pa u ndalur. Gjithmonë punës ia sheh hajrin!Por dhe librin mos e hiq nga dora. Truri duhet kultivuar në vazhdimësi!