Jemi mësuar ta shohim veçse kështu: të mbërthyer deri në fyt, me këmishë të kollarisur dhe kostum. Sigurisht, përderisa deri më sot asnjë spiker s’ka guxuar të lexojë lajmet veshur me xhinse dhe t-shirt. Vetëm se për Drini Zeqon veshja e kostumit pesë minuta para fillimit të edicionit të lajmeve është kthyer në një ritual, që zëvendëson vetëm për 30 minuta veshjen e tij të përhershme: atlete, xhinse dhe t-shirt, rrallë ndonjë këmishë sportive, si kjo që kishte veshur për setin e fotografive. Sepse në të vërtetë ai është tip sportiv. Qetësohuni! Kjo vetëm përsa i përket veshjes. Sepse gjithë të tjerat mund të etiketohen thjesht dhe vetëm me një emërues të përbashkët: serioz.

Klaudeta Skënderasi  

Nëse e kujtoni si djalin trendy që drejtonte në Top Channel emisionin për të rinj “Top Select”, kjo ka qenë thjesht kohë e shkuar. Propozimit për t’u ulur në studion e lajmeve për hir të zërit të tij brilant, Drini do t’i dorëzohej pa kushte e, bashkë me të, edhe studimeve për gazetari, duke lënë pas krahëve të mesmen për Ekonomi dhe dy vjet studime në Gjermani për të njëjtën degë. “Ndërkohë, bota e televizionit dhe e lajmeve më kishte përfshirë. S’mund të bëja tjetër, veçse të ndiqja instinktin tim”.

Dhe filloi kështu një profesion, i cili sa hap e mbyll sytë do ta bënte edhe të njohur. Sepse që prej pesë vjetësh ka qenë spiker lajmesh në Top Channel, pastaj në Alsat dhe së fundmi në TV Klan. Por kjo për Drinin nuk shkon më tutje sesa një kënaqësi që e shijon thjesht, pa marrë për kot. Sigurisht që ai nuk mund të bëjë si spikeret e lajmeve të flasin me duar e me këmbë. Ka preferuar figurën e një spikeri serioz, që pavarësisht se shfaqet çdo ditë në ekran, të dalë nga vetja nuk i është dukur kurrë diçka që mund të bëhet. Edhe një herë që iu dha mundësia para tre vjetësh për të prezantuar festivalin e TVSH-së me Soni Malajn, Drini preferoi të ishte po i njëjti, pavarësisht se kjo mund të shërbente si shtrati për t’u hedhur me të dyja këmbët në spektakël, siç shumë të tjerë kanë bërë. “Unë jam kështu. Natyrë e qetë. E shijoj çdo gjë tjetër që më ofrohet, siç ishte edhe festivali, por pastaj kthehem sërish tek vendi im në studion e lajmeve”. Ka të tjera momente për të treguar se vlen. Për shembull, gjatë kronikave si gazetar i politikës apo gjatë lidhjeve direkte, teksa pasqyron një ngjarje. Sa për ato herët kur gazetat e thashethemeve e kanë lakuar për ndonjë lidhje me ndonjë vajzë, Drini nuk tregohet shumë entuziast. “Gazetat rozë as i stimuloj e as i evitoj”. S’mund të bëjë ndryshe. E ka ndërtuar tashmë figurën e tij televizive. Por jo rastësisht. Duke e përputhur me natyrën e tij të qetë dhe serioze. Si këtu në foto.

15 gjëra që nuk i keni ditur për Drinin  

Shtëpia 

I duhet të gjendet shpesh aty ku lajmi ndodh. Në mes të zhurmës. Edhe në mes të kaosit ndonjëherë, siç ishte për shembull tragjedia e Gërdecit, të cilën Drini e ka mbuluar drejtpërsëdrejti. E pas një dite të tillë, sigurisht që edhe për të ndjesia vlen po njësoj: shtëpi e ëmbla shtëpi. “Mundohem të lexoj kur jam në shtëpi. Ndërsa gjithnjë e më shumë i largohem televizorit”. S’ka ndonjë gjë të çuditshme këtu. Orë të tëra të kaluara në studiot e TV Klan-it; kthimi në shtëpi ia bën llogaritë qetësisht: brenda katër mureve, sa më larg ekranit.

