-Pirateria është një fenomen i cili po e godet sot tregun muzikor shqiptar. Cili është komenti juaj për këtë situatë?
Unë do të shprehesha për piraterinë jo vetëm si një krijues me vepra të muzikës së lehtë po dhe në muzikën simfonike. Ky është një problem shumë i madh për sa i përket tregut muzikor dhe do të thosha që është një fenomen i mbrapshtë tek ne sepse shitet muzikë e huaj pa marrë asnjë lloj leje, asnjë lloj konfirmimi nga shtëpitë diskografike që i disponojnë këto jashtë vendit tonë. Për sa i përket muzikës shqiptare që në fillimet pas viteve ’90 ndodhi një fenomen shumë i çuditshëm që këngëtarë jo të muzikës së lehtë, por ata popullore morën këngë nga shumë këngëtarë dhe kompozitorë ballkanas dhe i shitën si krijimtarinë e tyre. Kjo normalisht bëri që në treg të hynte muzikë e huaj e përkthyer në shqip dhe nuk dua të përmend emra këngëtarësh ose shtëpi diskografike, por kjo gjë i bëri një dëm shumë të madh muzikës kombëtare popullore, sepse pas viteve ’90 nuk pati më krijime të mirëfillta popullore pasi munguan kompozitorët, disa nuk jetonin më dhe disa munguan nga ky lloj tregu i pisët që u shfaq në muzikën shqiptare. Për këtë situatë fajin kryesor dhe këtë dua ta theksoj e kanë shtëpitë diskografike që u munduan që të pasurohen më këta këngëtarë dhe nuk panë fare se çfarë fenomeni po ndodhte me muzikën shqiptare dhe nga kjo pati një rënie të muzikës së lehtë shqiptare. Duke qenë një popull në Ballkan, duke dëgjuar një këngë të bukur greke ose turke të përkthyer normalisht që popullit shqiptar do ti pëlqente ajo lloj muzike dhe do ta blinte. Por në këtë rast pati faj dhe shteti në atë kohë sepse ishte një shtet i ri demokrat dhe nuk mund ta gjykojmë në ato vite sepse çdo shtet i ri bën gabimet e veta dhe janë bërë gabime në shumë fusha të tjera dhe jo më në art që nuk e kishte mendjen njeri. Kjo zyra e autorit që është sot duhet të ishte hapur që në vitet ’91-’92. Këngëtarët e muzikës së lehtë e shikojnë shumë të vështirë duke filluar që nga unë, që të krijojnë muzikë dhe të fillojnë që të shesin muzikë. Kohët e fundit vë re që disa nga muzikantët e mirëfilltë të muzikës shqiptare kanë filluar që të rrëshqasin duke futur në këngët e tyre pak orient dhe kjo gjë bëhet vetëm për tu shitur CD dhe kjo është diçka komerciale. Unë do ti bëj thirrje dhe këtyre kolegëve të mi që të mos ta prishin muzikën e tyre për të fituar pesë lekë më shumë sot. I bëj thirrje ZSHDA që të vendosi pikat mbi “i” nëse e quan veten një zyrë shtetërore dhe një zyrë të mirëfilltë për të mbrojtur të drejtat e autorit. Për piraterinë në tregun muzikor mendoj se faji është i shtetit dhe i strukturave të Ministrisë së Kulturës. Shpresoj që ministria të vëri dorë akoma më tepër në licencimin e shtëpive diskografike. Të ketë veton dhe pa firmën e Ministrisë së Kulturës të mos dalë asnjë CD muzikore në treg sepse po prishet dhe po degradohet muzika kombëtare shqiptare.

