Janë tipa sportivë, që nuk duan t’ia dinë për ato manitë e zyrtarëve për këmishën e akullt e manshetat e shkëlqyeshme. Por në disa evente dhe atyre u duhet të vishen me kostum e të kollarisen për t’u dukur... jo më pak të hijshëm

Brad Pitt

Shfaqet shpesh casual, sepse një bukuroshi të përjetshëm, si ai, i rrinë për bukuri T-shirt-et, edhe kur janë të rrudhosura si të sapodala nga lavatriçja. Mund të shtojë ndonjë beretë si për t’i vënë kapakun një stili që s’ka pse të jetë shumë i sofistikuar për ta bërë të bjerë në sy dhe... rrugë e hapur një jete prej aktivisti dhe babai të përkushtuar. Por ama, në eventet që aktorit i duhet të shkelë mbi tapetin e kuq, lirshmërinë e asaj bluze të rrudhosur duhet ta lërë mënjanë, për t’u shfaqur me kostum e krehje serioze. Ju mund të zgjidhni, por edhe të thoni thjesht se ai mbetet i bukur, sido që të vishet.

George Clooney

Jo se kostumi ka një moshë të përcaktuar për ata që e mbajnë, por gjithsesi një 40 e ca-vjeçari i shkon më për shtat se një 20 e ca-vjeçari. Por kur ata të parët bëjnë jetën e këtyre të dytëve, atëherë llogaritë ngatërrohen. Sikur të themi se po flitet për George Clooney, çdo gjë bëhet lëmsh fare, sepse ai është një nga ata meshkuj që nuk heqin dorë prej stilit të një të riu: as në joshje (që ndoshta rritet me ato thinjat e vjetra që janë shtuar), as në veshjen thuajse përherë casual (këmishët rrallë i kopsit deri në fund), madje as prej beqarisë zyrtare të një mashkulli që nuk lidhet lehtë me zinxhirë e as me kravatë. Por kur rasti e do, di të të lërë pa frymë edhe ashtu.

David Beckham

Performancat e tij janë një katalog i vërtetë e i gjallë stili, si për modelin e flokëve, si për veshjen. Jo vetëm bota e futbollit, por krejt ajo mashkullore e ka të rrallë një fenomen si Beckham-i. Sepse ai ka “2 në 1” fizikun e përshtatshëm dhe stilin e pakrahasueshëm, që e bëjnë imazhin e tij një produkt final të suksesshëm. Dhe babai i tre djemve nuk lodhet së eksperimentuari: që nga veshjet më sportive (nuk llogaritet “uniforma e detyrueshme punës”) deri te ato më elegantet, por këto të fundit sigurisht për një rast që e kërkon një impenjim të tillë. Dhe, edhe në këtë fushë, ai zbret triumfator, pse jo me këpucët e tij “magjike”: atletet.

Justin Timberlake

Ndoshta për shkak se u bë i njohur kur ishte pjesë e grupit amerikan “N’Sync”, të formuar nga 5 djem të veshur me rroba sportive, që u shkonin për shtat muzikës pop dhe moshës së tyre të re; ndoshta për shkak të fytyrës së tij fëminore, që e bën të duket përherë adoleshent, Justin na vjen në mendje me stilin e vet sportiv. Por me kalimin e viteve ai ka ndërtuar një stil të vetin, për të cilin, mesa duket, i ka pëlqyer kontrasti i asaj fytyrës fëminore me veshjen elegante të kostumeve e këmishëve mbërthyer deri në kopsën e fundit, që rri poshtë kravatave apo papijonëve. Nuk ke çfarë thua: një burrë i vërtetë, pas të cilit kanë humbur mendjen dhe aktoret Cameron Diaz e së fundmi Jessica Biel.

