-Ndër këngët më të preferuara të jugut, në tregun muzikor shqiptar është dhe kënga “O sa u deshëm”. Si e realizuat këngën?
Unë ndjehem shumë e kënaqur dhe e gëzuar, sepse në fund të fundit, të gjithë këngëtarët këtë qëllim kanë, që të pëlqehen dhe të kërkohen nga njerëzit. Kënga u realizua shumë natyrshëm, erdhi shumë thjeshtë. Unë e kisha në një CD, dhe ajo është një këngë e vjetër polifonike. I bëra një refren dhe kështu u realizua kënga “O sa u deshëm”, e cila po shfaqet këto kohë dhe në ekranin televiziv.

-Pse ju pëlqen kënga e jugut?
Më pëlqen sepse është muzikë që krijon ndjesi të këndshme, është ajo që na bën të kërcejmë, që na shoqëron në të gjitha gëzimet familjare apo aktivitete të ndryshme. Mendoj se është e domosdoshme, sepse janë njerëzit që e kanë krijuar atë. Unë mund të them që nuk ka fuqi në botë, që do të më shkëpusë nga kënga e jugut.

-Një nga sukseset tuaja gjatë kësaj vere është dhe vidioklipi më i fundit prezantuar nga ju me titull “Më do s’më do”. Si erdhi ky vidioklip, dhe me cilët bashkëpunuat për realizmin e tij?
Teksti i këngës “Më do s’më do” është shkruar nga Rozana Radi, muzika u kompozua nga Adrian Hila. Kisha kohë që kërkoja një këngë të bukur të muzikës së lehtë, por nuk kisha përcaktuar se në çfarë mënyre duhej. Në momentin që Adrian Hila krijoi këtë këngë unë e mora, pasi më pëlqeu dhe e këndova. Vidioklipi i këngës është realizuar në Maqedoni dhe transmetohet në televizionet shqiptare. Unë i falënderoj dhe vidioklipi është nën eskluzivitetin e “Elrodi Music”. Gjithçka u realizua nga “Aleksandër”, ku veshjet ishin të zgjedhura prej tij, edhe ideja e realizmit ku vidioklipi u realizua në një supermarket.

-Gjatë verës do të kemi një projekt tjetër muzikor nga ju?
Unë kam qenë pjesëmarrëse në festivalin Maratona e Këngës Popullore, ky ishte një turne, që u bë në 12 qytete të Shqipërisë. Në këtë eveniment unë këndoj një këngë të re. Muzikën e kam bërë vetë, ndërsa tekstin e ka bërë këngëtarja e njohur Maro, është një duet dhe titullohet “Nënë e bijë” dhe e këndoj me mikeshën time të dashur të grupit të Bënçës. Ky eveniment i muzikës shqiptare do të shëtisë dhe në qytetin e Ulqinit dhe në Prishtinë. Besoj se do të jetë një udhëtim i këndshëm.

-Përveçse muzikës popullore ju kemi parë të interpretoni dhe muzikën e lehtë. Do të vazhdoni ta kultivoni këtë rrymë në këngët tuaja?
Mua më pëlqen shumë kënga polifonike, ashtu si besoj se i pëlqen shumë dhe të tjerëve kënga e moderuar, por më pëlqejnë njëkohësisht edhe këngët e tjera mua më pëlqejnë të gjitha këngët bukura që mund ti këndoj.

- Ju vazhdoni studimet për drejtësi, po ku e shikoni më shumë veten si këngëtare apo si juriste?
Unë e shikoj tek të dyja sepse një këngëtare e mirë duhet të jetë dhe një juriste e mirë.
Mendoj se të gjithë duhet të kemi ndopak njohuri juridike, që të përballemi me lehtësi me shumë probleme që na dalin gjatë rrugës.

