MITROVICE- Konsorciumi Kosovë-Kroaci “Eko Centar” do të jetë firma e cila do të asgjësojë acidin sulfurik që ndodhet në maunet e parkuara në parkun industrial “Trepça” në Mitrovicë. Lajmi konfirmohet nga zyra e shtypit e qeverisë kosovare.

Sipas ministrit të Ambientit dhe Planifikimit Hapësinor, Mahir Yakcilar asgjësimi pritet të fillojë sot ose nesër dhe e tërë procedura do të kryhet brenda disa ditësh.

Asgjësimi do të kryhet në një proces teknologjik në temperaturë 950 – 1200 oC. Me këtë rast do të bëhet instalimi i filtrave të dyfishtë dhe do të ngrihet një sistem i vazhdueshëm i monitorimit të ajrit nga implementuesi dhe Ministria e Mjedisit.

Firma u zgjodh mes 5 kompanive të tjera të cilat paraqitën ofertat në tender. Ato ishin Jakob Becker – Austri, EKO Centar – Kosovë - Kroaci, Eramed – Kosovë, GC Metal – Kosovë dhe CES Environmental – SHBA.

Me një vendim të posacëm qeveria e republikës së Kosovës kërkoi që të veprohet me procedurë te përshpejtuar për asgjësimin e acidit sulfurik që ndodheshin në maunet e parkuara në Parkun Industrial “Trepça”.

Pritet që asgjësimi të ngjallë pakënaqësi te banorët e Mitrovicës. Pak ditë më parë ato protestuan për heqjen e këtyre maunave nga qyteti i tyre dhe kanë deklaruar se nuk do të lejojnë që ato të shkatërrohen aty.

(s.g/Balkanweb)