-Ju deklaroni se ju është shkaktuar një dëm nga pirateria, por cili është mendimin juaj për mbrojtjen e së drejtës së autorit?
Ka kaq shumë probleme në Shqipëri dhe drejtësia e ka emrin drejtësi, por fatkeqësisht për neve që jemi hallexhinj është neveri dhe jo drejtësi. Pra mund të them se ndoshta më vonë merr emrin drejtësi sepse deri tani unë nuk shikoj asnjë dritë jeshile për hallexhinjtë, për artistë, dhe për çdo lloj gjyqi tjetër.

-Krijimtaria juaj artistike si ka përfunduar në piraterinë muzikore?
Në vitin 1996 unë kam krijuar shoqatën “Polifonia Shqiptare” dhe kam krijuar grupe polifonike, kam dhe CD me këngë polifonike. Në studiot e atëhershme i mirëpritën mirë dhe bukur dhe me një marrëveshje të tyre duke rënë në konsensus që kishte të bënte ne içizimin dhe shumëfishimin, pra ishte një marrëveshje mes nesh. Unë jam autor tekstesh, por jam dhe këngëtar që sëbashku me grupin polifonik “Bashkimi” bëmë albumet. Titulli i albumit të parë kishte të bënte me vetë polifoninë që është një perlë e pazëvendësueshme, një bashkudhëtare e jetës e pamoshë sepse ka lindur bashkë me njerëzimin dhe për njerëzimin. Përfundimisht u shumëfishuan kasetat duke u reklamuar në të katër anët dhe që në vitin 1997 që dolën këngët, dhe deri tani ne nuk kemi marrë asnjë shpërblim. Kam folur disa herë me shtëpinë diskografike duke i thënë për albumet muzikore se i kam dëgjuar, por përgjigjja që mora ishte se nuk po shiten albumet. Atëherë unë i them se i kam parë albumet që po shiten në Greqi. Otali etj. Të tre albumet titulloheshin: “E duam polifoninë”. Përfundimisht po shiten albumet që prej disa vitesh dhe unë nuk kam marrë asnjë lek për ato albume.

-Cila është përgjigja që keni marrë nga shtëpia diskografike për shitjen e albumeve?
Unë kam folur me ata dhe më thonë se nuk janë shitur albumet në një kohë që këto albume u shtrinë në të gjithë Shqipërinë dhe u shumëfishuan dhe në studio të tjera dhe janë akoma duke i shitur. Shokët e mi më janë kundërvënë për këtë padrejtësi që më ka bërës studio duke menduar që unë kam abuzuar me ata. Kështu që unë kam një konflikt edhe me miqtë dhe shokët e mi që kam kënduar këto këngë. Për këto albume unë kam dhënë para sa ka dashur studio. Në atë kohë, pra para shumë vitesh ka qenë një shumë 25 mijë lekë për çdo album dhe për të gjitha këto albume unë kam paguar dhe kam faturën origjinale. Mirëpo kam dy vjet që vazhdoj gjyqin dhe akoma nuk kam gjetur një përfundim për të drejtën time. Po vazhdoj akoma me këtë punë, por dua të falënderoj ZSHDA që më ka mbrojtur dhe mbështetur. Po shikoj që ajo është e predispozuar për të mbështetur të gjithë autorët e albumeve.

-Ju u shprehët se tashmë jeni në një proces gjyqësor. Si ka vazhduar deri tani ky proces?
Shtëpia diskografike thotë që unë nuk i kam shitur albumet dhe nxjerr shumë justifikime të kota që unë nuk i di. Për të gjitha këto që po bëhen akoma nuk ka marrë një zgjidhje kjo punë.

-Sipas jush pse ka triumfuar pirateria në tregun shqiptar?
Faji i piraterisë që ka triumfuar në tregun shqiptar është vetëm i drejtësisë. Ndoshta këtu nuk ka pasur të drejta autori, por kanë abuzuar sa kanë dashur dhe vazhdojnë akoma. Unë kërkoj nga drejtësia shqiptare që të mbështetet plotësisht dhe ZSHDA që është e përkushtuar për këtë problem

-Ju u shprehët se ZSHDA është e përkushtuar, por konkretisht si kanë qenë masat që ka marrë kundër piraterisë?
Unë mendoj se ajo duhet të bëjë më shumë. Për këtë dua të them se asnjë artist, apo autor nuk është i kënaqur me masat që ajo merr, vetëm ca gjoba. Ne duam që drejtësia të çojë dinjitetin e artistëve në vend. Pra ajo të mbrojë të drejtat e autorit. Në rast se shteti do të ishte në gjendjen ashtu siç e kërkon dhe populli, i cili shpresën e ka tek drejtësia atëherë nuk do të ishim kurrë në këtë gjendje kaotike, pasi është një tmerr për të gjithë qytetarët, është tmerr për të gjithë artistët, është tmerr për këdo që futet në dyert e gjykatës sepse është vështirë të dali e drejta. Këtu triumfon më i pasuri siç i thonë dhe asaj shprehjes që: peshku i madh ha të voglin. Hallexhiu vete i pashpresë në derën e gjykatës sepse nuk ka shpresë për ta fituar këtë të drejtë. Megjithëse unë shpresoj se drejtësia do të vejë në vend për të mirën e këtij populli. Nëse nuk ka drejtësi nuk ka shtet.

