MITROVICE- Kryetari i Komunës së Mitrovicës, Bajram Rexhepi pranon se projekti i ujësjellësit Suhadoll-Vinarc në veri të Kosovës është politizuar, por sqaron se kjo ka ndodhur nga pala serbe, dhe jo nga pala shqiptare. Në këtë mënyrë Rexhepi i përgjigjet deklaratës së shefit të UNMIK-ut, Lamberto Zannier i cili akuzoi se politika po pengon ndërtimin e ujësjellësit. “Serbët lokalë nuk lejojnë që të zbatohet projekti i komunës së Mitrovicës për ndërtimin e ujësjellësit për fshatrat shqiptare në veri” ka thënë Rexhepi në një intervistë për “Europën e Lirë.
Rexhepi po ashtu është pajtuar edhe me faktin se UNMIK-u tashmë e ka marrë përsipër menaxhimin e punimeve për ujësjellësin në fshatin Suhodoll – duke thënë se për të është më rëndësi që të përfundojë ujësjellësi dhe të mos ketë tensionime politike.
Megjithatë, ai është shprehur i vendosur që ky projekt të realizohet me apo pa UNMIK-un. “…ne kemi qenë shumë të vendosur dhe nuk kam thënë rastësisht se ne këtë projekt vital për qytetarët e këtyre tre fshatrave, për më tepër se 2500 banorë, do ta bëjmë me UNMIK-un ose pa UNMIK-un. Më mirë është më UNMIK-un që të mos ketë tensionime, por nëse ata bëhen pengesë, ne do ta bëjmë atë edhe pa UNMIK-un”.

(s.g/Balkanweb)