RUSI- Rusia mund të njohë Kosovën. Deklarata është bërë në një interviste për BBC nga Konstatin Kasaçov, kreu i komitetit të jashtëm të Dumës, parlamentit rus. Njohja e pavarësisë së Kosovës, sipas tij, mund të bëhet në të njëjtën linjë si për njohjen e Osetisë së Jugut dhe Abklazisë edhe pse këto dy raste ndryshojnë nga njëra-tjetra.  “Ndoshta do ta njohim, nuk përjashtojmë asgjë. Por është i qartë dallimi mes Kosovës nga njëra anë dhe Abkazisë e Osetisë jugore nga ana tjetër”, ka thënë Kasaçov duke shpjeguar se ku qëndron ky dallim. Sipas tij Kosova nuk ishte formalisht, por realisht pjesë e Serbisë dhe ish Jugosllavisë. Ndërsa Osetia e Jugut dhe Abkazia nuk kanë pranuar të jenë pjesë e Gjeorgjisë që pas shkëputjes nga ish Bashkimit Sovjetik. Kasaçov shtoi se Rusia është përpjekur të ndihmojë Gjeorgjine që të ruajë integritetin territorial me gjithë mënyrat politike, por ishte Gjeorgjia që vendosi të zgjidhte këtë çështje ushtarakisht. Kasaçov shton se Rusia është vendi i vetëm në botë që ka respektuar ligjin ndërkombëtar duke mos njohur asnjë shtet të botës, duke mos dërguar forca asgjëkund jashtë kufijve të tyre dhe duke mos ndërtuar baza ushtarake gjetkë. Ndërsa vende si SHBA apo Britania, hynë në Irak, njohën Kosovën… tani edhe Rusia do veprojë në të njëjtën mënyrë si partnerët e saj globalë, përfundon Kasaçov.

(a.r/news24/balkanweb)