-Keni vite që këndoni, por si nisën fillimet tuaja në rrugën e këngës?
Të futesh në rrugën e këngës, nuk ka nevojë që të përkrahë dikush, por talenti lind dhe një këngëtare duket që e vogël, sepse sapo fillon fjalët fillon dhe të këndojë. Kështu që ka qenë gjithmonë dëshira ime e madhe që të këndoj. Gjithmonë futesha në dhomën time dhe këndoja me zë të lartë sa më dëgjonin komshinjtë dhe bërtisnin poshtë dritares, por ndonjëherë edhe kërcenin, por varet sesi ishte humori i tyre. Por në rrugën time ndaj këngës mami im ka qenë një mbështetje shumë e madhe për mua dhe më ka mbështetur në çdo aktivitet.

-Në tregun muzikor shqiptar ka shumë këngëtarë, të cilët kanë nxjerrë edhe shumë vidioklipe. Ju ç’mendoni për cilësinë e tyre?
Që të jap një mendim profesional unë duhet të kem bërë një shkollë. Kam një natyrë që nëse nuk jam e bindur për diçka nuk mund të flas dhe duhet të kem bërë një shkollë, që të flas. Mendoj se nuk më takon mua që të gjykoj apo të vlerësoj vidioklipet e të tjerëve. Mund të jap mendim tek vidioklipi im në mënyrën realizmit apo në ide, por kurrsesi nuk mund të gjykoj vidioklipet apo punën e kolegëve të mi.

-Sapo keni prezantuar vidioklipin e këngës “Më do s’më do”, por ka thënë Silva të dua?
Po ku ka pa fjalën të dua, njeriu për dashurinë jeton. Është një nga arsyet më madhore të jetës, njeriu pa dashuri vdes, është si një dimër i përjetshëm, nuk ka kuptim jeta pa dashuri. Unë nuk jam e dashuruar, nuk kam një partner, por jam e dashuruar me jetën , me punën time, me shkollën , familjen, me shoqërinë time që i dua të gjithë pa përjashtim dhe i vlerësoj shumë.

-Me këngë e jugut suksesin e parë e patët me këngën “Lule moj bardhule”. Ç’mund të na thoni për këtë këngë?
Ajo ka qenë kënga e parë polifonike që unë kam përpunuar. Më ka ndihmuar profesor Pirro Cakrani për këtë këngë sepse është një këngë e vjetër polifonike. Ishte shumë rastësi, që ndërkohë që bëhej Festivali i Maratonës së Këngës Popullore, mua më bëjnë një ftesë për të marrë pjesë në këtë festival. Më vjen mirë që kënga u vlerësua, pavarësisht që kishte shumë këngëtarë dhe këngë të bukura, të cilët ishin nga treva të ndryshme shqiptare si Maqedoni, Kosovë, etj.

-Të jesh artiste e njohur çdo të thotë për ju?
Është një vlerësim i madh që të të njohin dhe të të duan njerëzit, të jesh në qendër të vëmendjes, të jesh e vlerësuar prej tyre.

-Sa CD keni nxjerrë deri tani?
Unë kam nxjerrë dy CD muzikore a para “Plaku plaka”, e dyta “ Trake truke”

-Po në muzikën e lehtë mendon që të bashkëpunosh ose të nxjerrësh një CD me këngë të tilla?
Unë faktikisht albumin e dytë “Trake truke”, kam një ndërthurje, pesë këngë janë të muzikës së lehtë dhe katër këngë janë të muzikës folk. Kështu që kam mundur, që të bëj një ndërthurje muzikore në album.

-Nga fansat tuaj, cili ka qenë mesazhi më i bukur që keni marrë?
Mesazhi i fundit që më kanë dhënë për këngën “Më do s’më do”, ku unë isha e ftuar në një emision. Publiku e përjetonte këngën shumë bukur, mua më pëlqente mënyra se si ata e vlerësonin këngën.

-Studioni në universitet, por a janë të privilegjuar artistët?
Këto vite unë kam punuar shumë dhe rezultat e mia kanë bërë që të gjithë mos më shohin si Silva që këndon, por si Silva studente e mirë. Kam punuar shumë, që ta marr edhe këtë status.

