“Loteu i stinëve”, muzikë me perla të poezisë shqipe në TKOB

10.05.2008 03:10 Kulture - Burimi: SOT Kulture

Është një shfaqje e cila përveçse muzikës do të ketë dhe recitime të cilat do të sjellin një performancë artistike të veçantë në Teatrin Kombëtar të Operës dhe Baletit. “Loteu i stinëve” vjen nesër në skenën shqiptare me ide, libret dhe muzikë të Aleksandër Peçit. Por pjesë e kësaj shfaqjeje janë dhe emra të tjerë të njohur të skenës shqiptare si sopranoja Mariana Leka, aktori Dritan Boriçi, regjisori Met Xhelili, koreografia Agron Aliaj (Artist i Popullit) dhe skenografi Bashkim Zahaj. Filli dramaturgjik i “Loteut të stinëve” është një rrugëtim i përjetshëm i njeriut nga njëra stinë tek tjetra në kërkim të thelbit të ekzistencës.Ashtu si rrugëtimi i erërave të ftohta që prodhojnë, shiun,vetëtimën, energjinë cikloniake, apo si rrugëtimi i tokës rreth diellit që krijon stinët, edhe arti në sajë të interaksionit të kundërtave prodhon tek publiku përjetim emocional ndjeshmërie. “Loteu i stinëve” një fjalë e re që Peçi i shton shqipes, qëndron tek raportet e kundërta dritë-hije, pranverë-dimër, jetë-vdekje. Thirrëtarët e proimetisë që duan pak dritë, e sunduesit e errësirës që lëshojnë të bjerë një shi gjak sa edhe të vdekurit dalin nga varret, e deri te agimet gishta trëndafili, dallëndyshet më humane se njerëzit. Fundi i këtij rrugëtimi artistik i sjell personazhet në shtëpinë e dashur ku fryn erë e vendlindjes. Për të shkruar “Loteun e stinëve” Aleksandër Peçi ka muzikuar perla të poezisë shqipe nga Migjeni, Agolli, të cilat i këndon nën një sfond të mrekullueshëm Mariana Leka. Ndërkaq aktori recitues Dritan Boriçi sjell vargje nga Homeri, Shekspir, Ovidi, Sofokliu, Gilgameshi. Balerinat nën koreografinë mjeshtërore të Agron Aliajt do ti shfaqen publikut si nimfa, si prometea që duan dritë, si dallëndyshe që zgjojnë ritmet e dritës. Me një performancë artistike të veçantë shfaqja do të vijë nesër për publikun si premierë, e cila do të sjellë një risi në skenën shqiptare. “Loteu i stinëve” vjen në kuadër të festivalit “Peçi Festival’08” i cili do të sjellë 12 premiera për publikun artdashës. Ndërkaq që sonte do të vijë me një koncert në TKOB ansambli koral “Okteti Plus” nga Prishtina nën udhëheqjen e Ylber Asllanaj. Në këtë koncert interpretojnë artistë të njohur kosovarë si: Raid Ymeri, Luan Durmishi, Meriton Ferizi, Besa Llugiqi, Eliona Hysaj, Diellza Sylejmani, Donjeta Krasniqi etj. Ky koncert do të përmbajë vepra të autorëve të njohur shqiptarë dhe botërorë. Por ky festival në ditët në vijim do të sjellë dhe një tjetër koncert për artdashësit që sërish do të ketë një perfomancë artistike të veçantë. Bashkëpunimi midis Aelifor dhe TKOB sjell në skenën operistike koncertin e titulluar “Diellësia” me vepra të Puccinit të shoqëruara nga sopranoja Mariana Leka. Në violinçel do të interpretojë Astrit Selita dhe në piano Dimitiri Vassilakis. Për këtë koncert mësohet se vepra u shkrua me rastin e 95-vjetorit të pavarësisë duke nënvizuar idenë se pavarësia është Diellësia në çdo vend. Toka pa diell në terr, një tmerr pa atmosferë, pa shi, pa ujë, pa lule, pa dashuri. Nuk vdes njeriu.... por vdes toka. Omagio a Puccini është një hyjnizim i modelimit Puccinian. Zgjimi i lëvizjes na fton të përjetojmë nga zgjimi deri tak energjia marramendëse një valle simfonike shqiptare. Koncerti No2 për violonçel kompozuar në vitin 1982 retrospektivë kur Aleksandër Peçi ishte vetëm 30 vjeç. Koncerti No2 për piano e orkestër është sensi i lëvizjes së kohës në drejtim të akrepave të orës drejt të ardhmes, progresit. Rrethi i madh në skemë nënkupton orkestra-natyra. Rrethi vogël nënkupton piano=njeriu. Njeriu që zhvillon natyrën, botën dhe këtu lind dhe dramaturgjia e veprës dhe një formë e re sonate ndryshe nga ajo klasike. Por në vijimësinë e këtij festivali publiku do të ketë mundësinë që të ndjekë dhe vepra të tjera të cilat do të prezantojnë përpara tyre krijimtari të larmishme artistike.

Artikullin origjinal mund ta lexoni ketu

lajme.parajsa.com