-Si një këngëtar i njohur i këngës polifonike, sa e dëmton sot rryma turbo-folk tabanin muzikor popullor shqiptar?
Rryma turbo-folk e ka bastarduar shumë polifoninë shqiptare, këtë folk të pazëvendësueshëm, këtë traditë të pazëvendësueshme dhe këtu kanë abuzuar shumë dhe disa artistë ordinerë që kanë nxjerrë ja dy melodi. Këta artistë dalin nëpër skena, këndojnë dhe deformojnë muzikën, por ata marrin ndonjë të ardhur në këto studio pirateske. Unë nuk mund të them se është faji i shtëpive diskografike, por është faji i drejtësisë sepse nuk ka se si të kuptohet ndryshe. Drejtësia ka emër, por në fakt nuk është drejtësi por është neveri për këtë komb. Duhet ta kuptoni se është tmerr për neve që rrimë të pashpresë në dyert e gjykatës. Unë kërkoj të drejtën time, dua të drejtën e autorit.

-Si po vazhdon tashmë krijimtaria juaj?
Unë me krijimtarinë time do të vazhdoj sepse kam lindur dhe jam rritur me këtë perlë tradicionale që sot është marrë nën mbrojtje dhe nga UNESCO dhe sot jam dhe president i shoqatës “Polifonia Shqiptare”. Polifoninë unë kërkoj ta mbledh dhe tua transmetoj brezave, gjë e cila do të dëshmojë në datën 24-25 maj në festivalin polifonik “Bylisfonia”. Do të jetë një festival që do të zhvillohet në kështjellën e lashtë 3 mijë vjeçare.

-Si një prej këngëtarëve që me krijimtarinë tuaj artistike jeni marrë vetëm me traditën shqiptare, cili është mesazhi juaj për të rinjtë që këndojnë për të mbrojtur traditën shqiptare?
Për të mbrojtur traditën shqiptare unë kërkoj që në ZSHDA të shikohet dhe kjo gjë sepse është pak e vështirë për ta parë këtë sepse penetrojnë disa artistë ordinerë që kanë futur në polifoni jo më shumë se dy nota. Ata dalin në skenë dhe tunden dhe shkunden dhe përfundimisht në emër të polifonisë thonë turbo-folk. Unë asnjëherë nuk do të jem me këtë gjë. Unë do të jem për ta mbrojtur polifoninë shqiptare me dinjitet dhe të përfaqësohet jo vetëm në Shqipëri, por edhe në botë.

-Organizoni nga data 24 deri në 25 maj Festivalin Ndërkombëtar të Polifonisë “Bylisfonia”. Cili është qëllimi tij?
Fola dhe pak më lart që dua të mbroj polifoninë, por edhe që ajo të përfaqësohet me dinjitet jo vetëm në vendin tonë, por edhe në botë dhe ky është dhe një nga qëllimet e këtij festivali. Unë prandaj e bëj këtë eveniment ndërkombëtar për të ballafaquar këtë traditë të mrekullueshme me polifoninë ndërkombëtare. Në këtë festival ndërkombëtar marrin pjesë 15 grupe nga Shqipëria dhe pesë ndërkombëtare. Janë thirrur për të marrë pjesë në këtë festival korifenjtë e polifonisë, njerëzit që kanë dhënë një kontribut të madh në polifoni”. Ky edicion i dytë i “Bylisfonisë” do ti marrë spektatorët në botën tërheqëse të muzikës polifonike, shqiptare dhe ndërkombëtare duke u ndërthurur në një kontekst historik shqiptar. Në krah të këtyre grupeve ndërkombëtare, 15 grupe do përfaqësojnë Shqipërinë, duke përmendur disa prej tyre, si grupi nga Korça, Çamëria, Dukati, Mallakastra, Fieri, Gjirokastra, grupi “Bashkimi” nga Tirana, dhe Fëmijët e Kutës. Shoqata Kulturore- Artistike “Polifonia Shqiptare” është formuar më 1996 nga artistë të njohur shqiptar, por më para formimit të shoqatës, artistët e kësaj shoqate kanë marrë pjesë në aktivitete dhe performancë në të gjithë Shqipërinë si dhe në Itali, Francë, Rumani dhe Greqi. Polifonia, shoqëruesja e pamoshë e jetës ka pritur dhe përcjell legjendat e njerëzimit dhe ngelet ruajtëse e së shkuarës sonë. Rikthimi në Bylis përfaqëson rikthim në shtëpi të muzikës polifonike.