Prishtinë- Kryeministri Hashim Thaçi në mbledhjen e rregullt të kabinetit qeveritar tha se Kosova është plotësisht e angazhuar në përgatitjet për hyrjen në fuqi të Kushtetutës, më 15 qershor, dhe shtoi se këto përgatitje po zhvillohen në koordinim të plotë me faktorët civilë dhe ushtarakë ndërkombëtarë në Kosovë. Ai theksoi se Qeveria e Kosovës gjatë ditëve të ardhshme do të procedojë në Kuvend edhe 6 deri në 8 projektligje që dalin nga pakoja e Ahtisarit, dhe shprehi zotimin e institucioneve për zbatimin e plotë të kësaj pakoje. "Jemi duke vazhduar implementimin intensiv të dokumentit të Ahtisarit dhe këto ditë do t'i procedojmë me miratimin e projektligjeve që dalin nga kjo pako. Po i ofrohemi 15 qershorit kur do të futet në fuqi Kushtetuta e Republikës së Kosovës, kushtetuta e shtetit të Kosovës dhe natyrisht se do të vazhdohet me funksionimin normal dhe efikas të institucioneve të shtetit të Kosovës në gjithë territorin", tha në mbledhje të qeverisë Thaçi. Ai pohoi se i gjithë ky proces është bërë në koordinim dhe harmoni të plotë me autoritetet civile dhe ato ushtarake ndërkombëtare. Kryeministri Thaçi po ashtu vlerësoi se gjatë kësaj jave situata ka qenë e qetë dhe nën kontroll të autoriteteve vendore dhe atyre ndërkombëtare dhe po ashtu ka qenë një javë e mirë edhe me njohjen e Kosovës nga vendet tjera. Në këtë drejtim u vlerësua se janë edhe vizitat dhe takimet që ka zhvilluar këto ditë ministri i Punëve të Jashtme Skënder Hyseni me ambasadorë dhe përfaqësues të vendeve të Amerikës Latine. "Në të njëjtën kohë ka vazhduar lobimi për çështjen e njohjes së pavarësisë së Kosovës, dhe në të njëjtën kohë kemi punuar aktivisht që procesi i njohjes dhe i angazhimeve për implementimin e kritereve për t'u ofruar Kosova sa më shpejtë që është e mundur në NATO dhe BE janë duke vazhduar nga institucionet e Kosovës", u shpreh kryeministri Thaçi, duke shtuar se procesi i lobimit do të vazhdojë edhe në të ardhmen. "Besoj se gjërat do të shkojnë në drejtim të përshpejtimit të njohjes së pavarësisë", ka shtuar ai. Ndryshe, qeveria shqyrtoi sot edhe një nismë e cila u vlerësua shumë e rëndësishme për njohjen e stazhit të arsimtarëve gjatë periudhës së okupimit 1990 - 1999. Kabineti qeveritar u shpreh se më tepër se kompensim financiar, një vendim i tillë do të ishte një kompensim moral për gjithë angazhimin e tyre në atë periudhë shumë delikate. Ndërkaq, për përgatitjet për konferencën e donatorëve, kryeministri Thaçi tha se të gjitha institucionet dhe mekanizmat përkatës të inkorporuar në këtë proces janë në fazën intensive. "Duhet të besoj se do të jemi të përgatitur mirë dhe së shpejti do ta kemi një prezantim para mekanizmave përkatës ndërkombëtar për të prezantuar përgatitjet tona serioze dhe do t'i marrim rekomandimet shtesë, vërejtjet dhe sugjerimet në mënyrë që të jemi të kompletuar dhe të kemi përgatitje çfarë presin donatorët dhe çfarë i meritojnë qytetarët", u shpreh Thaçi.

(a.r/QIK/Balkanweb)