TIRANE- Që liderët e UÇK-së trafikuan organet e të burgosurve serbë në një spital të fshehtë në qytetin e largët të Burrelit, në Shqipëri, gjatë vitit 1999, kur zhvillohej lufta e Kosovës, këto mbeten thjesht dyshime në letër. Dyshimet e ish-kryeprokurores së Gjykatës së Hagës, Karla del Ponte në librin “Gjuetia”, që u publikua pak muaj më parë në Itali dhe shkaktoi shumë reagime dhe debate në Shqipëri e Kosovë. Akuzat janë të rënda dhe ngrihen kundër liderëve kosovarë dhe bashkëpunëtorëve në Shqipëri, por Del Ponte u ka dhënë fund rrëfimeve. “Tani jam diplomate, nuk mund të flas më për këtë çështje”, - thotë ish-kryeprokurorja në një deklaratë ekskluzive për “Gazetën Shqiptare”. Duke iu përgjigjur interesimit të “Gazetës” për akuzat në librin e saj, ambasadorja e Zvicrës në Argjentinë thekson se statusi i ri nuk ia lejon më të flasë lidhur me aktivitetet e kryera gjatë kohës kur ishte në krye të gjykatës. “Sipas udhëzimeve të shefes së Departamentit të Punëve të Jashtme në republikën federale të Zvicrës, ministres Micheline Calmy-Rey’s, në postin e ambasadores së Zvicrës në Argjentinë, nuk mund të bëj deklarata apo komente që kanë lidhje me detyrën time të mëparshme si kryeprokurore e Gjykatës së Hagës”, - deklaron ajo në përgjigjen drejtuar “Gazetës” lidhur me akuzat e rënda në librin e fundit.
Akuzat
Libri i saj është ndaluar tashmë nga Ministria e Jashtme zvicerane, pasi rrëfimet e Del Pontes binin ndesh me pozicionin e saj. Ish-kryeprokurorja akuzon drejtuesit e shqiptarëve të Kosovës, ndër të cilët edhe kryeministri aktual, Hashim Thaçi, pasi sipas saj janë përzierë në trafik organesh, që u janë marrë afro 300 të burgosurve serbë në verën e vitit 1999. Del Ponte, që zbulon se ka hetuar në 2003 lidhur me këto akuza, saktëson se hetimet kishin mbetur në një pikë të vdekur për mungesë provash. Sidoqoftë, Gjykata e Hagës ka deklaruar se nuk ka prova lidhur me akuzat e Del Pontes, edhe pse Rusia kërkoi që ato të shqyrtoheshin me shumë kujdes.
Kritikat
Nga ana tjetër, edhe ish-zëdhënësja e Del Pontes, Florence Hartman e akuzoi ashpër shefen e dikurshme duke deklaruar se gjithçka ishte veçse një fantazi e saj. Në një shkrim të botuar në të përditshmen zvicerane “Le Temps”, Florence Hartmann e vlerëson si të “papërgjegjshme” dhe të “padenjë” paraqitjen “si fakt i vërtetuar të diçkaje që ishte e pamundur të provohej në realitet”. “Zëra për trafik organesh i shoqërojnë gjithmonë konfliktet, por rrallë rezultojnë të vërteta”, - vlerësoi ish-zëdhënësja, duke nënvizuar se “ruajtja e zinxhirit të ftohtë dhe kushtet e asepsisë e bëjnë jashtëzakonisht të vështirë zbatimin real të praktikave të tilla”.
Pavarësisht nga kritikat dhe reagimet e shumta, Këshilli i Europës ka vendosur të hetojë seriozisht “akuzat” e Del Pontes në librin e saj të fundit. KE ka emëruar senatorin Dick Marty, për të hetuar në lidhje me trafikun e organeve të të burgosurve serbë gjatë luftës në Kosovë. Senatori zviceran do të udhëtojë drejt Prishtinës për të hartuar një raport për këtë çështje. Ndërkohë, Prishtina dhe Tirana i kanë hedhur poshtë akuzat e ngritura nga Del Ponte. Kryeministri kosovar, Hashim Thaçi, emri i të cilit përmendet në rrëfimet e Del Pontes, ka deklaruar se pretendimet e ish-kryeprokurores janë të pabazuara. Ndërsa, ministri i Jashtëm shqiptar, Lulzim Basha i cilësoi akuzat e ngritura nga Del Ponte, si “trillime dhe absurditete”.

(s.g/GazetaShqiptare/Balkanweb)