Ekspozita “Hapësira”, prezanton vlerat e fotografisë në Akademinë e Arteve

19.07.2008 12:05 Kulture - Burimi: SOT Kulture

Në Akademinë e Arteve gjatë këtyre ditëve janë hapur disa ekspozita me krijimtarinë e artistëve të rinj. E fokusuar vetëm në punimet e të rinjve, kjo galeri shumë shpejt në mjediset e saj do të ketë një tjetër ekspozitë, e cila do të jetë krejt ndryshe nga ato që janë hapur deri tani në këtë galeri arti. Ekspozita e titulluar “Hapësira” do të çelet në datën 22 korrik në galerinë e Akademisë së Arteve, dhe do të prezantojë për publikun fotografitë më të mira të 12 të rinjve shqiptarë. Ekspozita “Hapësira”, është realizuar nën kurimin e Adela Demetjas dhe Julie August.Në këtë ekspozitë marrin pjesë artistët e rinj Silva Agostini, Nikolin Bujari, Shpëtim Kërçova, Ledia Kostandini, Dritan Mesareja, Ardi Mulla, Violana Murataj, Heldi Pema, Leonard Qylafi, Irgin Sena, Syhabit Shkreli dhe Gentian Shkurti. Këta artistë e përdorin fotografinë si mediumin shprehës të botës së tyre. Ekspozita “Hapësira” e këtyre artistëve të rinj shqiptarë do të shoqërohet pak ditë më vonë në datën 25 korrik nga një tjetër ekspozitë fotografike, po këtë herë me punët e artistëve gjermanë Katharina Gaenssler, Robert Karl, Beatrice Minda, Andreas Gox dhe Hannes Ëanderer. Të dyja ekspozitat do të qëndrojnë hapur deri në datën 4 gusht në mjediset e galerisë së Akademisë së Arteve. Pas qëndrimit në Tiranë ekspozitat me punimet e 12 artistëve shqiptarë dhe artistëve gjermanë do të udhëtojnë drejt Berlinit në “Haus am Luetzoëplatz”. I njohur si një nga vendet ku ekspozohen më shumë vepra artistike, në Gjermani muret e “Haus am Luetzoëplatz”, të cilët mbajnë në kurriz që prej 40 vitesh vepra artistike nga më të ndryshmet, do të shndërrohen në hapësira për pamjet e fotografuara nga Shqipëria, por edhe për të projektuar ëndrrat e realizuara, ose të parealizuara të artistëve të rinj shqiptarë. Një pjesëz nga mentaliteti shqiptar, që mprehtësisht reflektohet në disa nga veprat e zgjedhura, do të bëhet për disa javë pjesë e artit të ekspozuar në një prej vendeve më të njohura për traditën kulturore gjermane. Sipas organizatorëve të kësaj ekspozite prezantimi i realitetit shqiptar i përfytyruar dhe argumentuar në mënyrë artistike, është elementi, që i bashkon dhe krijon një lidhje ideore të të gjitha veprave që do të prezantohen në ekspozitë. Ekspozita “Hapësira”, që do të hapet në datën 22 korrik në galerinë e Akademisë së Arteve, është në vijim të ekspozitave të tjera që janë hapur nga studentët shqiptarë në mjediset e kësaj galerie, e cila vetëm për një periudhë kohore të shkurtër ka prezantuar krijimet më të mira të artistëve të rinj.

Artikullin origjinal mund ta lexoni ketu

lajme.parajsa.com