BRUKSEL – Plani i Bashkimit Evropian që rreth mesit te qershorit të marrë përsipër çështjet politike në Kosovë nga Kombet e Bashkuara, si duket do të shtyhen, për shkak të mungesës së marrëveshjes për tranzicion formal të pushtetit. Kete e kanë bërë të ditur sot për agjencinë Reuters burimet evropiane. Ata rendisin si shkak dhe fuqine e Rusise ne Keshillin e Sigurimit ne Kombet e Bashkuara.
"Ne ende po vendosemi - mirëpo plani që çdo gjë të jetë në vendin e vet deri atëherë, tani po duket i vështirë”, ka thënë një zyrtar i BE-së. Sipas këtij burimi ka pak mundesi që deri më 15 qershor në Kosovë të vendosen 2.200 trupat policorë dhe zyrtare të BE-së.

Diplomatët evropiane thonë se Rusia, e cila kundërshton pavarësinë e Kosovës, është duke e shfrytëzuar fuqinë e saj në Këshillin e Sigurimit të Kombeve të Bashkuara, për të parandaluar dorëzimin e pushtetit nga KB-ja në duart e misionit të BE-së, EULEX.

“BE-ja momentalisht ka të vendosur në Kosovë rreth 300 vartes të saj, shumica prej të cilëve tashmë janë duke iu nënshtruar trajnimeve në Prishtinë, ndërsa gjatë javëve të ardhshme pritet ardhja e të tjerëve”, ka thënë nje zyrtar evropian per Reuters.

Mirëpo, fakti se nuk ekziston ndonjë datë e saktë për largimin e personelit të misionit të KB-së (UNMIK-ut) nga Kosova, ka ngritur pyetjen se kur mund të zëvendësohet personeli dhe makinat e UNMIK-ut me ato të BE-së.

"Po zhvillohet një diskutim për mundësinë e shtyrjes për së paku një muaj”, ka thënë ky burim për Reuters.

Zyrtarët e BE-së thonë se asgjë nuk ka ndryshuar në objektivat e misionit të BE-së që duhet të mbikëqyr dhe drejtoje policinë lokale përgjatë territorit të Kosovës si dhe të zotëroje njësitë për intervenim të shpejt.

Mirëpo diplomatët thonë se nëse UNMIK-u mbetet në terren edhe pas qershorit, mund të ndodhë de fakto një “ndarje e lehtë” e Kosovës – në "UNMIKland" që do të ishte në zonat veriore të Kosovës ku jetojnë serbët, dhe "EULEXland", në pjesën tjetër më të madhe të shtetit të banuar me shqiptarë.

Por nderkaq po sot nga Bashkimi Evropian vjen pohimi se ata presin vetem një sinjal nga Kombet e Bashkuara për të marrë përgjegjësitë e veta në Kosovë, në fushën e rendit e ligjit. Keshtu ka deklaruar kreu i misionit evropian për rend dhe ligj në Kosovë, Yves de Kermabon, në një intervistë për nje agjenci franceze të lajmeve.

"Është shumë e mundshme që ne nuk do të shënojmë ndonjë përparim të posaçëm pas 15 qershorit, për aq kohë sa nuk kemi një kornizë të qartë ligjore", ka thënë kreu i misionit evropian për rend dhe ligj në Kosovë, Yves de Kermabon duke shtuar se "Misioni është në një lloj pritje për vendime nga Kombet e Bashkuara".
Por, Yves de Kermabo është optimist se BE-ja do t'i përmbushë qëllimet e saj në Kosovë, edhe sikur afatet të shtyhen "për një, dy apo tre muaj".
(A.S/d.b/telegraf/Reuters/Balkanweb)