Memli Krasniqi

Një hip hop-ist që zgjidhet deputet duket se do të thotë dhe një djalë që mbyll në kuti gjithë veshjet sportive dhe mbush sirtarët me kravata e varëset me kostume e këmishë. Por Memli Krasniqi, deputeti i Parlamentit të ri të Kosovës, i njohur si një nga djemtë e grupit kosovar “Ritmi i rrugës”, nuk ka hequr dorë nga veshjet sportive. Ato janë më pranë stilit dhe moshës së tij. Ndërsa, kur angazhimet serioze e thërrasin, një xhaketë e zbërthyer do mjaftonte. Përveç rastit kur prezantimi serioz është i detyrueshëm, si për shembull, në posterat e fushatës. Në një rast si ky i duhet të shtrëngojë kollaren dhe të kuptojë se koha kur shtrëngonte bishtin e flokëve ka ikur. 

Ben Affleck

Është tip sportiv deri në ekstrem. Jo thjesht atlete, por dhe ato të tipit “All stars”; jo thjesht T-shirt, por dhe dy njëra mbi tjetrën; jo thjesht pantallona sportive, por të gjera e me shumë xhepa; jo model i çrregullt flokësh, por dhe një kapele sportive rrasur në kokë; jo thjesht mjekër, por shpesh dhe e lënë shkujdesur. Në mos në këtë, në foto të tjera të Affleck-ut, do ta dalloni këtë stil të tij në të tëra detajet. Por ama, kur nuk është në shëtitje me familjen e tij as në shesh-xhirim, as në stadium, por në eventet Gala të Hollivudit, edhe ai shfaqet me variantin e tij serioz brenda kostumit elegant, që nuk ka pse të mos i shkojë.

Foto Strakosha

Pasi pozoi për revistën “One”, ish-portieri i kombëtares sonë të futbollit, përvojës së asaj dite i kaloi një mendim reflektiv në mbrëmje dhe të nesërmen në mëngjes vendosi të bënte disa foto të tjera. Ditën e parë ishte i veshur me xhinse dhe me një bluzë me vija, ndërsa të nesërmen Fotoja kishte nxjerrë nga valixhja e qëndrimit disaditor në Shqipëri kostumin, këmishën dhe kravatën; kishte eliminuar çdo gjurmë të mjekrës së rritur dhe kush do ta besonte më që “sport”-in e ka aq shumë në gjak! Dhe nuk i shkoi kot impenjimi: portieri ynë qëndroi një muaj në kopertinën e revistës ashtu si pakkush e kishte parë: të kollarisur!

West Side Family

Po i përmbledhim në një paragraf të tre djemtë e grupit të hip hop-it, për vetë faktin se kur performojnë janë që të tre brenda të njëjtit stil, për mos të thënë brenda të njëjtave lloje veshjesh, që dallojnë mes tyre nga përmasat trupore të secilit. Fillimisht, kur as muzika nuk ishte mësuar me hip hop-in, as skena me djemtë që bënin rimë, edhe kostumografët dukej se ishin duke eksperimentuar me ato kostumet e gjëra sportive me shirita të ndritshëm e modele më skenike sesa duhet. Por se çfarë është skenike, më vonë e kuptuan mirë. Dhe pse këngëtarë hip hop-i apo djem sportivë dhe në jetën e përditshme, kur bëhet fjalë për një baladë të ndjerë në një skenë prestigjioze, kostumi elegant “total white” është i përshtatshëm.

Florian Mumajesi

Kur thuajse rritesh në skenë, siç i ka ndodhur Florian Mumajesit, nuk mund të pretendosh të mos jesh në kujtesën e të tërëve me evoluimin e stilit, që për djalin e shfaqur fillimisht në grupin “The dreams” nuk është e vështirë të vihet re. Jo vetëm për t’iu përshtatur muzikës, por dhe duke qenë brenda moshës së adoleshencës, Flori vishej plotësisht sportiv. Dhe vazhdon të mbajë këtë stil dhe sot, derisa vjen një rast kur, për të respektuar skenën, një këngë kushtuar nënave ose thjesht për të treguar se është rritur në të gjitha kuptimet, ai i lejon vetes një kostum. Dhe di ta përballojë edhe këtë provë me sukses.