PRISHTINË - Prishtina zyrtare shprehu gatishmërinë për të biseduar me qeverinë e Serbisë, por vetëm për interesa të përbashkëta si shtete fqinje. Kjo do të thotë se bisedimet e tyre duhet të vërtiten rreth integrimeve euroatlantike, ruajtjes së kufirit, luftën kundër terrorizmit dhe çështje të tjera.
Këtë ka deklaruar sot zëvendëskryeministri Hajredin Kuçi duke shtuar se bisedimet që tejkalojnë kufijtë e dy shteteve fqinje nuk do të merren në konsideratë. Deklarata ka ardhur fill pas mbledhjes së rregullt të qeverisë së Kosovës. Ky reagim i Kuçit ka pasuar një rekomandim të UNMIK-ut lëshuar një ditë më parë, sipas të cilit, Prishtina dhe Beogradi domosdoshmërisht duhet të vazhdojnë bisedimet direkte.
“Jemi të gatshëm që të bashkëpunojmë për interesat e dy vendeve dhe dy popujve me secilin shtet veç e veç, përfshirë edhe Serbinë, për integrime rajonale, për luftën kudër krimit të organizuar, luftën e terrorizmit, bashkëpunimit kufitar, por gjithnjë si dy shtet sovrane dhe të pavarura si partnerë dhe mbi bazën të një niveli reciprok”, theksoi Hajredin Kuçi.
(a.s/Balkanweb/RTK)