WASHINGTON-  Ndihmës Sekretari amerikan i Shtetit për Marrëdhëniet me Evropën dhe Euroazinë Daniel Frid thekson nevojën urgjente që ekonomia në Kosovë të fillojë të funksionojë në mënyrë që të pakësohet papunësia.

Ai theksoi se Kosova është shembulli i bashkëpunimit të afërt mes Shteteve të Bashkuara dhe Evropës në kushte mjaft të vështira, ndërsa shtoi se për të ndihmuar Kosovën, tha nënsekretari Fried, Shtetet e Bashkuara do të vazhdojnë të punojnë shumë ngushtë me aleatët evropianë gjatë muajve të ardhshëm.

Donatorët ndërkombëtarë premtuan më shumë se 1 miliard e 900 milionë dollarë ndihma për zhvillimin ekonomik të Kosovës. Shtetet e Bashkuara premtuan 400 milionë dollarë.
Fondet amerikane do të ndihmojnë në lehtësimin e borxhit të Kosovës. Ato do të forcojnë kapacitetin e sistemit juridik të vendit, si dhe do të përmirësojnë klimën e biznesit, arsimin dhe do të rrisin furnizimin me ujë të pijshëm.

Shtetet e Bashkuara janë donatori më i madh i ndihmave për Kosovën, duke kontribuar mbi një miliard dollarë që nga viti 1998. Politika amerikane vazhdon të jetë e përqendruar në ndërtimin e kapaciteteve brenda institucioneve të Kosovës dhe përmirësimin e aftësisë së shtetit të ri për të mbështetur zhvillimin në dekadat e ardhshme.

(s.g/VOA/Balkanweb)