Prindërit

Të ishte për të dy prindërit e tij, Drini më siguri tani do ishte bërë ekonomist. Madje, ç’është e vërteta, shijeve të tyre në fillim nuk u bëri naze asnjë çikë. Mbaroi të mesmen për Ekonomi dhe dy vjet shkollë të lartë në Gjermani, po për Ekonomi. Pastaj... pastaj nuk i shpëtoi dot tundimit për t’u bërë gazetar. Ishte më e fortë se ai. Dhe mami me babin nuk kishin si t’ia prishnin qejfin. E ç’mund të bënin ndryshe? Drini e kishte ndarë mendjen.

Dashuria

I bie një çikë rrotull bisedës kur vjen puna në këtë pikë. Citon ndonjë frazë të tipit: “Më pëlqen të jem i dashuruar edhe me gjërat e vogla. Dashuria ose është, ose nuk është, nuk mund ta kërkosh e më tej ta gjesh. Por në mendimin tim, të jesh i dashuruar është bukur. Lum kush di të dashurojë!”. Po pastaj s’ka nga t’ia mbajë kur e sheh se teoritë nuk i zënë vend. OK. Po jua themi edhe ju. Drini për momentin nuk është asnjë çikë i lidhur. Është në ato momentet, si i thonë: po shijoj vetminë. Mos e lini ta shijojë gjatë...

Albana Osmani

Thashetheme janë thënë shumë për një lidhje mes Drinit dhe Albana Osmanit. Të vërtetën e dinë vetë ata të dy. Por meqë kur kemi pyetur Albanën na ka thënë se me Drinin ka qenë një marrëdhënie simpatie, që nuk arriti të finalizohej me një lidhje dashurie, tani i takon Drinit të thotë edhe ai fjalën e tij. “Kemi ndarë emocione reciproke... Nuk më pëlqen që të vë emra për kohën që kaloj. Por në total do ta përkufizoja si një kohë të mirë, nga e cila ruaj kujtime të mira. Nuk ka pasur konturet e një lidhjeje të mirëfilltë, por ka qenë plot ndjesi të mira”. Epo ja, kaq ishte! Se na kishte ngelur merak...

Ekrani

Ata të dy janë mësuar prej kohësh me njëri-tjetrin. Por mos mendoni se pa të nuk bën dot, madje të ardhmen nuk e sheh aspak të lidhur ngushtësisht me të. “Dua të them që egoja ime profesionale do mbijetonte shumë mirë edhe pa ekranin. Mua më pëlqen të shkruaj dhe më pëlqen të ndodhem edhe në vizën ndarëse mes terrenit dhe ekranit. Por për sa kohë që kam, mendoj ta shijoj deri në fund. Ekrani është tejet selektiv, i ashpër, nuk të fal shumë. Mendoj që pjesë e ekranit mund të lindësh, nuk mendoj se bëhesh. Po kjo është dashuri më vete”.

Sporti

Një fizik i gjatë si i tiji, 1.93 cm, sigurisht që duhet t’ia dijë për faleminderit gjeneve të trashëguara dhe jo ndonjë aktiviteti sportiv të përhershëm. Po kjo s’do të thotë se Drini ka bërë llafe me sportin. Mundohet të shkojë çdo ditë në palestër. Ngre pesha, bën vrap, shfrytëzon edhe rastin për të krijuar miqësi të reja. Se ka shumë njerëz aty në palestër! Kurse tani që është verë, problemin e të qenit në lëvizje e ka të zgjidhur: bën not. “Më pëlqen shumë të notoj dhe të rri në ujë po aq shumë sa kur isha i vogël”.

Facebook

Eh... është infektuar edhe Drini nga i famshmi facebook, argëtimi virtual më i modës për momentin. “Është pjesë e kohës së lirë, kur nuk kam ç’të bëj. Përfitoj të merrem me ata miq që gjatë ditës nuk i takoj dot dhe interneti m’i sjell pranë”. Doni ta bëni Drinin shok? E thjeshtë. www.facebook.com. Fjalëkalimi? Drini Zeqo. Shpresojmë që t’ju bëjë “add”!

Fotografia

Në setin fotografik që realizuam me Drinin, e pati një çikë të vështirë të përshtatej me aparatin. Të pozonte, të rrinte pa lëvizur, të qeshte. Në fakt nuk është se qeshi ndonjëherë. Epo, nuk dilte dot nga vetja për hir të disa fotove. Por kjo nuk do të thotë që Drinit nuk i pëlqen të fotografohet. “Më pëlqen fotografia, më pëlqen edhe të fotografoj, edhe të fotografohem. Më pëlqejnë shumë fotot e rastësishme, ato që mbartin çastin, ato që shprehin përtej pamjes së bukur dhe ngjyrave të qarta”.