-Si një njeri artist aktiv në muzikën shqiptare cilat janë disa masa që duhen ndërmarrë që ky fenomen të mos jetë kaq i përhapur?
Zyra Shqiptare e të Drejtave të Autorit në Ministrinë e Kulturës ka filluar që të marrë disa masa, por këto janë vetëm masat fillestare dhe shpresoj që vetë ZSHDA që ndodhet pranë kësaj ministrie duhet që të bëjë dhe një bord artistësh për të licencuar çdo CD që del në treg, pavarësisht muzikës që ndodhet në atë CD. Me këtë dua që të them se tani po dalin këngëtarë nga hiçi që mund të jenë shofer autobusësh ose duke punuar punëtorë krahu në Greqi, nuk dua që ti paragjykoj, por atë punë mund ta bëjnë shumë mirë. Ndërkaq që vetëm me teknologjinë e studiove të inçizimit që ka ardhur sot në Shqipëri bëhen këngëtarë dhe kur i dëgjon live zhgënjehesh. Pra me këtë dua të them e ky bord drejtues të liçensojë këta këngëtarë dhe kompozitorë për tregun e shitjes. Demokracia ka liritë e veta, por ne shqiptarët e kemi kuptuar ndryshe. Demokracia me të vërtetë është liri veprimi dhe liri fjale, por dhe tregu dhe çdo gjë tjetër në këtë demokraci duhet që të jenë të kontrolluara. Nuk duhet që të ketë më që di unë të këndoj dy llafe, një këngë greke dhe hajde se u bëra këngëtarë.

-Meqë po flasim për këngët si e shpjegoni që megjithëse për këto këngë ka shumë kritikë nga artistë të ndryshëm dhe të njohur, por ato akoma janë shumë të pëlqyera për publikun?
Për mendimin tim si e thashë dhe pak më lart duhet patjetër një bord drejtues që të liçensojë këto albume dhe këto vidioklipe që dalin në treg. Për mendimin tim fajin për këtë fenomen e kanë shtëpitë diskografike që mendojnë vetëm për të futur lekët në xhep, po ashtu dhe televizionet që kanë futur në programet e tyre muzikë rome dhe i kanë publikuar aq sa më vjen keq që të rinjtë shqiptarë dëgjojnë ose preferojnë këngëtarë të ardhur nga Maqedonia me atë muzikë të pakuptimtë gjë e cila e dëmton muzikën shqiptare dhe e ka dëmtuar. Sot të rinjtë nëpër pube më vjen keq që e them por ata dëgjojnë vetëm muzikë rome.

-Sipas jush sa respektohen sot të drejtat e autorit në Shqipëri?
Të drejtat autorit sot në vendin tonë unë mendoj se respektohen nga 10 deri 20 përqind.

-Si shikoni funksionin e ZSHDA sot në tregun muzikor shqiptar?
Unë mendoj se kjo zyrë ka filluar që të funksionojë dhe po eci me këto ritme them që do ta bëjë punën e saj deri në 100 përqind.

-Shumë pak artistë reagojnë ndaj këtij fenomeni. Si e shpjegoni këtë?
Mendoj se këta artistë, këngëtarët fitojnë ato lekë sot, por më pas kam përshtypjen se do të fillojnë dhe ata që të ngrenë zërin.

-Rryma muzikore turbo-folk vazhdon që të jetë akoma me “sukses” në tregun muzikor shqiptar. Cila janë pasojat e kësaj rryme në muzikën shqiptare?
Mendoj që këngët tona popullore janë aq të bukura sa që në çdo lloj mënyre ti interpretosh ato janë aq të bukura vetë. Nuk është merita e asnjë kompozitori dhe orkestruesi shqiptar që thotë jo po e kemi bërë tubo-folk dhe asnjë këngëtari shqiptar që thotë e kemi bërë këtë këngë turbo-folk dhe shiko sa e bukur është, pasi është vetë muzika jonë e bukur në çdo lloj mënyre ta konceptosh ajo është vetë bukur. Mund të them që disa “orkestrues” ose disa “këngëtarë” kanë bërë turbo-folk, por i kanë prishur këngët tona popullore. Më vjen keq për këtë lloj iniciative që shteti shqiptar nuk e ka mbrojtur deri më sot.

-Nëse do të vazhdohet kështu cilat do të jenë pasojat në muzikën shqiptare?
Një popull shikohet dhe vlerësohet nga kultura. Nëse vazhdon kjo gjendje me muzikën shqiptare nuk do të njihet më Shqipëri, Maqedoni, Greqi apo Serbi, pasi do të jetë thjesht vetëm muzikë ballkanike. Ne nuk do të kemi më identitet dhe është gjynah sepse jemi një nga popujt më të lashtë të botës.

-Në fushën e muzikës do të kemi ndonjë projekt muzikor nga ju?
Unë nuk dua që të flas shumë për projektet e mia, por në një bashkëpunim me një libretist italian kam dëshirë që me ndihmën e Institutit Italian të Kulturës që të realizoj një muzikal shqiptar. Kjo është e munguar tek ne dhe shpresoj që ta realizoj brenda një viti.