PRISHTINË - Shefi i UNMIK-ut, Lamberto Zannier, po kërkon që të nisë bisedimet mes Kosovës dhe Serbisë. Për këtë Zannier pritet që javën e ardhshme të vizitojë Beogradin vizitë e cila do të ketë si qëllim fillimin e bisedimeve mes dy vendeve sipas planit të Ban Ki-Moon. Lajmi është bërë i ditur nga zëdhënësi i UNMIK-ut Alexander Ivanko gjatë ditës së sotme.
“Siç ka thënë sekretari i përgjithshëm në raportin e tij, PSSP do të lehtësojë dialogun Prishtinë-Beograd. Kështu që PSSP do të shkojë në Beograd, javën e ardhshme, por nuk kemi datën e saktë ende”, thënë zëdhënësi i UNMIK-ut. Vizita e Zannierit organizohet nga Zyra e Kombeve të Bashkuara në Beograd. Ivanko thotë se para se të shkojë në Beograd, Zannier do të konsultohet me autoritetet vendore të Prishtinës. “Natyrisht se ai do të konsultohet me ta. Ndryshe, mund të konfirmoj se vizita po organizohet nga zyra e OKB-së në Beograd”, tha Ivanko.
Ndërkohë Prishtina zyrtare pranon që të bisedohet për çështje teknike, por hedh poshtë në mënyrë kategorike çdo mundësi të dialogut për statusin. Ndërkaq në planin e Sekretarit të Përgjithshëm, Ban Ki Moon, parashihet që Prishtina dhe Beogradi të bisedojnë për çështjet që lidhen me fushën e policisë, drejtësisë, doganave, trashëgimisë fetare dhe transportit. Vizita e Zannierit në Beograd, shënon kështu vizitën e parë pas dy vjetësh të një shefi të UNMIK-ut në kryeqytetin serb.
(a.s/Balkanweb/Telegraf)