PEKIN- Gjatë qëndrimit të tij në Pekin, Kryeministri Berisha mori pjesë në takimin e Frankofonisë (OIF), me ftesë të Sekretarit të Përgjithshëm të Organizatës së Frankofonisë, Abdou Doiuf, të pranishëm në këtë takim ishin Presidenti i Komitetit Ndërkombëtar Olimpik Jacque Rogge, Gjithashtu, Kryeministri Berisha u takua edhe me shumë liderë afrikanë, me të cilët diskutoi për zhvillimet në rajon, duke u ndalur veçanërisht në pavarësinë e Kosovës dhe zhvillimet atje. Berisha u shpreh për mundësinë e këtyre vendeve për të njohur pavarësinë e Kosovës, duke kontribuar kështu në paqen dhe stabilitetin e rajonit. Kosova, tha Kryeministri, e njohur si shtet i ri, në një kohë të shkurtër, nga 44 vende, është faktor paqeje, stabiliteti dhe zhvillimi në rajon dhe ajo po ecën e sigurt drejt rrugës së integrimit.
Kryeministri i njohu bashkëbiseduesit edhe me zhvillimet në Shqipëri, ecurinë e reformave integruese, ndërsa mori vlerësimet e tyre për zhvillimet e mëdha ekonomike, ndryshimet e dukshme dhe arritjet, veçanërisht në vitet e fundit të qeverisjes së kryesuar nga Kryeministri Berisha.
(a.r/balkanweb)