KOSOVË - Kryeministri i Kosovës, Hashim Thaçi është shprehur shumë i kënaqur për arritjet e Kosovës deri në ditët e sotme. Sipas tij procesi i njohjes së Kosovës jo vetëm nga ana e shteteve të fuqishme por edhe nga disa vende të rajonit tregon përparësi dhe tashmë pritet që ky proces të vazhdojë të përparojë. Kryeministri Thaçi ka i dhënë këto deklarata në një intervistë për televizionin “21” ku ka thënë se kohët e fundit Rumania, Greqia dhe Spanja kanë ndryshuar qëndrimin e tyre ndaj shtetit të Kosovës.
“Spanja do të marrë pjesë në konferencën e donatorëve për të ndihmuar Kosovën, shefja e diplomacisë greke, Dora Bakojani ka dhënë sinjale pozitive se mirëpret hapjen e zyrës në Athinë, ndërsa shefi i diplomacisë rumune në vizitën e tij në Shqipëri ka deklaruar se vendi i tij përkrahë perspektivën e Kosovës në procesin e evrointegrimeve”, tha kryeministri Thaçi. Kohë më parë qeveria e Kosovës deklaroi se njohja nga Maqedonia dhe Mali i Zi pritet të ndodhë në një periudhë të shkurtër kohore.
(a.s/Balkanweb/INA)