Së fundmi, ka luajtur një rol në filmin më të ri të Kumbaros. Për t’iu rikthyer tërheqjes së saj brenda shtëpisë. Gruaja e bukur flegmatike, aktorja e njohur që shprehet aq rrallë, është ftuar pikërisht të mendojë me zë të lartë për revistën “Jeta” e të rrëfejë për kohën kur ka qenë e lumtur, për gjendjen e tanishme shpirtërore e për shumë të tjera...

Cila është ideja jote për lumturinë e vërtetë?

Shpesh duket sikur nuk ekziston, sepse e prishim me dëshirën njerëzore për perfeksion.

Cila është frika më e madhe?

Ideja se mund të dështosh ose akoma më tej... Kur mendon se mos ndoshta nuk ke bërë asgjë.

Cili është ai tipar i të tjerëve që të ngjall mëshirë?

Servilizmi.

Ekstravaganca jote më e madhe?

Ka momente kur them: Në djall të gjitha... Për fat, janë çaste që nuk zgjasin.

Cili është udhëtimi yt i preferuar?

Çdo fillim udhëtimi është në vetvete udhëtimi më i bukur.

Në ç’rast mund të gënjesh?

Kur nuk dua të fyej ndokënd. Përgjithësisht e evitoj. Jo për virtyt. Thjesht për komoditet.

Personi që përçmon më shumë?

Mosmirënjohësin.

Pengu yt më i madh?

Jetoj në mënyrë të tillë që mos të më mbeten pengje. Gjithsesi...

Kur dhe ku ke qenë e lumtur?

Në shtëpinë e prindërve të mi, në fëmijëri dhe në adoleshencë. Jam ndier e mbrojtur dhe ëndrrat nuk kishin frikë të kishin flatra.

Në ç’gjendje shpirtërore je tani?

Ndihem mirë. Përpiqem t’u jap kuptim ditëve. Dhe ëndërroj ende, ndonëse gjithnjë e më rrallë.

Nëse do të mundeshe të  ndryshoje diçka te vetja, çfarë do ishte ajo?

Nuk e di... nuk ka kuptim. E pranoj veten, por edhe të tjerët, pa u përpjekur të ndryshoj gjë.

Po të vdisje dhe të mund të rimishëroheshe në një tjetër njeri apo diçka tjetër, çfarë do doje të ishe?

Nuk e di... Vështirë ta mendosh. Sidoqoftë, ka pak rëndësi... E rëndësishme është të isha sërish mami i Edrës dhe i Markos.

Cili është sendi më i çmuar që zotëron?

Një komo e viteve 1700, dhuratë e prindërve.

Cilën quan pikën më të thellë të mjerimit?

Shterpësinë e shpirtit.

Ku do të të pëlqente të jetoje?

E ku tjetër, përveçse në Tiranën e zhurmshme dhe me pluhur!

Cila është karakteristika jote më e spikatur?

Besoj se përpiqem të ruaj ekuilibrin e brendshëm në çdo situatë.

Cilët janë shkrimtarët e tu të preferuar?

Kadare, Cvajg, Tolstoj, Markez, Dostojevski, gjithsesi janë shumë më shumë...

Cilat gjëra nuk të pëlqejnë fare?

Hipokrizia, burracakëria, mosmirënjohja.

Si do pëlqeje të vdisje?

Natyrisht, duke fjetur hahaha...

Cila është motoja jote?

Të shoh më të mirën në çdo gjë.