-Silva ju keni një vëlla, si janë të ndërtuara marrëdhëniet tuaja me të?
Janë shumë të mira. Jemi dy tipa krejt të ndryshëm, por që përshtatemi me njëri-tjetrin.

-Kush ju kritikon më shumë?
Më kritikojnë kur shohin se diçka nuk shkon ashtu siç duhet. Mami dhe vëllai janë kritikët e mi në çdo gjë, si tek veshja, performanca etj.

-Si sillet Silva në shoqëri?
Në shoqëri mundohem që të përshtatem. Unë mbaj afër njerëz që më bëjnë të ndihem mirë. Mendoj se të gjithë kemi nevojë që të ndihemi mirë.

-Sa kohë i kushtoni lukut tuaj në jetën e përditshme?
Në jetën e përditshme unë jam shumë natyrale, dhe pothuajse e palyer fare. Kështu që për mua mjafton një veshje e thjeshtë sportive dhe e rehatshme dhe ndihem mirë. Ndërsa në skenë, patjetër që duhet të ndryshoj dhe të vishem sa më mirë dhe në përshtatje të këngës.

-Silva bën pjesë tek njerëzit me natyrë të qetë, nevrike...?
Natyra ime varet nga situata, dhe unë reagoj në bazë të situatës. Unë nuk mund të sillem keq me një njeri që sillet me edukatë dhe me kulturë.

-Ju bezdisin paparacët dhe thashethemet?
Mundohem që t’i mbaj larg ata. Nuk interesohem që të bëj fotografi dhe të dal nëpër revista dhe kështu që jam e qetë. Nuk bëj gjëra që jenë skandale.

-Çfarë bëni për të rritur më shumë imazhin tuja si këngëtare?
Unë vetëm do të vazhdoj të këndoj.

-Me cilat këngëtare keni më shumë miqësi?
Unë mundohem që të jem konstante sepse kështu mund të jesh një mikeshë shumë e mirë me to. Dua të ruaj marrëdhënie shumë të mira dhe ndjehem shumë mirë kur jam me to. Ndjej që ato kanë për mua një respekt një konsideratë, e ndjej këtë gjë që nga mënyra se si ato komunikojnë me mua. Kam marrëdhënie shumë të mira me të gjithë këngëtaret pa përjashtim.

-Këngën e ushtroni vetëm për pasion apo është edhe ana përfituese?
Unë mendoje se i kam të dyja bashkë. E kam pasion, por njëkohësisht edhe punoj duke kënduar.

-Një këngëtare duhet të jetë e bukur dhe pa zë të mirë apo e kundërta, që të jetë e suksesshme?
Në momentin që merren gjërat në ekstrem asnjëherë nuk ecin. Në momentin që ekzistojnë të dyja gjërat qoftë edhe nga pak atëherë ecin Kështu që mendoj se duhet të thuren të dyja.

-Shumë këngëtare shqiptare kanë veshje të ekzagjeruar kur dalin në skenë. Ju si mendoni për këtë, pra cila është më e rëndësishme mesazhi i këngës apo performanca?
Unë mendoj që një vajzë e bukur që vishet, sado ekstravagante ka rëndësinë e saj sepse në fund të fundit e zbukurojnë ekranin. Por mua më krijohet një ndjesi shumë e këndshme kur një vajzë vishet bukur dhe del e kërcen sipas mënyrës së saj. Nuk kam pse ta paragjykoj, pasi nuk po bën asgjë të keqe. Mendoj se nuk bëjnë gjë të keqe ato këngëtare që vishen lehtë dhe dalin në skenë.

-Ndryshoni shpesh lukun tuja?
Unë flokët i kam pasur kafe, bionde, i kam bërë me fije, këto janë ngjyrat e mia të preferuara. Kaçurrelse, me flokë të shtrira, me onde etj.

-Është amvisë e mirë Silva?

Varet mund të jem ndonjëherë, por për jetën e përditshme nuk më lë mami që të merrem shumë më këtë gjë. Por mundohem të bëj gjëra nga më të ndryshmet nën udhëzimet e nënës sime mund t’i bëj të gjitha.

