E para, duhet të lindësh si Valbona Selimllari. E dyta, nuk duhet të biesh viktimë e tendencave ekstreme të modës. E treta… më mirë lëre fare këtë punë. Sepse përjetësisht e bukur si Bobi ndodh një herë në një milion

Elda Laze

 
Nuk ka ndryshuar fare nga koha kur u shpall Miss Albania 1991. Valbona Selimllari vazhdon të mbetet po aq e bukur sa 17 vjet më parë, po aq e dashur për publikun, megjithëse ka ruajtur një look thuajse konstant. 

E bukur por e thjeshtë, Valbona i  ka shpëtuar modës dhe make up-it ekstrem të viteve ‘90, eksperimenteve me ngjyra dhe modeleve të çmendura të flokëve. Ajo nuk ka provuar as modelin standard “flokët bishtpëllumb” (që nuk mbeti femër pa i provuar në fillim të viteve ‘90) e as kaçurrelat e korrentit. Njëkohësisht, mënjanoi konturet e theksuara të buzëve me lapsin e zi të syve dhe të kuqen provinciale të faqeve. E megjithatë, që nga koha kur doli për herë të parë me rroba banje, e deri në sofistikimin perfekt që shfaqi në show-n televiziv “C’est la vie”, Bobi ndryshime ka pasur (sado të vogla).

Përsëri nuk ju kujtohen? Sigurisht, sepse duket sikur ka lindur për të qenë përjetësisht e bukur.

Por ja cilat janë disa nga ato ndryshimet e vockla, që vetëm pasi ke shtrydhur mirë e mirë trurin, të vijnë ndërmend.

Vetëm me rroba banje

Organizimi i të parit spektakël bukurie në Shqipëri ishte një nga ngjarjet më të bujshme të vendit tonë. Po, po! Në atë kohë, organizimi i “Miss Albania”-s bëri vërtet bujë. Ajka e spektaklit padiskutim mbajti emrin e Valbona Selimllarit. Veshur me një palë rroba banje nga më modestet, ajo shfaqi elegancë, brishtësi, thjeshtësi dhe druajtjen e një vajze që ndoshta kishte guxuar më shumë se sa duhet. Guximi i hapur, fshehur brenda një kostumi banje, vajzës nga Tirana nuk i doli keq. Ajo u shndërrua menjëherë në të parin simbol bukurie të femrës shqiptare, si dhe pati shumë... shumë favore të tjera, që sot do t’i kishte zili çdo Miss.

Flokë të prera shkurt

Kështu i ka pasur vetëm njëherë në jetën e saj. Një prerje fare shkurt e flokëve në stil djaloshar (tendencë që u rikthyer edhe gjatë verës 2007) u imitua nga shumë femra të zakonshme, të cilat u mahnitën nga look-u i ri i Miss-it. Dakord! Ndoshta jo të gjitha morën të njëjtën kënaqësi nga ky ndryshim, por morën guximin t’u vinin gërshërët flokëve, sepse Valbonës ky model i shkonte shumë.

Tiparet e rregullta dhe forma e bukur e kokës e tregonin Miss-in joshëse, megjithëse në një mënyrë të re. Por Valbona nuk qëndroi gjatë me flokë të prera kaq shkurt.  E ndërsa çdo ditë gjatësia e flokëve arrinte supet, sërish vjen radha për prerjen e re në stilin “presje” (ashtu siç janë shndërruar sot të gjitha femrat VIP kudo në botë e që nuk la femër shqiptare, VIP ose jo, pa e provuar). Por edhe kjo herë kaloi aq shpejt sa vështirë se gjen njeri që e kujton Bonën me flokë “presje”.

Prezantueset e spektakleve veshin fustane…

Nuk është rregull i shkruar, është nga ato të pashkruarit, nga ato që zbatohet pa shumë ojna. Si prezantuese, duhet thënë se Valbona nuk shkëlqeu dhe aq nga oratoria, por të paktën fustanet i veshi të bukura. Të gjithë i mbajnë mend spektaklet e regjisores Vera Grabocka me numrin dymbëdhjetë. E nëse mbahen mend ato, nuk ka sesi të jetë harruar që Selimllari ishte gjithmonë e pranishme.

Fillimisht, asaj iu besua roli i prezantueses kryesore (nuk ka shumë nevojë të komentohet që Miss-i nuk kishte lindur për këtë punë, megjithë këmbënguljen e Vera Grabockës).

