VLORË - Pas 8 vjetësh, këngëtarja e njohur vlonjate, Aurela Gaçe është rikthyer në qytetin e saj të lindjes për të dhënë një koncert në atë skenë ku nisi hapat e parë të karrierës së suksesshme artistike. Në këtë koncert ajo ishte së bashku me DJ e njohur amerikan, Fatma Scoop. DJ i njohur, në këtë koncert jo vetëm ka qenë në lartësinë e kërkesave profesionale, por në disa këngë ka shoqëruar edhe Gaçen. Interesi për koncertin e lajmëruar të Aurela Gaçes kishte bërë që pallati i sportit në qytet të mbushej plot e përplot nga artdashës vendas. Me zërin e saj të bukur e brilant, Gaçe solli në skenë një numër të madh këngësh të njohura më parë nga publiku, por dhe këngë të fundit të repertorit të saj të krijuara e kënduara në Amerikë, ku jeton prej vitesh. Të gjitha këngët e interpretuara nga ajo u duartrokitën gjatë, ndërsa këmbëngulja e spektatorëve, detyroi interpretuesen që të përsëriste shumë nga këngët e repertorit të saj. DJ amerikan, Scoop, jo vetëm në interpretimet shoqëruese në disa këngë, por dhe me përshëndetjen shqip, e elektrizoi më tej sallën. Ndërkohë, gjatë përshëndetjes, ai mbante në dorë flamurin kombëtar shqiptar. Koncerti i inkuadruar në ditën e festës së Pavarësisë, për këngëtaren ishte dhe një homazh për shoqen e saj, këngëtaren vlonjate, Anita Bitri, e cila humbi jetën në Amerikë aksidentalisht, së bashku me të bijën e saj dhe nënën.

(s.g/GSH/BalkanWeb)