PRISHTINË - Policia e Kosovës ka njoftuar sot arrestimin e Besim Berishës i cili ishte shpallur në kërkim nga UNMIK që prej vitit 2004. Ai është arrestuar në Francë dhe tashmë është ekstraduar në Kosovë për akuzën e vrasjes.  Në njoftimin e policisë thuhet se vrasja është kryer në datën 2 gusht të vitit 1999, rreth orës 20:45 në rrugën “Gjurgjevdan”, nr. 138, në Prishtinë.

Viktima 64 vjeçar Momçillo Milenkoviç ishte mbytur me mbulesën e tavolinës ndërsa djali i tij, 38 vjeçari Svetomir Milenkovic, ishte mbajtur në mënyrë të paligjshme. Edhe sot Svetomir Milenkovic konsiderohet i zhdukur. Për këtë ngjarje është akuzuar 28 vjeçari Besim Berisha nga Prishtina i cili u arrestua nga KFOR në 3 gusht 1999. Ai u mbajt në paraburgimin e Deçanit dhe më pas u dërgua në paraburgimin e Pejës deri në datën 20 mars të vitit 2000.

Ndërkohë në procesin gjyqësor ndaj tij Gjykata e Prishtinës liroi Besim Berishën për mungesë të provave. Ky vendim i gjykatës u kundërshtua nga prokurororia dhe Gjykata Supreme duke bërë që çështja të rikthehet në gjykim por tashmë i akuzuari Besim Berisha ishte arratisur nga Kosova.
Sipas të dhënave të atëhershme Berisha ishte larguar për në Spanjë, ndërsa në vitin 2004 nga autoritetet e UNMIK-ut në Kosovës për të ishte lëshuar edhe fletëarresti ndërkombëtar.

Besim Berisha, i cili kishte falsifikuar certifikatën e lindjes dhe lejen e njoftimit (jugosllave), në nëntor të vitit 2004 ishte lajmëruar në Francë si Burim Dibrani, mirëpo edhe atje ishte arrestuar për grabitje më 7 shtator 2006 dhe ishte dënuar në 30 muaj burg. Besim Berisha ishte i kërkuar edhe në Çeki, Zvicër, Belgjikë dhe Gjermani kryesisht për qëndrim ilegal apo transportim dhe shpërndarje të drogës.
28-vjeçari Berisha është ekstraduar në Kosovë nga Franca me një aeroplan ushtarak dhe tashmë pritet gjykimi i tij.
(a.s/Balkanweb/QIK)