Quhet Monika Milo. Është zv.drejtore e përgjithshme e Bankës Credins. Ndër të paktat femra që arrijnë të kenë një karrierë të tillë, por edhe ndër të paktat që kanë një natyrë chic si e saja. Si mund të jetë jeta e një gruaje që drejton një nga bankat më me emër në Shqipëri? Zbulojeni...

Klaudeta Skënderasi

Sapo kapërcen derën prej qelqi të turbullt e gjendesh në zyrën plot dritë, syri të kap skrivaninë e madhe, pak më tutje kolltukët dhe pikturat në nuancën panna, orkidenë mbi tavolinë, gjithë orenditë e tjera që shkojnë në harmoni të plotë me ngjyrat e qeta të zyrës dhe mes gjithë asaj paqeje feks kostumi në ngjyrë blu elektrik, që ka veshur zv.drejtorja e Bankës Credins. Mjafton vetëm një shtrëngim dore dhe një nga ato zhbirimet e shpejta që nga koka te këmbët për të kuptuar se Monika Milo, ndryshe nga ç’mund të presësh, nuk është aspak nga ato gratë që janë kapur me thonj pas profesionit të tyre e që nga çasti në çast pret të të flasin për shifra e plane, për një karrierë të shkëlqyer prej bankiereje e për ambicie profesionale, shkurt të të lodhin kokën me biseda të ftohta që rrotullohen vetëm tek puna, karriera, profesioni. Në fakt, Monika i përshtatet më së miri rubrikës “Në karrierë”, por ca detaje që syri t’i kap rrufeshëm të sigurojnë se biseda me të nuk ka për të qenë aspak brenda kornizave të ftohta të një shkrimi të mirëfilltë prej gruaje në karrierë.

Unaza dhe vathët me gurë zefiri, duart e kuruara e të lyera me një smalt të tejdukshëm, flokët e krehura për merak, qetësia me të cilën flet dhe mënyra elegante se si qëndron në tavolinë, të rrëfejnë më së miri një natyrë chic, që nuk i duhet të dalë nga vetja, të lodhet e të mundohet për të qenë e tillë. Është ashtu dhe pikë. “Të jesh chic do të thotë se ke një cilësi të lindur dhe këtë cilësi nuk e kanë të gjithë, ndërsa eleganca mund të krijohet. Chic-u në vetvete ka më tepër tipare intelektuale se eleganca”. Monika të tregon se ka lexuar dhe ka njohuri të thella për këto elemente, që i konsideron të rëndësishme për një femër. Duhet të jetë pikërisht për hir të asaj cilësie të lindur që Monika Milo e ka shumë të thjeshtë të shfaqet sharmante dhe gjithaq e qetë në gjithçka që thotë e që bën.

S’mund të jetë e veshur veçse kështu, klasike që nga koka e deri te këmbët, me kostum të prerë pas linjave të trupit, këpucë të larta me lustër dhe një grim fare të lehtë, por shumë të kujdesshëm. Puna në një institucion të rëndësishëm siç është banka, nuk të lë rrugëzgjidhje tjetër brenda një mëngjesi të zakonshëm fillimpune. Atletet dhe xhinset i ngelen orëve të vona të pasdites, kur del për vrap, apo fundjavave larg zyrës në zonën e ish-Bllokut. Në ditët e zakonshme të punës, natyra e veshjes së saj, pa lënë mënjanë edhe përshtatjet dhe kombinimet që kostumi të mos ngelet e vetmja mundësi, qëndron brenda kornizave serioze. Por nuk është se për Monikën kjo përbën ndonjë problem. Është mësuar të vishet që herët në këtë stil. Që në vitin 1991, kur filloi punë në Bankën e Kursimeve, si specialiste në departamentin e Import-Eksportit, një vit pasi ishte diplomuar në Fakultetin e Ekonomisë, iu desh t’i përshtatej rigorozisht një imazhi serioz, por të kuruar me shumë kujdes. Ndoshta, nëse nuk do ishte treguar e duruar për të pritur një rast më të mirë, puna e saj e parë nuk do kishte filluar dhe aq mbarë. “Pas mbarimit të studimeve më emëruan në Tropojë, por nuk shkova. Prita një rast më të mirë, i cili më erdhi pas një konkursi që u zhvillua në Bankën e Kursimeve, që sapo ishte hapur në vitin 1991”. Iu desh të kalonte shkallë-shkallë, vit pas viti, nga njëri sektor më i ulët tek një tjetër më i lartë për të mbërritur në fund në pozicionin e Drejtores së Departamentit të Marketing-Zhvillimit, në të cilin punoi deri në vitin 2001. Ajo kujton pikërisht fillimin e këtij viti, kur iu propozua nga z. Artan Santo (aktualisht drejtor i përgjithshëm i Bankës Credins) për të qenë pjesë e një grupi pune që do krijonte bankën e parë private shqiptare, e cila u pagëzua me emrin Credins. U ndodh përpara një dileme që kaloi shpejt për t’i lënë vendin përballjes me një sfidë të madhe. Tani, që prej 5 vjetësh, mban postin e zv.drejtores së përgjithshme. “Jam shumë e kënaqur që kam qenë dhe jam pjesë e punës dhe përpjekjeve që janë bërë për të ngritur Bankën Credins në ato nivele që është sot, për ta bërë aq atraktive jo vetëm për tregun vendas, por edhe për të huajt”. Monika veçon si një arritje të madhe futjen e aksionerëve të rinj në Bankën Credins: SECO (State Secretariat for Economic Affairs), pjesë e Qeverisë Zvicerane, si dhe B.F.S.E.Holding (Balcan Financial Sector Equity Fund), ku bëjnë pjesë emra si KFW, GTZ dhe organizma të tjerë të qeverisë së Republikës Federale Gjermane. Partnerët e rinj tashmë zotërojnë  25,34% të paketës së aksioneve të Bankës Credins, për ta renditur atë në nivelet e larta të një banke evropiane.