PRISHTINE- Zyrtarët e UNMIK-ut konfirmuan se është arritur marrëveshja me BE-në për nënshkrimin e një aranzhimi teknik, me të cilin UNMIK-u fillon bartjen, përkatësisht shitjen e aseteve që i ka shfrytëzuar deri më tani, tek EULEX-i. Në anën tjetër, kryeministri Hashim Thaçi tha se çdo transformim i UNMIK-ut, për Kosovën do të thotë më shumë pushtet dhe përgjegjësi shtetërore. Kreu i Qeverisë së Kosovës tha se mbështet përpjekjet që po bëhen që misioni i Bashkimit Evropian, EULEX-i, të bëhet sa më shpejt funksional në Kosovë, duke besuar se bashkë me qeverinë vendore do të ndikojnë që në Kosovë të ketë një sundim edhe më të mirë e më efikas të rendit dhe ligjit.

“Të gjithë jemi pajtuar me rikonfigurimin aktiv dhe do të kemi bashkëpunim të ngushtë edhe me ICO-n, edhe me EULEX-in. Roli i UNMIK-ut ka qenë për t'u vlerësuar në tetë vjetët e kaluar dhe është për t'u vlerësuar edhe sot roli i Organizatës së Kombeve të Bashkuara në mbështetje të Republikës së Kosovës. Por, në ndërkohë, çdo transformim dhe rikonfigurim që do të ndodhë ditët e ardhshme, nënkupton forcim të funksionimit të institucioneve të Republikës së Kosovës”, u shpreh Thaçi.

Ndërkohë, sot UNMIK-u dhe EULEX-i kanë arritur një marrëveshje teknike, me të cilën administrata e UNMIK-u ia shet EULEX-it asetet që nuk do t'i duhen më në të ardhmen, duke qene se administrata e Kombeve të Bashkuara do t’i nënshtrohet një procesi të rikonfigurimit që do të sjellë si rezultat shkurtime në stafin e kësaj administrate deri në 70 për qind.

Zëdhënësi i UNMIK-ut, Alexander Ivanko, tha se ky nuk është një Memorandum Mirëkuptimi, pavarësisht se vetë zyrtarët e UNMIK-ut e kishin cilësuar më herët si të tillë. Sipas tij, kjo është vetëm marrëveshje teknike që nuk ka të bëjë me aspektet politike.

Ndërsa zyrtarët e UNMIK-ut kanë refuzuar të komentojnë nëse shtrirja e EULEX-it për këtë fazë përfshin edhe pjesën veriore të Kosovës dhe Mitrovicën, në anën tjetër, kryeministri Hashim Thaçi tha se në Mitrovicë po bëhen hapa, sipas tij, të mëdhenj për integrimin e kësaj pjese dhe shtrirjen e pushtetit ligjor.
(a.r/rel/balkanweb)