Eliza Dushku thyen heshtjen. Aktorja me origjinë shqiptare ka folur për serialin më të ri televiziv, që është realizuar në bashkëpunim me një nga studiot e fuqishme të Hollivudit "Fox Entertainment". "Dollhouse" ka rikthyer në bashkëpunim Eliza Dushkun me regjisorin e njohur Joss Whedon. Që prej fillimit të projektit, zgjedhjes së kastit të aktorëve e më pas gjatë xhirimeve, ky telefilm është diskutuar shumë nga media e huaj. Ndërkohë që në forumet e internetit janë hedhur edhe imazhet e para. Trajleri i filmit ka zgjuar kureshtjen, ndërkohë që pritet të jetë një realizim i suksesshëm. Kur premiera ende nuk është përcaktuar saktësisht, aktorja me origjinë shqiptare ka folur rreth idesë së realizimit të "Dollhouse". Eliza Dushku, producente dhe ylli i serive fantashkencore u shpreh se ideja për këtë realizim është frymëzuar nga eksperienca që ajo vet ka përjetuar kur ishte një aktore e re. Në industrinë ku ajo interpretonte, gjithkush i kërkonte që të shfaqej ndryshe nga ajo që ishte në të vërtetë. "Isha vetëm 17 vjeçe kur u largova nga Los Angelos", - ka thënë Dushku në një intervistë për Television Critics Association. "Joss Whedon dhe unë po bisedonim për eksperiencën time në industrinë e filmit, mbi atë se ç'do të thotë që një vajzë e re të bëhet pjesë e këtij biznesi, cilat janë ndjenjat. Po shkëmbenim mendimet mbi këtë temë universale. E di....ti zgjohesh çdo ditë dhe ndihesh sikur të gjithë kërkojnë nga ty të jesh një tjetër njeri. Dhe ti përpiqesh ta bësh këtë. Është gati si një krizë identiteti", - është shprehur Eliza. Personazhi i saj në film pasqyron pikërisht këtë krizë identiteti që aktorja pak apo shumë e ka përjetuar sidomos në hapat e para të karrierës së saj. Eliza Dushku, e cila ka një kontratë me "Fox" për prodhime filmike, e ka nisur karrierën e saj me filma të tillë si "True Lies" (E vërtetë e gënjeshtërt) apo seritë televizive të Whedon, "Buffy the Vampire Slayer" (Buffy, vampiri vrasës) dhe "Angel" (Engjëll). Vonë, ajo luajti në një seri të "Fox", të titulluar "Tru Calling". Dushku ishte takuar me regjisorin Whedon për t'i kërkuar një këshillë, pas dështimit të një tjetër seriali të titulluar "Nurses" (Infermieret). Ndërsa po drekonte me aktoren e njohur, Whedon-it i lind ideja e menjëhershme e një gruaje me personalitet të shumëfishtë. Sipas tij, mbi këtë grua mund të ndërtoheshin disa seri, edhe pse më parë nuk e kishte menduar t'u kthehej sërish serive televizive. Kështu nisi projekti i "Dollhouse", në të cilin trajtohet shfrytëzimi i personaliteteve të një grupi njerëzish për interesa të një organizate të fshehtë. "Joss i njeh me të vërtetë femrat", - është shprehur Dushku. "Diku brenda thellë tij ndodhet një grua. Kështu që prej këtu nisi edhe tema e diskutimit: sfidat që ne duhet të përballojmë, që unë duhet t'i kaloj në kulturën e ditëve të sotme. Me këto mendime ai shkoi në banjë dhe kur u kthye tha: "Filmi do të titullohet "Dollhouse". Dhe unë isha dakord për këtë. Kështu që ja ku jemi këtu", - ka theksuar Dushku. Me një sukses ndërkombëtar, aktorja me origjinë shqiptare është e njohur edhe për publikun shqiptar. Për herë të parë ajo mbërriti në Tiranë me ftesë të regjisores Vera Grabocka, si e ftuar speciale në "Eurovideo Grand Prix".
Filmi
Gjatë vitit 2008 pritej që Eliza Dushku të shfaqej në ekranin e vogël me "Dollhouse". Por me sa duket, kjo do t'i takojë vitit 2009. Të shumtë janë kuriozët që duan të dinë diçka më tepër për serialin e ri televiziv, një kontraktim me "Fox". Nuk është dhënë një datë e saktë se kur do të nisë të shfaqet seriali televiziv "Dollhouse" (Shtëpia e kukullave), por aktorja është shprehur se është e kënaqur nga bashkëpunimi me Whedon. Komentet nga fansat në internet janë të shumta. Ata shprehen të entuziazmuar për rikthimin e dyshes Dushku-Whedom. Fox do të transmetojë për gjysmë sezoni serinë televizive me 7 episode. Për realizimin e saj është miratuar një buxhet rreth 1.5-2 milionë dollarë. Historia flet për një fabrikë sekrete të teknologjisë së lartë e quajtur "Dollhouse" ("Shtëpia e kukullave"), në të cilën njerëzit mund të riprogramohen nga fillimi. Disa prej qenieve njerëzore programohen për të kryer punë specifike. Në këtë fabrikë fshihen të gjitha kujtimet e tyre dhe ata kthehen sikur të ishin sërish fëmijë. Më pas mendja e tyre mbushet me gjërat që u interesojnë "prodhuesve". Eliza Dushku, në rolin e Echo është një nga këta persona që bëjnë pjesë në një grupim të titulluar "Actives" ose "Dolls" (Kukulla). Së bashku me të tjerë, ata i shfrytëzojnë për një mision sekret. Më pas u fshijnë gjithçka nga kujtesa. Por ajo dallon, sepse tenton me çdo kusht të zbulojë të vërtetën për të shkuarën e saj. Do të rifitojë kujtimet e së shkuarës që i janë fshirë. Protagonistë të tjerë të serisë janë edhe dy "kukulla" të tjera, një vajzë dhe një djalë, miq të saj. Në histori përfshihet një detektiv që përpiqet të hetojë për këtë veprimtari sekrete. Vet Whedon e ka përshkruar këtë serial si "suspancë-dramë-mitologji-komedi-aksion-horror-muzikal". Mbetet vetëm që Eliza të shfaqet në ekranin e vogël.

(s.g/GazetaShqiptare/Balkanweb)