-Thatë se jeni shumë e zënë, por si shpenzoni kohën e lirë?
Gjatë kohës së lirë më pëlqen të shëtis, të dal me shoqërinë, qoftë edhe të mbyllem në dhomë dhe të qetësohem përpara një aktiviteti. Për mua që të relaksohem mjafton që të jetë qetësi. Nuk ka rëndësi çfarë vendi mund të jetë.

 -Silva është më tepër bindëse apo kundërshton?
Varet nga momenti, ka raste që bindem, por ka rate dhe kur kundërshtoj. Në momentin që unë jam e bindur nuk kundërshtoj, por në të kundërt kundërshtoj.

-Si nis dita për Silvën?
Janë ditë të zakonshme, me takime pune, prova për veshjen, këngën, lexoj, dal me mamin tim, me shoqërinë. Kjo është e gjithë dita.

-Gjëja më e bukur që ju kanë thënë kur keni kënduar?
Më kanë thënë shumë gjëra, por më ka ngelur në mendje fraza “ti je njësh”. Sepse më duket e veçantë në atë që bën. Kjo prandaj më ka pëlqyer.

-Pushimet?
Afër detit, nga jugu.

-Përveçse librave të shkollës lexoni libra të tjerë?
Librat e mi prej 1000 faqesh më dalin, por gjatë verës mundem të lexoj dhe libra të tjerë si bestseller etj.

-Pasi të mbaroni shkollën ku keni dëshirë të punoni?
Për momentin mendoj që të marr një notë të mirë në diplomë dhe më pas në momentin që do të kem një bazë të mirë besoj se ajo që do të ndërtoj mbi të do të jetë e sigurt.

-Për çfarë do të hiqja dorë nga kënga?
Kënga ka lindur me mua dhe do të vdesë me mua. Kështu që nuk kam për të hequr dorë.

-Ekzistojnë thashethemet mes këngëtarëve?
Normal që ekzistojnë dhe ia themi njëra-tjetrës: që shiko se çfarë ishte shkruar për ty apo në këtë revistë ishte diçka tjetër. Por duhet të jesh tepër e ngushtë që të arrish që të merresh me thashetheme. Unë mundohem që të qëndroj larg, sepse për mua janë humbje kohe.

-Një stinë e mbushur plot ngjyra, por çfarë preferon Silva më shumë?
Më pëlqen shumë ngjyra jeshile se më shkon dhe shumë me sytë, por dhe e verdha dhe kafja. Mbrëmë kisha veshur një fustan të bukur me ngjyrë rozë dhe jeshile, që ma bëri Rrezarta Skifteri për koncertin.

-Ju thatë se nuk jeni e dashuruar, por nëse një ditë do të gjendeshit e dashuruar, çfarëdo të vlerësoni në një lidhje?
Mbi të gjitha sinqeritetin sepse pa atë nuk vazhdohet. Pa dashuri dhe respekt nuk vazhdohet. Kur një lidhje nuk funksionon nuk ka nevojë që të flasësh, sepse tregon realiteti, faktet që nuk ecet nuk ka nevojë për fjalë. Kur nuk ka dashuri dhe respekt midis dy njerëzve nuk vazhdohet më tej.

-Ju vrasin paragjykimet?
Paragjykimet ndaj meje më shumë mund të vrasin nënën time se sa mua.Unë e njoh shumë mirë veten time, por sinqerisht e them jo për tu mburrur, por nuk jam ndjerë e paragjykuar nga njerëzit sepse unë mundohem që të bëj një jetë sa më normale, pa ekzagjerime.

-Me fansat tuaj si silleni, ku ju dërgojnë mesazhe apo imeile i përgjigjeni?
Kjo është më pakta që mund të bëj për fansat e mi. Unë i dua dhe i vlerësoj shumë, për ta punoj dhe vazhdoj që të punoj. Kështu që është më e pakta që mund të bëj, duke i kthyer përgjigje atyre dhe ti takoj nëpër koncerte e mia.