Dhe, siç e kërkon rregulli i pashkruar, Valbona-prezantuese provoi gjithfarësoj fustanesh, moderne për kohën, jo dhe aq demode sot. Megjithëse nuk spikati për ndonjë stil origjinal të sajin, u dallua në zgjedhjen e mirë dhe të paekzagjeruar të fustaneve.

Copërat me xixa ose shkëlqim, ngjyrat e ëmbla, lakuriqësia (e tipit “aq sa duhet”) e klasifikuan Valbonën, në mos në femrat-ikonë të modës, të paktën në ato që stili nuk u mungon.

Ndërsa një marrëdhënie e shkëlqyer me dentistin i dhuruan një buzëqeshje prej Barbie.

Si asistente regjisore

Si asistente regjisore, Miss Albania ‘91 nuk pati kohë për kokëçarje që lidhen me veshjet, vizitat te parukieri, manikyr, pedikyr etj. etj., sepse puna pas kuintave zuri rolin kryesor, duke spostuar rëndësinë kushtuar imazhit. Prandaj, Bobi filloi të shfaqej gjithmonë e më shumë me një palë xhinse të rehatshme, xhaketa serioze, dhe flokët mbledhur shkujdesshëm bisht. Të paktën kështu e panë zakonisht njerëzit me të cilët punoi. Por, kështu nuk e panë kurrë pjesa më e madhe e njerëzve, ata të cilët me një fjalë të vetme përmblidhen nën emrin “publik”. Sepse kur e donte puna për t’u shfaqur në publik, Bona nuk zhgënjeu asnjëherë. Në ekran ajo u shfaq gjithmonë me një look të kuruar mirë, buzëqeshje joshëse, fustane mbrëmjesh të denja për tapet të kuq, e jo dosido por aty ku shkelin diva Hollivudi.

Imazh i DEKA-s

Bobi është e preferuara e të gjithëve, prandaj Miss Albania 1991 bëhet nga të parat bukuroshe që përdori imazhin për të reklamuar produktet e një kompanie të madhe në Shqipëri. Bobi doli në ekran më shumë se asnjëherë tjetër, në çdo orë të ditës, në të gjitha spotet publicitare të kompanisë DEKA. Në reklama të ndryshme, nuk ngurroi të shfaqej si edukatore kopshti apo si amvisë seksi. Në të gjitha versionet, Valbona ishte po aq e bukur sa ditën kur u shpall Miss Albania 1991, megjithëse me më shumë se 10 vite mbi supe.

Sepse Valbona nuk është nga ato maniaket e ndryshimeve drastike dhe nuk bie kurrë viktimë e tendencave ekstreme të modës, që ca vite më pas duken nga më qesharaket. Duke ruajtur një look gati konstant, por të këndshëm, një gardërobë të pasur, por të thjeshtë, ajo është një ndër femrat e preferuara edhe të kritikëve (atyre gojëligëve) të modës.

Një geishë në “C’est la vie”

Në spektaklin televiziv “C’est la vie”, Bobi i çuditi të gjithë me vokalin e saj. Po aq çuditi me aftësinë për të dalë në skenë gjithmonë ndryshe. Një kameleon i vërtetë, që ndryshonte gjithmonë look dhe stil, u duk mirë, si në stilin klasik francez, edhe në sofistikimin britanik apo kur tregoi dekoltenë joshëse të një napoletaneje.

Gjithmonë zgjedhja e gardërobës u kombinua me krehjen e flokëve dhe një make-up perfekt. Me këtë të fundit ajo ka vite që merret vetë. Ia ka marrë dorën kaq mirë konturimit të syve, penelit, rimelit e gjithë trukeve të grimit, sa shpeshherë koleget e saj drejtohen te Bobi, kur vjen puna për make-up.

Një nga shndërrimet e saj më mbresëlënëse në “Cest la vie” ishte look-u i geishës: një këmishë në formë kimonoje, e kombinuar këndshëm me një fund treçerekësh të zi, ndërsa balluket e gjata i mbulonin sytë, që dukeshin si të tërhequr, pjesë e një make up-i perfekt. Një kontur i zi rreth syve, mollëza të theksuara me rouge, buzë të kuqe flakë, por të theksuara drejt qendrës. Rezultati? Një geishë e kohërave moderne… dhe e bukur… si gjithmonë, shumë e bukur.