Dikur ishte një vajzë e zakonshme me ëndrrën për t’u bërë aktore. Sot Luiza Xhuvani është një nga aktoret më të mira shqiptare: ruan një formë të shkëlqyer fizike dhe rrezaton një sharm që nuk e ka pasur as në rini. Ja si u shndërrua ajo, nga një vajzë e thjeshtë që vinte nga një qytet i vogël, në një lady e vërtetë e kryeqytetit

Elda Laze

Kur prodhimet kinematografike të Kinostudios ishin i vetmi gëzim për sytë e shqiptarëve të etur  për kinema, aktore si Luiza Xhuvani nuk përbënin ndonjë interes të madh as për regjisorët dhe as për publikun. Kështu do të vazhdonte të ishte të paktën deri në suksesin e bujshëm të saj në filmin “Flutura në kabinën time”. Ndërsa përmirësimi i look-ut do të vononte edhe ca më shumë.

Në fillimet e saj, studentja e sapo diplomuar për aktrim nuk shquhej për ndonjë bukuri të rrallë, sidomos në një kohë kur fjala look ishte ende një fjalë e huaj, që në Shqipëri nuk ia dinin kuptimin.

E zhytur në fustanet tmerrësisht aseksuale të kohës, flokë të shkurtra e pa model nuk ishin maksimumi për imazhin e një aktoreje që kërkon role protagoniste.

Prandaj, në filmat si “Duaje emrin tënd” apo “Apasionata”, Luiza është shoqja e konviktit të Matilda Makoçit ose vajza provinciale në filmin ku protagonisten e luan Rajmona Bulku.

Por, pas suksesit të “Flutura në kabinën time” e martesës me regjisorin Gjergj Xhuvani, Luiza do të shndërrohej në një konkurrente e fortë (për të mos thënë një kërcënim i hapur) për koleget e saj.

Përmirësimi i imazhit do të vinte pak kohë më vonë se ngjitja në karrierë. Vetëm pas viteve ‘90 Luiza do t’i nënshtrohej (fundja si të gjitha gratë) vizitave te estetisti si dhe një operacioni të vogël estetik, që i dhuroi rreth dy vjet më parë një hundë të re e të harkuar në formë të lugët.

Dhe nëse është e vërtetë që “veshja është pjesë e personalitetit”, në rastin e aktores 45-vjeçare, duhet thënë se ka një personalitet të dyfishtë. Sepse veshjet e saj herë janë të admirueshme e herë lënë për të dëshiruar. Vijë të mesme nuk ka.

Por në këtë retrospektivë, ndryshimet e Luiza Xhuvanit janë veç për mirë, si në profesion, po aq edhe në imazh. Nga një vajzë e zakonshme, që vinte nga qyteti i vogël i Sarandës, ajo u shndërrua në një nga femrat më sharmante të kryeqytetit dhe një nga aktoret më të mira shqiptare.

Fillimet e karrierës

Daljet e saj të para në ekran (në role dytësore ose episodike) nuk kanë lënë ndonjë gjurmë të rëndësishme në karrierën e saj si aktore. Studentja nga Saranda nuk ua mbushi menjëherë mendjen regjisorëve për ta zgjedhur në role kryesore. Në të njëjtën kohë, kolege të saj, si Rajmonda Bulku, Matilda Makoçi apo Anisa Markarian kishin rrëmbyer disa role të tilla. Në rastin e aktoreve në fjalë, një arsye fort me rëndësi në përzgjedhjen e tyre kanë qenë pikat e dobëta të regjisorëve, qoftë për sytë e njërës apo sensualitetin e tjetrës. Por bumerangu i vërtetë për Luizën nuk vonon. Ajo vjedh vëmendjen e të gjithëve kur shfaqet përkrah Ndriçim Xhepës në filmin e suksesshëm “Flutura në kabinën time”. Filmi bëri bujë të madhe, ndërsa Luiza u konsiderua një zbulim. Roli (një mësuese e ndrojtur fshati) përputhej përsosmërisht me imazhin e vërtetë që përcillte pamja e saj: një vajzë e virtytshme nga provinca, me një buzëqeshje të ndrojtur e sy-përdhe, që skuqej sa herë që shoferi i kamionit i hidhte ndonjë ngacmim...

Gruaja e regjisorit

Pasi shfaq talentin e padiskutueshëm si aktore në filmin “Flutura në kabinën time”, Luiza sërish nuk mund të ndryshonte shumë nga vetja. Ajo vazhdonte të mos kishte shikimin magjepsës të Rajmondës e as feminilitetin e brishtë, por joshës, të Matilda Makoçit. E megjithatë, shumë shpejt arriti të spostonte si njërën, ashtu edhe tjetrën. Sepse rolet më të mira filluan të bëheshin të sajat. Në këtë koleksion të pafund, protagonizmi, meritat i shkonin padyshim talentit, por edhe martesës me regjisorin Gjergj Xhuvani. Një martesë që, veç dashurisë së jetës, asaj i solli edhe një numër të konsiderueshëm rolesh kryesore në teatër dhe në filma.

Por edhe interpretimet e saj nuk zhgënjyen kurrë regjisorët. Gjithnjë e më shumë ajo shfaqte potencialitetin si një aktore e lindur. Bashkëpunimet më të suksesshme të bashkëshortëve Xhuvani janë edhe filmat: “I dashur armik”, “Funeral business”, “Parullat”, “Një ditë nga një jetë”, “E diela e fundit”, “Bardhezi” etj.

Edhe imazhi ka rëndësi

Ndërsa ishte bërë një aktore e njohur, Luizës i mungonte edhe një gjë tjetër, që disa mund ta quajnë sipërfaqësore, por që mbetet shumë e rëndësishme për njerëzit e ekranit: imazhi.

Aktorja, tashmë e njohur vetëm pas viteve ’90, do t’i kushtonte rëndësinë e duhur look-ut dhe veshjeve. Rezultati nuk ishte ndonjë surprizë e madhe, por përmirësimet mbeten për t’u lavdëruar.

Si shumë femra shqiptare, as ajo nuk i shpëtoi dot dëshirës për t’u bërë sikur qoftë njëherë bionde. Ndërsa modelin e flokëve nuk e ngacmoi kurrë aq shumë sa të quhej një stilim i ri flokësh. Bëri disa eksperimente të vockla – po të vockla fare ama – me balluket, por nuk ka lëvizur shumë nga modeli i flokëve të prera me shkallëzim e që arrijnë deri në supe.

Përsa i përket garderobës, nuk shfaqi kurrë ndonjë stil absolutisht vetëm të sajin. Rrobat duket sikur i ble tek e tek, pa pasur ide të qarta se me çfarë mund të kombinohen. Megjithatë, në disa evente të rëndësishme, Luiza është shquar në përzgjedhjen e veshjeve dhe aksesorëve, duke treguar goxha “zonjëllëk”. Por, po aq herë “ia ka shkelur” me kombinime që nuk i shkonin as ambientit dhe as orëve të vona të mbrëmjes.