SARANDE- Pas fluksit të turistëve në pikat e pelegrinazhit turistik që numëron Saranda dhe rajoni përreth, tani është radha e specialistëve. Në një prej tyre, në atë që njihet si kompleksi i sinagogës dhe bazilikës së Sarandës, të emërtuar kompleksi Onhezmi, në ditët e para të shtatorit kanë nisur punimet sipas një projekti restaurues. Sinagoga dhe bazilika e Sarandës, së bashku janë duke iu nënshtruar punimeve restauruese dhe shpëtuese. Mozaiku është zbuluar për të parë dhe vlerësuar gjendjen e tij dhe për të kryer në të restaurimet e nevojshme. Mozaicisti Agron Islami dhe specialisti tjetër Zamir Marikaj, nga Instituti i Monumenteve të Kulturës udhëheqin punët e projektit. Islami thotë se janë duke verifikuar dëmtimet e mundshme në mozaikë dhe do të bëhet plotësimi e zëvendësimi i tyre. E gjithë sipërfaqja që zë mozaiku është zbuluar nga shtresa mbrojtëse e rërës dhe mbulesa e plastmasit, për të evidentuar më saktësisht nevojat që paraqiten. Megjithëse mozaicisti Agron Isalmi thotë se kjo është një punë rutinë, që bëhet një herë në 4-5 vjet, ky vrojtim dhe plotësim është shpëtues për mozaikun dhe figurinat që ai paraqet. Restaurimi i nisur bëhet duke pasur mbështetjen e drejtorisë rajonale të kulturës kombëtare në Sarandë. Sipas Feruz Shabanit, drejtor i kësaj drejtorie, projekti i nisur i paraprin një projekti edhe më të madh, që parashikon një imazh krejt tjetër të kompleksit të sinagogës dhe bazilikës, që përfshin rrethimin me elemente të reja, mbulimin, ndriçimin dhe gjelbërimin, një projekt që kap vleftën e 4.5 milionë lekëve.

(s.g/GazetaShqiptare/BalkanWeb)