Sa i duam lulet!

Zambakë uji, trëndafila e mimoza. Nuk po flasim për ndonjë kopsht me lule, por për të preferuarat e personazheve të ekranit dhe modës. Nëse dikush do të donte t’u dhuronte lule, ja se ç’duhet të zgjedhë

A mund t’i thuash “jo” një tufe me lule, aq më pak kur të dhurohet? Të gjitha vajzat do të ishin në një mendje: “Jo!”. Sigurisht që është nga ato dhuratat që të bëjnë të ndihesh e përkëdhelur. Ama kur të dhurojnë pikërisht lulet që të pëlqejnë më shumë, ke arsye për t’u ndier në qiellin e shtatë. Do donit të dinit se ç’petale nuhasin disa nga personazhet e njohur të ekranit? Revista “Jeta” i ka zbuluar.

Kur Enada stilon mimozat  

Nuk pret gjatë Enada At’ Nikolla të ndiejë se pranvera ka ardhur. Fillon ta shijojë që në ditët e para të shkurtit, kur shpërthejnë mimozat. Ato lulet e vockla e delikate në ngjyrë të verdhë me aroma dehëse janë të preferuarat e Enadës. E që ndonjëherë i zgjon edhe ndjesi të ëmbla. “Më kujtohet dikur holli luksoz i një hoteli në Monte Karlo i mbushur me mimoza dhe mendova: tani janë në vendin e vet. E teksa prisnim të plotësonim formularët në holl, kisha një dëshirë aq të madhe që të këpusja një degëz!”. Por po flasim për një stiliste, që me ngjyrat ka një histori të gjatë dashurie. E verdha është një prej tyre, sepse i ngjan mimozave, që, nëse nuk do të kishin atë aromë që kanë, ndoshta nuk do t’i pëlqenin dhe aq shumë.

Trëndafilat që ka Shkodra

Dikur, kur ishte e vogël, dilte në mëngjes herët në oborrin e shtëpisë së saj në Shkodër dhe i këpuste ndërsa ishin ende të përlotur nga vesa e mëngjesit. Zgjidhte trëndafilat më të kuq, më të bukur dhe pastaj ua dhuronte mësueseve. Tani Rosela Gjylbegu nuk është më ajo vajza e vogël. Me siguri e merr malli për trëndafilat e kuq të kopshtit, tani që shtëpia e saj nuk është më në Shkodër. Ndoshta për këtë arsye kanë ngelur të preferuarit e saj. “Trëndafilat e kuq janë shumë të bukur. Më japin një ndjesi të veçantë, të cilën s’ka pak ditë që e provova nga një tufë e madhe që më dhuruan”. Kush ia ka dhuruar e ka ditur mirë ç’të zgjedhë.

Mjafton të jetë orkide

Nuk di të ndajë se cilën ngjyrë do të preferonte mes të gjitha nuancave: rozën, të bardhën apo të verdhën. Për të do të ishte zgjedhje e vështirë. Sepse Anjeza Maja di të thotë vetëm kaq: orkideja është lulja që do ta zgjidhte mes qindra të tjerave. “Më pëlqen gjithçka tek ajo lule: emri, ngjyra, forma, aroma. Më duket shumë e brishtë, shumë e këndshme, gati e adhurueshme”. E nëse ndokush do kishte një mesazh të veçantë për t’i dhënë Anjezës, ne ju japim një këshillë: thuajani me lule! Zgjidhni orkidetë!  

Të pikturuar nga Albana

Ndoshta teksa i hidhte mbi telajo i është ngulitur ndër ndjesitë më të këndshme. Ka ndodhur shpesh që Albana Osmani, që ka studiuar për pikturë, të gjendet me penel në dorë, duke pikturuar pikërisht ca zambakë uji. E kur e pyet se cila është lulja e preferuar e atë ditë që e pyet është një ditë pranvere e dielli shkëlqen, para se të të përgjigjet, në udhëtimin e mendjes është nisur buzë ndonjë liqeni, duke soditur gjatë sipërfaqen ujore mbuluar nga zambakët. “Janë aq të bukur, melankolikë, shumë të vështirë për t’u mbledhur e për t’u bërë dhuratë. Në një ditë të ngrohtë nuk do doja gjë tjetër veçse të isha e vetme, duke shijuar pamjen e zambakëve të ujit. Më bën të ndihem vërtet mirë”. Kur e thotë një piktore…!

Hygerta zgjedh jargavanët

Janë gjëja që i shijon më shumë një udhëtimi pranveror në bregdetin e Dhërmiut. Bukuria e jargavanëve, të cilët zvarriten nëpër oborret e vilave verore e u japin hijeshi kopshteve. E nëse Hygerta Sako do kishte një shtëpi të vogël me gardh të bardhë e kopsht të gjelbër, do ta mbillte plot me jargavanë që, kur të lulëzonin, shtëpia e saj të ishte më e bukura. “I shijoj shumë kur ndodhem jashtë Tirane, në Dhërmi. Ato degëzat e mbushura plot me lule të vockla më krijojnë një ndjesi vërtet të veçantë”. E pra, nëse do t’i duhej të zgjidhte mes të preferuarave të saj: akacieve për aromë, trëndafilave për dhuratë e jargavanëve për bukuri, Hygerta zgjedh këta të fundit.