Dhe pak, dhe pak... tani jeni njëlloj! Cheeeze!

Qëllon që ta lidhësh ndonjëherë shallin njëlloj me kolegen ose shikon, pasi takoheni, që je veshur me të njëjtën ngjyrë me mikeshën tënde. Por mund të ndodhë ama, që qëllimisht e shpesh, si për koincidencë, edhe divet e kinemasë të gjenden të ngjashme në çdo detaj me njëra-tjetrën dhe pse i ndajnë... dhjetëra vjet. Ja fotot që na shërbejnë si prova

Kush do ta mendonte se Elizabeth Taylor dhe latinia Jennifer Lopez, qoftë dhe disa çaste në jetën e tyre, do ngjanin kaq shumë me njëra-tjetrën? Por ja që flokët e mbuluar në njërin rast me shaminë e zbukuruar me një bizhuteri e në tjetrin me copën e argjendtë të lidhur pas kokës, vathët dhe ajo gjysmëhapje e gojës i kanë bërë të duken të ngjashme në këtë foto, pa harruar sytë: të theksuar me kontur të zi.

Rikthimi në trend i elementeve të modës bën të rikthehen dhe modelet e veshjeve të atyre që e lançojnë të parat modën: artistet e njohura. Dhe Jane Fonda, aktorja 70 vjeçare, në këtë foto të shumë viteve më parë, është veshur me një pardesy të lidhur në mes, që shkon sipas modës dhe sot. Por edhe flokët e valëzuar, të ndarë me vijë në mes dhe buzëqeshja e plotë, e bëjnë Jessica Biel të ngjajë si motra e Fonda-s në vite të tjera.

Pardesy e bardhë dhe syze të errëta dielli. Kjo është zgjedhja e Jackie O, ish-bashkëshortes së John F. Kennedy-t, e përsëritur disa dhjetëvjeçarë më vonë nga partnerja e Tom Cruise-it, Katie Holmes. Rastësisht, dy brunet kanë arritur një ngjashmëri identike me kontrastin e theksuar të krijuar mes flokëve, bluzës apo këmishës dhe pardesysë borë të bardhë, të lënë zbërthyer.

Duket sikur parukierja e Mia Farrow-t stilon ende flokët e aktoreve, përderisa dhe vite më vonë gjendet po ai model e ngjyrë flokësh dhe te australiania Michelle Williams. Meqë jemi te ngjyrat, dallohet ngjashmëria e nuancës së buzëkuqit dhe po ato mollëza të theksuara dhe ai grim minimal në sy. Si të mos mjaftonte, dy aktoret e viteve të ndryshme kanë një veshje thuajse të njëjtë për nga modeli dhe dizenjoja e ngarkuar.  

Shihni vetullat e dy aktoreve, Audrey Hepburn dhe Natalie Portman. Kanë një ngjashmëri deri në pikën që ndonjëherë është e vështirë të ngjajnë aq shumë njëra vetull me tjetrën. Por ja që preferenca e dy aktoreve të brezave të ndryshëm, ka qenë pikërisht kjo. Flokët e kapura, shprehja e fytyrës dhe buzëqeshja e përqendruar në sy janë elementet që plotësojnë mozaikët e ngjashëm të imazhit të tyre.

Këto dy bionde janë pjesë e listës së fitueseve të çmimeve “Oscar”: Grace Kelly në 1954-ën dhe Reese Witherspoon në 2006-ën. Plus kësaj, kanë hyrë dhe në historinë e të veshurave më bukur në ceremonitë përkatëse. Por, po t’i afrosh fotot e tyre të lavdisë, duket se ngjajnë edhe më shumë: flokë të kapur, vathë që varen dhe po ai pozicion duarsh që mban statujën e çmimit të njohur.