Veshja

Nëse i duhet të dalë për shopping, idetë i ka të qarta. Veshje gjithmonë sportive. Markat: Diesel, Energy, Guru. Duke i besuar gjithmonë shijes së tij dhe pa marrë parasysh këshillën e askujt. “Mundohem t’i kushtoj vëmendjen maksimale veshjes, ndonëse shpeshherë tentoj të dëgjoj të rehatshmen sesa eleganten. Jam tejet sportiv, ndaj nuk i ndërroj me asgjë atletet, xhinset dhe bluzat”. Kostumi? Pjesë e punës. S’ka ç’t’i bëjë! Duhet ta veshë medoemos!

Fama

Sigurisht që është i famshëm. Del çdo ditë në ekran. Ka miq të njohur. I kërkojnë intervista. Kur kalon në rrugë, të gjithë e njohin. Epo fama kjo është! Dhe Drini nuk është se nuk e ka shijuar, madje i ka ardhur shumë vite më parë. “Fama më shoqëroi gjatë kohës që studioja, sepse puna në TV ka nisur që para 6 viteve më parë ose dhe më shumë. Fama është e bukur. Është ndjellëse. Të jesh me këmbë në tokë është e rëndësishme. Por të jesh i njohur ngado dhe të dëgjosh fjalë të mira është gjithmonë bukur”.

Librat

S’ka nga t’ia mbajë. Aktualitetit nuk mund t’i shpëtojë dot. Sidomos atij. Ndaj në duar ka së fundmi, si shumë të tjerë, librin e Ben Blushit, “Të jetosh në ishull”. Dhe ky sigurisht që nuk është ndër librat e vetëm që ka mbi komodinë. “Librat janë gjithmonë aty. Sa herë që kam pak kohë. Sa herë që ndihem bosh. Më pëlqen të lexoj, ndonëse me keqardhje pranoj se në fund të ditës, nga lodhja, më zë gjumi me shumë pak faqe të shfletuara”.

Paraja

I ka parë me shumë kujdes ofertat që i janë ofruar. Ka pranuar madje edhe të lëvizë nga një ekran, kur vlerësimi monetar ka qenë më i mirë, tek një tjetër. Sigurisht, parësor ka qenë gjithmonë imazhi i tij dhe kushtet e punës, por Drini është nga ata që parasë i jep atë që meriton. “Ta bën çdo gjë më të lehtë, por është shumë e rëndësishme të dish vlerën e vërtetë të parasë. Të jesh mësuar të fitosh duke punuar, të jesh mësuar duke punuar, qoftë edhe me pak të ardhura. Pastaj, pa para s’ka qejf!”.

Jeta e natës

Është 26 vjeç. Sigurisht që bëhet pjesë e turmës, e argëtimit të orëve të natës. Ama edhe këtu ekrani i ka futur pak hundët. Nuk mund të japë lajmet me sytë e skuqur nga pagjumësia. Ndaj, kjo punë i ngelet vetëm fundjavës. “Është një rast shumë i mirë për të takuar ata miq që dita nuk të lë t’i kesh afër. Është koha kur mund të pish edhe ndonjë gotë më shumë, duke mos u trembur se të nesërmen do zgjohesh herët. Kjo është arsyeja që jeta e natës prej disa vitesh më është reduktuar vetëm në fundjavë”.

Deti

Në ditë të nxehta si këto, një pyetjeje të tillë, edhe po të duash, nuk i shpëton dot. Edhe Drini nuk ngurron të ta kthejë përgjigjen me një frymë: “Është dashuri më vete edhe deti. Kam një lidhje të ngushtë me të. Hapësira dhe madhështia e tij më sjellin qetësi dhe qartësi në mendime. Më pëlqen plazhi, më pëlqen të udhëtoj me një barkë me vela”. Ndoshta do t’i bëjë të gjitha këto nëse pushimet e kësaj vere do t’i shijojë në Greqi. Të paktën kështu e ka bërë në plan. 

Seksi

As që e merr mundimin të japë shpjegime e teori. Apo të të rrëfejë ndonjë detaj të nxehtë apo eksperiencë të paharrueshme. Me seksin, Drini i ndan punët me thikë të mprehtë. Dhe mjaftohet vetëm me një: “Është i papërshkrueshëm!”.