PRISHTINE- Italia njeh zyrtarisht pasaportat e Republikës së Kosovës. Lajmi konfirmohet nga ambasadori italian në Kosovë Michael Luis Giffoni, pas takimit me presidentin Fatmir Sejdiu. Giffoni tha se shumë shpejtë do të përfundojë edhe procedura e lëshimit të vizave për shtetasit e Kosovës, ndërsa bëri të ditur se, shteti italian synon thellimin e mëtejmë të bashkëpunimit me Kosovën si në fushën ekonomike, politike, ashtu edhe atë kulturore. “Italia beson fuqishëm në stabilitetin e Kosovës dhe të gjithë rajonit të Ballkanit. E gjithë kjo në kuadrin e perspektivës së përbashkët evropiane të Ballkanit”, ka thënë Giffoni.
Ndërkaq, presidenti Sejdiu u angazhua për bashkëpunimin e Kosovës me vendet e tjera, përfshirë edhe ato të rajonit. Angazhimi i tillë, sipas kryetarit Fatmir Sejdiu është ndër prioritetet e institucioneve të vendit. Ai përsëriti përkushtimin për procesin e integrimeve evropiane.

(s.g/Telegrafi/BalkanWeb)